سۋمەن سىرلاسىپ، جەرمەن سويلەسكەن قازاق قىزى
ءبىراق شىمىر قىزدىڭ شيرىققان تۇرىنە، ءابجىل قيمىلىنا، سەنىمدى ۋاجىنە دەن قويعاندار العاشقى ويلارىنىڭ جاڭساقتاۋ ەكەندىگىنە بەرتىندە كوز جەتكىزدى.
- «سۋ - تىرشىلىك كوزى» ەمەس پە، سۋمەن سىرلاسىپ، جەرمەن سويلەسكەن ديحانعا قولىڭنان كەلگەنشە جاردەم بەرسەڭ، كوپتىڭ ءناپاقاسى ارتادى، سوندىقتان مەن ءۇشىن ينجەنەر-گيدروتەحنيك ماماندىعى ەڭ قادىرلى ماماندىق، - دەر ەدى گاۋحار بەكمۇرزا قىزى قۇلمىرزامەن پىكىرلەسە قالساڭىز.
- انام ۇلتاي قالىمبەتوۆا كەشەگى سۇراپىل سوعىس كەزىندە شيەلى كانالىن قولمەن قازعانداردىڭ اراسىندا بولىپ، ماڭداي تەرىن تامشىلاتا ءجۇرىپ، وسى ارنانىڭ ەل يگىلىگىنە پايدالانىلۋىنا اتسالىستى. سول جولدى مەن جاڭا زامان تالابىنا ساي جالعاستىرسام نەسى ايىپ؟!»
بۇل ۋاجگە نە ايتار ەدىڭىز، ماقساتى ايقىن، سەنىمىنە بەرىك، ءوز جولىن تاڭداعان جاننىڭ ءسوزى عوي، بۇل.
كولحوزداعى قاتارداعى مامان بولىپ جۇرگەن بويجەتكەندى كولحوز باسقارماسى 1985 - جىلى ۇجىمنىڭ باس گيدروتەحنيك قىزمەتىنە بەكىتتى. جاس ماماندى وسىنشاما ۇلكەن لاۋازىمعا بەكىتۋىنە اۋداننىڭ سول كەزدەگى ءبىرىنشى حاتشىسى س. شاۋحامانوۆتىڭ، اۋداندىق اتقارۋ كوميتەتىنىڭ ءتوراعاسى ك. حۆاننىڭ ەرەكشە سەنىمى، بولاشاعىنا ۇلكەن ۇمىتپەن قاراۋى دا سەپتىگىن تيگىزدى.
شيەلى اۋدانىنداعى ەڭ اۋقىمدى، اتاقتى لەنين كولحوزىنىڭ ءتوراعاسى تولەس اپبازوۆ، اۋداندىق سۋ شارۋاشىلىعى باسقارماسىنىڭ باستىعى پەرنەباي ەگەنوۆ، ۇجىمدا قاتار ەڭبەك ەتكەن بەكتاي نۇرمانوۆ، ناعمەتۋللا جانجىگىتوۆ جانە باسقالار ومىرلىك تاجىريبەسىمەن ءبولىسىپ، جاس ماماننىڭ اياعىنان نىق تۇرۋىنا جاردەمدەستى. 1986 - جىلدىڭ 1 - مامىرى قارساڭىندا اۋدانعا وبلىستىق پارتيا كوميتەتىنىڭ ءبىرىنشى حاتشىسى ەركىن اۋەلبەكوۆ كەلەتىندىگى ءمالىم بولدى.
اتاعى وداققا تانىمال باسشىنىڭ كەرەك دەسەڭىز شارۋاشىلىق باسشىلارى بىلە بەرمەيتىن قالتارىستاردى قاراپ، كەمشىلىكتى ءدوپ كورسەتەتىنى ەل اراسىندا اڭىز سەكىلدى ايتىلاتىن كەز. اۋدان باسشىلىعى قاي جەرىمىزدەن ءمىن تابار ەكەن دەپ قالتىلداپ جۇرگەنىندە العاباس جاقتان شۋ شىقسىن. شۋ سۋدان شىقتى. لەنين كولحوزىنىڭ №5-بريگاداسىندا كۇرىشتىككە سۋ الىپ جاتقان كانال قۇلاسىن. «كانال قۇلادى» دەگەن سۇمدىق وقيعا، ەگىستىككە باعىتتالعان سۋ ورتا جولدا باسقا ارنا تاۋىپ، اينالانىڭ ءبارىن كول-كوسىر ەتەدى، ونى ورنىنا كەلتىرۋ ازاپتىڭ- ازابى.
سورلاتقاندا قۇلاعان جەردى كوتەرەر ءبىر ۋىس توپىراق تاپپاي قينالاسىڭ. سۋ شايعان ايماققا بىردە-ءبىر تەحنيكا ماڭايلاي الماي تاعى دا كەسىرىن تيگىزەدى. قاپقا توپىراق سالىپ، ونى جاياۋ تاسىمالداۋ كەرەك، بۇعان قول كۇشىن جاپپاسا، تىعىرىقتان شىعۋ تىپتەن مۇمكىن ەمەس. ءاي، قايتەرسىڭ ەندى، «قىرسىققاندا قىمىران ءىريدى» دەمەكشى، وسى قيىن جاعدايدىڭ وبلىستىڭ قاھارلى باسشىسى، ەلى ەركىن اۋەلبەكوۆ دەپ قۇرمەت تۇتاتىن كىسىنىڭ كەلەر كەزىندە ورىن العاندىعىن قاراساڭىزشى! بولارى بولدى، اۋدان باسشىلىعى، كولحوز ماماندارى وسى ءىستى جاعدايدى قالپىنا كەلتىرۋگە كىرىستى. كوپ جابىلسا كول ەمەس پە، ايتەۋىر بەسىن اۋا كانالمەن سۋ ەگىستىككە قاراي بەتتەلدى. «ءۇھ» دەپ ماڭداي ءسۇرتىپ تۇرعاندا، وسى جەرگە ءبىرىنشى حاتشى دا كەلىپ كىدىردى. كارى تارلان ەمەس پە، مۇنداعى جاعدايدى بىردەن ءتۇسىندى.
كوز استىمەن وسىنداعى ادامدارعا جاعالاي قاراپ، اياعىندا كەرزى ەتىك، قولىنا سۋ ولشەيتىن پلانكا ۇستاعان بويجەتكەنگە جانارىن شامالى كىدىرتتى دە، ساپارىن ارى قاراي جالعاستىرىپ كەتە باردى.. . سول جىلى لەنين كولحوزى وتان قامباسىنا 1 ميلليون 131918 سەنتنەر سىر مارجانىن وتكىزدى. بۇل، ارينە، جانكەشتى ەڭبەكتىڭ ناتيجەسى. كولحوز باسشىلارىنىڭ قاتارىندا باس گيدروتەحنيك گاۋحار قۇلمىرزا دا تۇردى.
كەيىپكەرىمىز كەشەگى قوعامدىق وزگەرىستەر كەزىندە لەنين اتىنداعى كولحوز ءتوراعاسىنىڭ ورىنباسارى، العاباس اۋىلىنداعى «ەڭبەك» شارۋا قوجالىعىندا باس ەكونوميست قىزمەتتەرىن اتقارسا، ەل تاۋەلسىزدىگىن العان العاشقى 2001-2005 - جىلدارى ارالىعىندا شيەلى جەر كاداسترى فيليالىنىڭ ديرەكتورى بولدى. ال 2005 - جىلدىڭ ءساۋىر ايىنان باستاپ جۋانتوبە اۋىلدىق وكرۋگىنىڭ اكىمى قىزمەتىن بەس جىل بويى اتقاردى. 2010 - جىلدىڭ ساۋىرىنەن باستاپ گاۋحار بەكمۇرزا قىزى شيەلى اۋداندىق جەر قاتىناستارى ءبولىمىنىڭ باستىعى قىزمەتىندە.
جۇرتتان العان العىسى ءبىر توبە، اتقارۋشى بيلىك تە ونىڭ قىزمەتىن بۇگىندە لايىقتى باعالاپ كەلدى.
نۇرماحان ەلتاي، قىزىلوردا وبلىسى، شيەلى اۋدانى
