قازاق ونەرىنىڭ ساڭلاقتارى: اسانالى ءاشىموۆ

1937-جىلى 8 - مامىردا جامبىل وبلىسى، سارىسۋ اۋدانى، ساۋداكەنت (بۇرىنعى بايقادام) اۋىلىندا دۇنيەگە كەلگەن.

1961 - جىلى قازاقتىڭ مەملەكەتتىك قۇرمانعازى اتىنداعى ۇلتتىق كونسەرۆاتورياسىنىڭ تەاتر فاكۋلتەتىن اكتەر ماماندىعى بويىنشا ءبىتىرىپ شىعىپ، «قازاقفيلم» كينوستۋدياسىنا اكتەرلىك شتاتقا قابىلداندى.

1963-جىلدان بەرى م. اۋەزوۆ اتىنداعى اكادەميالىق دراما تەاترىنىڭ اكتەرلىك قۇرامىندا ءارى رەجيسسەرلىك قىزمەتتە.

تەاتر ساحناسىندا م. اۋەزوۆتىڭ «ابايىندا» كەرىم، «ەڭلىك- كەبەگىندە» كەبەك، «قارا قىپشاق قوبىلاندىسىندا» ايشۋاق، «تاڭعى جاڭعىرىعىندا» جاراس باي، ع. مۇسىرەپوۆتىڭ «قوزى كورپەش- بايان سۇلۋىندا» قودار، ق. مۇحامەدجانوۆ، ش. ايتماتوۆتىڭ «كوكتوبەدەگى كەزدەسۋىندە» يوسيف تاتايەۆيچ، شەكسپيردىڭ «يۋلي تسەزارىندە» يۋلي تسەزار، م. فريشتىڭ «دون جۋاننىڭ دۋمانىندا» دون جۋان، ءا. نۇرپەيىسوۆتىڭ «قان مەن تەرىندە» ەلامان، ي. ۆوۆنيانكونىڭ «اپاتىندا» باس كەيىپكەر بولدى. گ. گاۋپتماننىڭ «ىمىرتتاعى ماحاببات» دراماسىنداعى دوكتور كلاۋزەن بەينەسى ءبىر تۋما اكتەردىڭ كۇردەلى ءارى سوڭعى جۇمىستارىنىڭ ءبىرى. بۇل قويىلىمنىڭ 100 دەن اسا كورسەتىلىمى انشلانگپەن وتكەن بولاتىن.

قارا شاڭىراق ساحناسىندا ءاسانالى ءاشىموۆ «امانگەلدى» (ع. مۇسىرەپوۆ) ، «مەن ىشپەگەن ۋ بار ما؟» (ي. ورازبايەۆ) ، «اقبىلەك» (ج. ايماۋىتوۆ) ، «ريەۆيزور» (گوگول) ، «فارحاد- شىرىن» (ن. حيكمەت) سپەكتاكلدەرىن قويىپ، رەجيسسەرلىك قىزمەت اتقاردى.

1958 - جىلى س. مۇقانوۆتىڭ «بوتاگوز» رومانىنىڭ جەلىسىمەن تۇسىرىلگەن فيلمدە بوي كورسەتتى. بۇل اكتەردىڭ كينوداعى العاشقى رولى بولاتىن. سودان كەيىن قازاق كينوسىنىڭ دامۋىنا ءوز ۇلەسىن قوستى. «ءان قاناتىندا»، «قىز جىبەك» ، «اتاماننىڭ اقىرى»، «ترانسسىبىر جۇردەك پوەزى» ، «جاۋشى» ، «نان ءدامى»  ،  «قازاقى وقيعا» ، «ءسىز كىمسىز، كا مىرزا؟ » ، كوپ سەريالى «بۇلعارلار تۋرالى بايان» فيلمدەرىندە ويناعان. سونداي- اق، كينو سالاسىندا رەجيسسەرلىك قىزمەت اتقاردى. «اجداھا جىلى» (1981) ، «شوقان ءۋاليحانوۆ» (1985) ، «جۋسان» (1986) ، «قوزى كورپەش- بايان سۇلۋ» (1992) جانە «تۇزدى كول جاعاسىنداعى ءۇي» فيلمدەرىن ءتۇسىردى.

1981 -جىلى تۇسىرىلگەن ز. ءساماديدىڭ   ΧІΧ عاسىردا شىڭجاڭدا بولعان ۇيعىر حالقىنىڭ كوتەرىلىسى تۋرالى رومانىنىڭ جەلىسىمەن تۇسىرىلگەن «اجداھا جىلى» ءفيلمى ونىڭ العاشقى رەجيسسەرلىك ەڭبەگى بولىپ تابىلادى.

1986 - جىلى ءاسانالى اشىموۆكە «شوقان ءۋاليحانوۆ» ءفيلمى ءۇشىن قازاق ك س ر مەملەكەتتىك سىيلىعى بەرىلدى.

اسانالى ءاشىموۆتىڭ 1995 - جىلى قازاق تىلىندە «مايرانىڭ ءانى» ، 2007 - جىلى «ارناۋ» بەس تومدىق شىعارمالار جيناعىن، 2008 -جىلى «س ليۋبوۆيۋ ۆاش اسانالي اشيموۆ» كىتاپتارى جارىققا شىقتى.

ماراپاتتارى :

1973 - جىل - «اتاماننىڭ اقىرى» فيلمىندەگى ءرولى ءۇشىن ك. بايسەيىتوۆا اتىنداعى قازاق ك س ر مەملەكەتتىك سىيلىعى

1974 - جىلى - تەاترداعى جۇمىستارى ءۇشىن قازاق كسر مەملەكەتتىك سىيلىعى

1978 - جىلى - قازاق ك س ر حالىق ءارتىسى

1980 - جىلى - ك س ر و حالىق ءارتىسى

2000 -جىلى - كينو ونەرىندەگى ەڭبەگى ءۇشىن «تارلان» تاۋەلسىز سىيلىعى

2001 - جىلى - «وتان» وردەنى

2002 - جىلى - جامبىل وبلىسىنىڭ قۇرمەتتى ازاماتى

2003 -جىلى - «قازاقى وقيعا» فيلمىندەگى رولى ءۇشىن  «شاكەن جۇلدىزدارى» كينوفەستيۆالى لاۋرەاتى

2007 - جىلى - «قۇرمەت» وردەنى

2007 - جىلى - الەمدىك كينوداعى زور ۇلەسى ءۇشىن يۋنەسكو حالىقارالىق اكادەمياسىنىڭ «التىن قىران» وردەنى . 

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى