الماتى مەتروسىندا جەراستى مۇراجايى اشىلدى

جولاۋشىلار نازارىنا تەاتر قورىندا ساقتالىپ كەلگەن ساحنالىق كوستيۋمدەر، تەاتر افيشالارى، فوتو سۋرەتتەر ۇسىنىلدى. سونىمەن قاتار، جولاۋشىلار ومىردەن ءوتىپ كەتكەن ساحنا ساڭلاقتارىنىڭ زاتتارىن ۇستاپ كورىپ، رۋحاني ازىق الۋدا. قازىرگە دەيىن ساپار شەگىپ بارا جاتقان 200 گە تارتا جولاۋشى كورمەنى تاماشالاپ شىقتى. قىزىعۋشىلىق بىلدىرگەندەردىڭ اراسىندا كورەيادان كەلگەن مەيماندار دا، شالعايدان كەلگەن اۋىل تۇرعىندارى دا بار.

«بۇل ءبىزدىڭ ۇيىمعا حابارلاسقان جاستاردىڭ پىكىرىنەن تۋىنداعان يدەيا. جاستارىمىز اسەم دە كەڭ مەترو ستانسالارىنىڭ بوس تۇرماي، حالىقتىڭ رۋحاني بايۋىنا سەپتىگىن تيگىزۋىن قالادى. وسى ويمەن ق ر مادەنيەت جانە سپورت مينيسترلىگىنە شىقتىق. مينيسترلىك تاراپىنان كەڭىنەن قولداۋ تاپقان يدەيامىزدى تەاتر باسشىلارى دا قۋانا قۇپ الدى»، - دەدى «قالامگەر ازامات» جاس جۋرناليستەر قورىنىڭ جەتەكشىسى ازامات قىرىقپايەۆ.

مەترو جولاۋشىلارى ءبىر اپتا بويى تەاتر ونەرىمەن ەتەنە تانىساتىن بولادى.

ال، بولاشاقتا جەراستى ستانسالارىندا سپەكتاكلدەردەن ءۇزىندى قويۋ جوسپارلانىپ وتىر.

«كەلەسى جىلى ناۋرىز مەرەكەسىنە وراي مەترودا الماتىداعى 4 تەاتردىڭ شىعارماشىلىق ۇجىمدارى سپەكتاكلدەردەن ءۇزىندى قوياتىن بولادى. اباي اتىنداعى وپەرا جانە بالەت تەاترىنىڭ ارتىستەرى اريالاردان ءۇزىندى ورىندايتىن بولادى. مەنىڭ ويىمشا، مەترونى حالىق يگىلىگىنە وسىلاي دا جاراتۋعا بولادى»، - دەدى ا. قىرىقپايەۆ.

اۆتور: گۇلميرا عوسمانالي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى