بۇگىن قىزدار ۋنيۆەرسيتەتىندە رەسپۋبليكالىق اقىندار ايتىسى وتەدى
ايتۋلى شارالاردىڭ ماقساتى - قازاق قىزىنا دەگەن قۇرمەتتى، جاۋاپكەرشىلىكتى كوتەرۋ، ۇلتتىق مادەنيەت پەن رۋحاني قۇندىلىق مارتەبەسىن ارتتىرۋ، ۇلت اناسىنا، ۇرپاق تاربيەشىلەرىنە، انا- ۇستازدارعا، قىز- كەلىنشەكتەرگە دەگەن ءىلتيپاتتى كەڭىنەن ناسيحاتتاۋ، قىزدار ۋنيۆەرسيتەتىنىڭ 70 جىلدا جەتكەن جەتىستىكتەرىن پاش ەتۋ.
ەسكە سالا كەتەيىك، جىر دوداسى وسىدان ەكى اي بۇرىن جاريالانعان بولاتىن. وسى ۋاقىت ارالىعىندا قىزدار ۋنيۆەرسيتەتى قورجىنىنا ەلىمىزدىڭ تۇكپىر- تۇرپىرىنەن 70 كە جۋىق حات كەلىپ ءتۇستى. شىعارماشىل جاندار باس قوساتىن كەزدەسۋدە ءمۇشايرا جەڭىمپازدارى انىقتالىپ، ماراپاتتالاتىن بولادى. وعان قاتىسۋشىلاردىڭ ۇزدىك دەپ تانىلعان ولەڭدەرى ۇيىمداستىرۋشىلاردىڭ قولداۋىمەن الداعى ۋاقىتتا ارنايى جيناق بولىپ باسىپ شىعارىلادى.
سونداي- اق قىزدار ۋنيۆەرسيتەتىنىڭ 70 جىلدىق مەرەكەسىنە وراي وقۋ ورنىمەن تىعىز بايلانىس ورناتقان، ۋنيۆەرسيتەتتىڭ وقۋ ۇدەرىسى مەن تاربيەلىك جۇمىستارىن ناسيحاتتاۋعا اتسالىسقان ب ا ق باسشىلارى مەن وكىلدەرىن ماراپاتتاۋ ءراسىمى وتەدى.
مەرەكە تۇستەن كەيىن اقىندار ايتىسىنا ۇلاسادى. جىر دوداسىنا ەلىمىزگە تانىمال ايتىسكەرلەر بالعىنبەك يماشيەۆ (استانا قالاسى) ، اينۇر تۇرسىنبايەۆا (استانا قالاسى) ، نۇرلان جۇمابەك (جامبىل وبلىسى) ، اياۋلىم جۇمابەك قىزى (الماتى وبلىسى) ، جاقسىلىق ورىنباسار (استانا قالاسى) ، سارا توقتامىسوۆا (استانا قالاسى) ، فارحات مارات ۇلى (الماتى قالاسى) ، زۋرا شايدىمۇرات (قىتاي حالىق رەسپۋبليكاسى) ، سىرىم اۋەزحان (استانا قالاسى) ، ارزىگۇل قايىڭبەك قىزى (الماتى قالاسى، قازمەم قىز پ ۋ دايىندىق ءبولىمى) ، اسپانبەك شۇعاتايەۆ (پاۆلودار) ، ايساۋلە بەيسەنحان (استانا قالاسى) قاتىسادى.
ايتىسكەرلەردىڭ تالانتى مەن شەبەرلىگىن «اتامۇرا» كورپوراتسياسىنىڭ پرەزيدەنتى، قازاقستاننىڭ ەڭبەك سىڭىرگەن قايراتكەرى، فيلوسوفيا عىلىمدارىنىڭ كانديداتى، قازمەم قىز پ ۋ- دىڭ قۇرمەتتى پروفەسسورى راقىمعالي ابرار ۇلى قۇل- مۇحاممەد، مەملەكەتتىك «دارىن» جاستار سىيلىعىنىڭ يەگەرى، قازاقستان جازۋشىلار جانە جۋرناليستەر وداعىنىڭ مۇشەسى، رەسپۋبليكالىق «زاڭ» گازەتىنىڭ باس رەداكتورى بەكجان اشىربايەۆ، قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ پروفەسسورى، اقىن رىسباي ساتىمبەكوۆ، «قىزدار ۋنيۆەرسيتەتى» باسپاسىنىڭ ديرەكتورى، قازاقستان جازۋشىلار وداعىنىڭ مۇشەسى، ق ر مادەنيەت قايراتكەرى سەرىك قاليەۆ باعالايتىن بولادى. ءادىلقازىلار القاسىنىڭ ءتوراعاسى - رەسپۋبليكالىق كىتاپ مۇراجايىنىڭ ديرەكتورى، قازاقستاننىڭ ەڭبەك سىڭىرگەن قايراتكەرى، ايتىس اقىندارى مەن جىرشى- تەرمەشىلەردىڭ حالىقارالىق وداعىنىڭ ءتوراعاسى، م. ماقاتايەۆ اتىنداعى سىيلىقتىڭ ەكى مارتە يەگەرى ءجۇرسىن ەرمان.
