قارتتار ۇيىندەگى وتباسى كۇنى
ءبىر شاڭىراق استىندا ۇيىسىپ، تاتۋ- ءتاتتى ءومىر ءسۇرىپ جاتقان جانۇيا ءارقاشان دا كوپكە ۇلگى بەرەكە مەن بىرلىكتىڭ نىشانى ىسپەتتەس.
ءبىراق وسى مەرەيلى مەرەكەنى وتباسىسىنان جىراق قارتتار ۇيىندە وتكىزىپ جاتقان قازىنا قاريالارىمىزدى قايتەمىز؟ ولاردىڭ كوڭىل-كۇيىن قالاي اۋلاعان ءجون؟
ءبىر ساتكە بولسىن وتباسىنىڭ جىلۋىن سەزىندىرۋ مۇمكىن بە؟ تاعدىرى ۇقساس جۇپ. ەكەۋى دە ءبۇلدىرشىن كەزىندە وقىس وقيعا سالدارىنان مۇگەدەك كەبىن كيدى.
بەرتىن كەلە قارتتار ۇيىنە تاپ بولىپ، ءومىردىڭ اشى ءدامىن ەرتە سەزىندى. ءبىراق مويىعان جوق. وسىدان 14 جىل بۇرىن شاڭىراق كوتەرىپ، بۇگىندە ءتۇزۋ ءتۇتىن تۇتەتىپ وتىرعان جايى بار. ورىنتاي مۇحتاروۆ، 1- توپتاعى مۇگەدەك:
- ءبىز اقتوبەدەگى قارتتار ۇيىندە تانىستىق. مەن ول كەزدە ساعات جوندەيتىن شەبەر ەدىم. ءبىر كۇنى جۇبايىم ءوزىنىڭ بۇزىلعان ساعاتىن ماعان الىپ كەلدى. سودان باستاپ ارالاسىپ كەتتىك. ەكەۋىمىزدىڭ دە تۋعان-تۋىستارىمىز بار. كەلىپ حال-جاعدايىمىزدى سۇراپ تۇرادى. اۋىر جۇمىس ىستەۋگە جارامسىز بولساق تا، اراسىندا شاحمات، توعىزقۇمالاق ويناپ، ارەكەتسىز وتىرمايمىز. رايسا اجە بۇل كۇندى ءوز وتباسىمەن وتكىزۋدى اڭسايدى. بالداي ءتاتتى بالعىن نەمەرەسىن باۋىرىنا باسقىسى كەلەدى. الايدا بالاسىنان جىراقتا بولعان كەيىن ساعىنۋدان باسقا امالى قالماعان.
ول قارتتار ۇيىنە 1 جىل بۇرىن تاپ بولدى. جۇبايى مەن تۇڭعىشى قايتىس بولعان سوڭ، ماڭدايعا جازعان جالعىز قىزى باعىپ-قاعىپ وسىرگەن اناسىنا كۇتىم جاساي الماي، وسىندا الىپ كەلگەن. رايسا بالىكينا، زەينەتكەر:
- ارينە، بالالارىڭمەن ءبىر شاڭىراق استىندا تۇرعانعا نە جەتسىن. نەمەرەم كەلىپ تۇرادى. سونىڭ وزىنە شۇكىرشىلىك ەتەم. دەگەنمەن، ولارعا كىنا ارتا المايمىن. سوعىس باستالعان كەزدە مەن نەبارى 9 جاستا ەدىم. اش-جالاڭاش بولساق تا، باۋىرلارىم قاسىمنان قالمايتىن. ءبىر-بىرىمىزدەن كوز جازىپ كورگەن ەمەسپىز. بەرەكە دارىعان بەيبىت زاماندا بۇل قارتتاردىڭ وتباسىدان جىراقتا كۇڭىرەنە كۇن كەشۋىنە نە سەبەپ؟ ءارقايسىسىنىڭ تاعدىرلارى ءارقيلى. ءبىراق ءومىر ءسۇرىپ وتىرعان ورتاسى مەن شاڭىراعى ورتاق. دەگەنمەن قوعام ولاردان تەرىس اينالىپ، باس تارتپايدى. مەرەكە كۇنى جانۇيا جىلۋلىعىن ءبىر ساتكە بولسا دا سەزدىرۋ ماقساتىندا ءتۇرلى ۇيىمدار قاريالاردىڭ كوڭىلىن اۋلادى.
ءىلياس يسپانوۆ، ق ر جوعارعى سوتىنىڭ دەپارتامەنت باسشىسى:
- جوعارعى سوت اپپاراتىنىڭ قىزمەتكەرلەرى وزدەرىنىڭ بىركۇندىك جالاقىلارىن ءبولىپ، وسى مەكەمەدەگى ازاماتتارعا جەتپەيتىن توڭازىتقىش، تەلەديدار سەكىلدى قاجەتتى كولەمدە سىياقى الىپ كەلدىك. وسىنداي ازاماتتارعا كومەكتەسۋ كەرەك. تەك جوعارعى سوت ەمەس، باسقا دا مەملەكەتتىك مەكەمەلەر دە وسى شارانى قولداپ وتىرعانىنا ءبىز سەنەمىز. ەلورداداعى قارتتار ۇيىندە 300 دەن استام قاريا كۇن كەشۋدە. مۇندا ولاردىڭ كۇتىمى مەن جانىنا جايلى جاعداي جاسالعان. الايدا ءوز ۇيىندە، وتباسىمەن بىرگە بولسا، قايعىسىز كوڭىلى قارا نانعا دا سەمىرەر ەدى. مۇنداي مۇڭدى جابىرقاۋ جاناردان اڭعارۋ قيىن ەمەس.
اۆتورلارى: نازەركە ءابدىراحمان قىزى، ايتجان وتىزبايەۆ
24.kz
