تۇركيادا «تۇركى الەمى» كىتابى جارىق كوردى
جازۋشى تۇركى تەكتەس ەلدەرگە جەكە-جەكە توقتالىپ، ولاردىڭ وتكەنى مەن بۇگىنىن قامتىعان تولىمدى ەڭبەك جازدى. وندا قازاق جەرىنەن شىعىپ، بۇكىل تۇركى دۇنيەسىنىڭ ماقتانىشىنا اينالعان قورقىت اتا، ءال-فارابي، قوجا احمەت ياسساۋي مەن ۇلى اقىن اباي قۇنانباي ۇلى تۋرالى تولىق مالىمەت بەرىلىپ وتىر.
«تۇركى الەمى» كىتابى 450 بەتتەن جانە 19 تاراۋدان تۇرادى. سىرتتاي قاراعاندا كولەمدى، مۇقاباسى دا قالىڭ. باسقاشا بولۋى مۇمكىن ەمەس، ويتكەنى ءتۇبى ءبىر تۇركى حالىقتارىنىڭ ورتاق تاريحى، تىنىس-تىرشىلىگى قازىرگى حال-احۋالى جايلى كەڭىنەن جازىلعان. تۇركى حالىقتارىنىڭ ورتاق ەنسيكلوپەدياسى دەسەك تە بولادى.
وزگەن كەسكين كوپ جىلدان بەرى تۇركى الەمىن زەرتتەپ، قىرۋار ەڭبەك اتقارعان. بۇگىنگى تاڭدا ونىڭ 24 كىتابى ءوز وقىرماندارىن تاپتى. جازۋشىنىڭ ءبىرقاتار ەڭبەگى قازاق، وزبەك جانە ءازىربايجان تىلدەرىنە اۋدارىلدى. ول ءوزىن قوجا احمەت ياسساۋيدىڭ ۇرپاعى سانايدى، بىزگە اتاقتى ويشىل جايلى دا قالام تەربەگەنىن جەتكىزدى. ال ونىڭ جاڭا تۋىندىسىندا تۇركى دۇنيەسىنىڭ تانىمال عالىمدارى، قوعام قايراتكەرلەرى جەكە تاراۋمەن بەرىلگەن.
