قازاقستان مەن تۇركىلەردىڭ ورتاق- جيناقتالعان ءالىپبيى قانشالىقتى سايكەسەتىنى تۋرالى ايتۋعا ەرتەرەك - ا. ءسارىنجىپوۆ
بۇگىن پارلامەنت ماجىلىسىندە ءبىلىم جانە عىلىم ءمينيسترى اسلان ءسارىنجىپوۆ وسىلاي ءمالىم ەتتى. ەسكە سالا كەتەيىك، ءماجىلىس وتىرىسىندا «تۇركى اكادەمياسىن قۇرۋ تۋرالى كەلىسىمدى راتيفيكاتسيالاۋ تۋرالى» زاڭ جوباسى ماقۇلدانعان بولاتىن.
اتالعان كەلىسىم اياسىندا تۇركى اكادەمياسىنىڭ ماقسات- مىندەتتەرى ايقىندالادى. سونىڭ ىشىندە اكادەميانىڭ نەگىزگى ماقساتتارى رەتىندە ورتاق كونە ماتىندەر مەن اۋىزەكى دەرەككوزدەردى قوسا العاندا تۇركى تىلدەرىنىڭ بۇكىل الەۋەتىن پايدالانىپ، بارشا تۇركى حالىقتارى ءۇشىن ورتاق ادەبي ءتىل جاساۋعا ۇمتىلۋ، بارشا تۇركى تىلدەرى ءۇشىن قولدانىلاتىن جيناقتالعان ءالىپبي ازىرلەۋ ماسەلەلەسى قاراستىرىلعان.
«قازاقستان-2050» ستراتەگياسىندا مەملەكەت باسشىسى ن. نازاربايەۆ 2025 - جىلعا قاراي لاتىن الىپبيىنە اۋىسۋ ماسەلەسىن قاراستىرۋدى ۇسىنعان بولاتىن. ال اكادەميا ازىرلەيتىن جيناقتالعان ءالىپبي ورتاق لاتىن ءالىپبيى تۇرىندە قاراستىرىلا ما؟» ، - دەپ سۇراعان بولاتىن دەپۋتات تۇرسىنبەك ءومىرزاقوۆ زاڭ جوباسىن تالقىلاۋ بارىسىندا.
ءوز كەزەگىندە ءبىلىم جانە عىلىم ءمينيسترى اسلان ءسارىنجىپوۆ اتالعان ماسەلەگە قازىرگى ساتىداعى تازا عىلىمي جوبا رەتىندە قاراۋدى سۇرادى.
«ءبىزدىڭ ءوزىمىزدىڭ ءالىپبيىمىز قالاي قالىپتاساتىنى تۋرالى ايتۋ ەرتەرەك، جۇمىس توبى قۇرىلعان، جۇمىس ءجۇرىپ جاتىر. دەگەنمەن، ءبىزدىڭ ءالىپبيىمىز بەن تۇركىلەردىڭ ورتاق- جيناقتالعان ءالىپبيى قانشالىقتى سايكەسەتىنىن عالىمدارىمىزدىڭ، تۇركولوگتاردىڭ، مادەنيەتتانۋشىلاردىڭ جۇمىس ناتيجەسى كورسەتەدى. ال قازىرشە بۇل تۋرالى ايتۋعا ەرتەرەك» ، - دەپ جاۋاپ بەردى مينيستر ا. ءسارىنجىپوۆ.
اۆتور: قانات مامەتقازى ۇلى
