ناتو ۋكراينانى قارۋمەن قامتاماسىز ەتە باستادى
ۋكراينالىق مينيستر قىركۇيەك ايىنىڭ باسىندا ەل پرەزيدەنتىمەن بىرگە ناتو-نىڭ ساميتىنە قاتىسقانىن، وندا اليانستان كومەك سۇراعاندارىن ايتتى. «مەن سامميت بارىسىندا جابىق جاعدايدا الدىڭعى قاتارلى ەلدەردىڭ قورعانىس مينيسترلەرىمەن كەزدەسىپ، ولاردىڭ بىزگە كومەكتەسۋىن ءوتىندىم. مينيسترلەر ءبىزدىڭ ءوتىنىشىمىزدى ەسكەرىپ، قازىرگى تاڭدا ەلىمىزگە قارۋ جىبەرىپ جاتىر»، دەدى گەتەلەي ۋكراينانىڭ «5- كانال» ارناسىنا بەرگەن سۇقباتىندا.
«قارۋ تاسىمالداۋ ءۇردىسى جاقسى جۇرۋدە. قازىر بىزگە تەك وسى جولمەن ءجۇرۋ ماڭىزدى بولىپ تۇر» دەيدى مينيستر.
ەستەرىڭىزگە سالا كەتەيىك، زاماناۋي قارۋلاردى ۋكرايناعا تىكەلەي جەتكىزۋ تۋرالى كەلىسىمگە ناتو ەلدەرىمەن پەتر پورشەنكو كەلىسكەن بولاتىن. ۋكراينا پرەزيدەنتىنىڭ كەڭەسشىسى يۋري لۋتسەنكونىڭ ايتۋىنشا، ۋەلستە وتكەن ناتو سامميتىندە ۋكريانعا ا ق ش، پولشا، فرانسيا، نورۆەگيا، يتاليادان تىكەلەي قارۋ جەتكىزىلەتىنى تۋرالى كەلىسىم جاسالعان. ءبىراق كەيىننەن بۇل ەلدەر وزدەرىنىڭ ۋكرايناعا قارۋ بەرۋگە كەلىسكەندەرىن جوققا شىعارعان بولاتىن. الايدا ۋكراينا پرەزيدەنتى قارۋ جەتكىزۋگە قاتىستى ناتو-نىڭ ءبىرقاتار ەلدەرىمەن كەلىسكەنىن ايتۋدان تانباي وتىر. «ءبىرقاتار مەملەكەتتەر بىزگە اسكەري-تەحنيكالىق جاعىنان سەرىكتەس بولۋعا، ياعني قارۋ جىبەرۋگە كەلىستى»، دەيدى پوروشەنكو.
