استانادا تۇركيا ازاماتى اسحانادا ىستىق شاي ءۇشىن توبەلەس شىعاردى

11- قىركۇيەكتە ساعات 12:20-دا استانا قالاسىنىڭ ءى ءى د-نە «نازاربايەۆ ۋنيۆەرسيتەتى» قۇرىلىس نىسانىنىڭ جۇمىسشىلارى مەن اسحانا قىزمەتكەرلەرى، اتاپ ايتقاندا تۇركيا جانە قازاقستان ازاماتتارى اراسىندا توبەلەس شىققانى تۋرالى حابار كەلىپ تۇسكەن.

«وقيعا ورنىنا استانا قالاسىنىڭ پروكۋرورى م. جورگەنبايەۆ پەن قالالىق ءى ءى د باستىعى ا. اۋباكىروۆ باردى. كەيىن بەلگىلى بولعانداي، قۇرىلىس نىسانىنىڭ جۇمىسشىسى تۇركيا ازاماتى اسحانا قىزمەتكەرىنە ىستىق شايدىڭ بولماۋى مەن تاعامنىڭ ساپاسىنا قاتىستى سىن ايتقان. كەيىن ولار جانجالداسىپ، سوڭى توبەلەسكە ۇلاسقان»، دەلىنگەن حابارلامادا.

ۆەدومستۆو اقپاراتىنشا، قالا پروكۋرورى وسى جەردە جۇزدەسۋ ۇيىمداستىرىپ، وندا قۇرىلىس نىسانىنىڭ اكىمشىلىگى مەن جۇمىسشىلارى ىستىق شايدىڭ جوقتىعىن ايتىپ، تاعام ساپاسىنا قاتىستى نارازىلىقتارىن بىلدىرگەن.

«ناتيجەسىندە اسحاناعا ىستىق شاي قايناتاتىن تەرموشاينەكتەر ورناتىلدى. استانا قالالىق سانيتارلىق-ەپيدەميولوگيالىق قىزمەتى اسحانا تاعامدارىنان سىناما الدى، ونىڭ سانيتارلىق نورماعا سايكەستىگىن تەكسەرەدى. اكىمشىلىك تاعام ساپاسىن ارتتىرۋعا ۋادە بەردى»، دەلىنگەن حابارلامادا.

جانجال تۋدىرعان تۇلعالارعا قاتىستى قالالىق ءى ءى د تەرگەۋ امالدارىن جۇرگىزۋدە.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى