تۇڭعىش رەت قۇربان ايتتىڭ قۇرمەتىنە رۋحاني كەش وتەدى
«بيىلعى قۇربان ايت مەيرامى ۇلتتىق ناقىشتا وتەدى. باس ءمۇفتي ەرجان قاجى مالعاجى ۇلىنىڭ باستاماسىمەن وبلىس، اۋدان ورتالىقتارى مەن قالالارداعى مەشىت اۋلالارىندا كيىز ۇيلەر تىگىلىپ، مۇمكىندىگى شەكتەۋلى جاندار ءۇشىن ارنايى داستارحان جايىلادى. قازاقتىڭ ۇلتتىق سپورت تۇرلەرى - ارقان تارتىس، قازاقشا كۇرەس، گىر تاسىن كوتەرۋ، اسىق ويىنى، بەلتەمىرگە تارتىنۋدان سايىستار وتكىزىلەدى»، - دەدى ا. سىدىقوۆ.
سونداي-اق، كەلۋشىلەرگە ىڭعايلى بولۋى ءۇشىن مەشىت اۋلاسىندا بالالارعا ارنالعان ارنايى ويىن الاڭدارى جۇمىس ىستەمەك. رەسپۋبليكا بويىنشا جەتىم بۇلدىرشىندەر مەن مۇگەدەكتەرگە مەرەكەلىك باعدارلامالار ازىرلەنۋدە.
الماتىداعى م. اۋەزوۆ اتىنداعى قازاق مەملەكەتتىك اكادەميالىق دراما تەاترىندا قۇربان ايتتىڭ قۇرمەتىنە تۇڭعىش رەت رۋحاني كەش وتەدى. كەشتە رۋحاني ساحنالىق قويىلىمدار كورسەتىلىپ، ءدىني اندەر مەن تەرمەلەر ورىندالادى دەپ جوسپارلانۋدا.
اۆتور: گۇلميرا ءعوسمانالي
