ەلوردادا جەدەل اۆتوبۋس جەلىسىنىڭ قۇرىلىسى باستالىپ كەتتى
قالا كوشەلەرىندە ارنايى بولىنگەن جولاقتار ارقىلى جۇرەتىن قوعامدىق كولىك 2016 - جىلدىڭ ەكىنشى جارتىسىندا پايدالانۋعا بەرىلەدى.
حالىقارالىق اۋەجايدان باستالىپ، جاڭا تەمىرجول ۆوكزالىنا دەيىن ۇلاساتىن باعىت 22 شاقىرىمدى قۇرايدى. حالقىنىڭ سانى 800 مىڭنان اساتىن ەلوردا تۇرعىندارىنىڭ باسىم بولىگى قوعامدىق كولىكتى پايدالانادى.
باس قالاعا كەلۋشىلەردىڭ ارتۋىنا بايلانىستى بۇل كورسەتكىش كۇن ساناپ جوعارىلاۋدا. وسىعان وراي قالا كوشەلەرىندە ارنايى بولىنگەن جولاقتار ارقىلى جەدەل اۆتوبۋستار جەلىسى جۇرەدى. 2016 - جىلى فرانسيادان زاماناۋي 27 اۆتوبۋس جەتكىزىلمەك.
باستاپقى 22 شاقىرىم حالىقارالىق اۋەجايدان جاڭا تەمىرجول ۆوكزالىنا دەيىن جالعاسىپ، قابانباي باتىر داڭعىلى، EXPO-2017 قالاشىعى مەن سىعاناق كوشەسى ارقىلى وتەدى.
سونىمەن قاتار زامان تالابىنا ساي جولاقى تولەۋدىڭ ەلەكتروندى جۇيەسى ەنگىزىلەدى. ارنايى پلاستيك جانە قاعاز كارتوچكالار قالامىزدىڭ كەز كەلگەن بۇرىشىندا ساتىلادى. ال جولاقى قۇنى ايالدامالاردىڭ سانىنا بايلانىستى بەلگىلەنەدى.
وسىعان بايلانىستى قازىرگى كەزدە قوعامدىق كولىك قىزمەتكەرلەرىنىڭ بىلىكتىلىگىن ارتتىرۋ جۇمىستارى جۇرگىزىلۋدە. جۇرگىزۋشىلەر جەدەل اۆتوبۋستىڭ قىر-سىرىن مەڭگەرسە، كوندۋكتورلار تولەم جۇيەسىنىڭ ەرەكشەلىكتەرىن ۇيرەنىپ جاتىر.
مامانداردىڭ ايتۋىنشا، ەشبىر ازامات جۇمىسسىز قالمايدى. ەلەكتروندى جۇيە ەنگىزىلىسىمەن، ولار قاداعالاۋشى ينسپەكتورلار اتانادى. العاشقى كەزەڭدە جەدەل اۆتوبۋس جەلىسى بويىنشا 18 ستانسا سالىنادى. ال جالپى 63 شاقىرىمعا جەتەتىن جولدىڭ قۇرىلىسى 2019 - جىلى اياقتالماق.
24.kz
