جۇمباق ولىمگە كىنالى كىم؟
جۋىردا پاۆلودار - شارباقتى تاسجولىنىڭ 35-شاقىرىمىندا دالا ءورتى بولعان.
ءتىلسىز جاۋدى اۋىزدىقتاۋ كەزىندە ءورت سوندىرۋشىلەر جالىن اراسىنان ايەلدىڭ ءمايىتىن تاۋىپ الادى.
پوليتسەيلەر وقيعا ورنىنا جەدەل جەتىپ، كوپ ۇزاماي مارقۇمنىڭ كىم ەكەنىن انىقتادى. پاۆلوداردىڭ 57 جاستاعى تۇرعىنى ەكى اپتا بۇرىن حابار-وشارسىز كەتكەن ەكەن. تەرگەۋشىلەر ءمايىتتىڭ سول جەردە بىرنەشە كۇن جاتىپ قالعانىن ايتادى.
قىلمىسقا قاتىسى بار دەگەن كۇدىكپەن ءبىر ازامات ۇستالدى. مامانداردىڭ پايىمداۋىنشا، قاپىدا پايدا بولعان ءورت قىلمىستىڭ ءىزىن جاسىرۋ ءۇشىن ادەيى جاسالعان بولۋى مۇمكىن.
قازىر كۇدىكتى قاماۋدا.
الما مۇسابەكوۆا، پاۆلودار وبلىستىق ءى ءى د باسپا ءسوز قىزمەتىنىڭ باس مامانى:
- قازىر بۇل وقيعا بويىنشا قىلمىستىق ءىس قوزعالدى. اتالعان وقيعاعا قاتىسى بار دەگەن كۇدىكپەن پاۆلودار قالاسىنىڭ 37 جاستاعى تۇرعىنى قولعا ءتۇستى. سوت شەشىمىمەن ول قاماۋعا الىندى. ەندى وعان قاتىستى قازاقستان رەسپۋبليكاسى قىلمىستىق كودەكسىنىڭ 96-بابى، كىسى ءولتىرۋ دەرەگى بويىنشا، ءىس جۇرگىزىلەدى.
24.kz
