كۇيەۋىم مەنى لوتەرەيادان ۇتىپ العان
سونىڭ مانىنە جاس كەزىمدە تەرەڭىرەك ۇڭىلمەپپىن. سانامدى قاۋزاعان سانسىز ويمەن گازەت وقىرماندارىمەن بولىسسەم دەپ ەدىم. بالكىم، بىرەۋ اقىل سالار...
وڭ جاقتا وتىرعانىمدا نە ىشەم، نە كيەم دەمەدىم، بۇلعاڭداپ ءجۇرىپ بويجەتتىم.
اكەم - قالاداعى مەن دەگەن اۋقاتتى جانداردىڭ ءبىرى. ەلدىڭ ءبارى تانيدى، ەلدىڭ ءبارى سىيلايدى. قالا ورتالىعىنداعى ەڭ قىمبات اۋدانداردىڭ بىرىندە ەڭسەلى ەكى قاباتتى ۇيدە تۇراتىنبىز. اۋزىمنان شىققان ءسوزدىڭ ءبارى سول زاماتتا-اق ورىندالاتىن.
ءۇيدىڭ كەنجەسى بولعاندىقتان، اكەم مەنى ەرەكشە جاقسى كورەدى. سول سەبەپتەن دە نە ايتسام دا الىپ بەرەتىن. ەڭ سوڭعى ماركالى قىمبات كولىك تە ءمىندىم. جىل سايىن شەتەلدە دەمالامىن.
ەڭ سوڭعى موداداعى برەند كيىم دە مەنىڭ ۇستىمدە. قۇربىلارىم قىزىعا قارايتىن.
جىگىت بىتكەن دە مەنىڭ سوڭىمدا-تىن. ءبىرى - شىن ۇناتسا، ەندى ءبىرى «وليگارحتىڭ قىزى عوي، تامىرىن باسىپ كورەيىك» دەپ ىنتىعاتىن. وندايلاردى، ارينە، سەزەسىڭ. بۇلعاقتاپ جۇرگەندە جاسىم جيىرما بەستەن دە اسىپ كەتتى. ءبىر كۇنى شەشەم شاقىرىپ الىپ تەزگە سالعانداي بولدى.
سوندا عانا «كۇيەۋگە تيۋ كەرەك ەكەن عوي» دەگەن سيگنال جەتتى ميىما. مەكتەپتە جۇرگەندە العاشقى ماحابباتىمدى جولىقتىرعام. كەيىننەن از عانا رەنىشكە بولا ەكەۋمىز ەكى ايىرىلىسىپ كەتكەنبىز. سودان بەرىدە سەزىمىمدى سەلت ەتكىزگەن ەشكىم بولماپتى.
كەزدەسۋگە شاقىرعان جىگىتتەرمەن دوستىق قارىم-قاتىناستا بولعانمەن ارىعا بارعان ەمەسپىن. مەنى ۇنەمى «بايدىڭ قىزىن بايلىعىنا بولا الادى» دەگەن وي مازا بەرمەيتىن. اقىرى وسى ويىم شىندىققا اينالدى. قۇربىمنىڭ اعاسىنىڭ دوسى بولاتىن سەرىك دەگەن. سويلەسىپ جۇرگەنىمىزبەن وعان تۇرمىسقا شىعامىن-اۋ دەگەن وي ءۇش ۇيىقتاسام دا تۇسىمە كىرگەن ەمەس.
بۇرىن اندا-ساندا كورىپ قالساق امانداسىپ تۇراتىنبىز. سوڭعى كەزدە سول سەرىك قىر سوڭىمنان قالمايتىن بولدى. ۇيگە دە كەلەدى، قۇربىلارىممەن قىدىرسام دا سول. اقىرى تەلەفونىما تىنىم بەرمەي ءجۇرىپ ول مەنىڭ كوڭىلىمدى جاۋلاپ العانداي بولدى. الدە باۋىر باسىپ كەتتىم بە، ءوزىم دە تۇسىنبەيمىن. ونىڭ ماعان مىنەزى ۇنايتىن. جىبەكتەي ەسىلگەن جۇمساق مىنەزدى-ءتىن.
اقىرى ول ماعان تۇرمىسقا شىق دەپ ۇسىنىس جاساعاندا باس تارتا المادىم. اكەم ەلدىڭ ەسىندە قالارلىقتاي ەتىپ ۇزاتۋ تويىمدى جاسادى. تويعا كەلگەن قۇدالارعا تۋىستارىم توسىرقاي قارادى. اۋىلدا تۇراتىن، كۇنگە كۇيگەن كۇتىمى جوق اتا-اناسى ءۇشىن مەن كىنالى ەمەسپىن عوي. «تەڭىمىز ەمەس ەكەن» دەپ تەپسىنگەن تۋىستارىم دا بولدى. ءبىراق قاتال مىنەزدى اكەمنەن ءبارى اسا العان جوق. اكەم «قىزىمنىڭ ءوز قالاۋى» دەپ ەشكىمدى سويلەتپەدى.
سونىمەن، قىز داۋرەنىممەن قوش ايتىسىپ كەتە باردىم. سەرىكتىڭ تابالدىرىعىن اتتاعاننان-اق بارلىققا دا، بايلىققا دا قوش دەيتىن شىعارمىن دەگەن ەدىم. ويتكەنى شاڭى اسپانعا اتقان اۋىلدا، جاپىرايعان ۇيدە تۇراتىن ولارعا تۋىستارىمنىڭ بارلىعى دا كۇلىپ كەتتى.
«بايلىقتان اسىپ-تاسىعاندا تاپقان قۇداسى وسى ما؟» دەپ بەتىن شىمشىعانداردى دا كوردىم. ءبىراق ءبىرىن دە ەلەمەدىم. اي جارىم وسىندا تۇرعان سوڭ جۇمىسىمدى سىلتاۋراتىپ قالاعا كەتەتىنىمىزدى ايتتىق. بالا-شاعاسى ونسىز دا كوپ اتا-ەنەم بىزدەن قۇتىلعاندارىنا قۋانعان بولۋى كەرەك.
از-ماز ەنشىمىزدى بەرگەنسىپ شىعارىپ سالدى. قالاعا كەلگەن سوڭ ەكى ايداي پاتەر جالداپ تۇردىق. نامىسقوي اكەم وزىمىزگە ساي ەتىپ ادەمىلەپ ءۇي سالىپ بەردى. «كۇيەۋبالام دا ءبىر بالام عوي» دەپ ونىڭ استىنا ماشينە مىنگىزدى. سودان لەزدە-اق جۇرت قاتارىنا قوسىلىپ كەتتىك. ءبىراق مەن ەشقاشاندا كۇيەۋىمە «ءبارى مەنىڭ ارقامدا» دەپ مىندەتسىنگەن ەمەسپىن. ءبىراق جۇرتتىڭ سوزىنە كوپ قۇلاق اساتىن سەرىك ءبىر جولى ءىشىپ كەلىپ: «ەلدىڭ ءبارى كۇشىك كۇيەۋسىڭ دەپ جازعىرادى» دەپ جىلارمان بولعانى بار.
مەن قايتا «قويشى سولاردىڭ ءسوزىن، ەكەۋمىز باقىتتى بولساق بولدى ەمەس پە؟» دەپ جۇباتامىن. كەيدە ەكەۋمىزدىڭ پىكىر قايشىلىعىمىز ءبىلىنىپ قالادى-اق. قالتاسىندا اقشاسى مىش-مىش بولسا دا، سەرىك تارىنبايتىن جەردە تارىنىپ، كورگەنسىزدىگىن كورسەتىپ قويا بەرەدى.
بىرەۋگە كورىمدىك بەرەيىك دەسەم، زورعا دەگەندە مىڭ تەڭگە شىعارادى قالتاسىنان. ۇيالىپ كەتەم. ايەل باسىممەن الدىنا شىعىپ كەتكەنىم جاراماس دەپ كوبىنە ۇندەمەيمىن. سوڭعى كەزدە سەرىك ءجيى ىشەتىندى، ماسىعاتىندى شىعاردى. ولاي دەيتىن سەبەبىم ءبىر جولى «مەن سەنى بايلىعىڭا بولا العانمىن» دەپ اشىق ايتتى. ەستىگىم كەلمەگەن ءسوزىم وسى ەدى. ارامىزدا ىستىق سەزىم بار دەپ جۇرگەن مەن بىردەن سۋىنىپ كەتتىم. ءتىلىم بايلاۋلى. ويتكەنى اياعىم اۋىرلاپ قالعان. ءوز قالاۋىم، كىمگە بارىپ سىرىمدى ايتىپ جىلايمىن. ءبارى دە ىشىمدە. ونىسى ازداي ەندى «مەن سەنى لوتەرەيادان ۇتىپ العام» دەپ ميىمدى جەيتىندى شىعاردى. لوتەرەياسى مەنىڭ بايلىعىم دا. نە ىستەيمىن؟ تەڭ تەڭىمەن دەگەن راس ەكەن...
اۆتور: ايناگۇل، اتىراۋ
«الاش ايناسى»
