پاۆلودارلىقتار ومبىداعى قازاق دياسپوراسى وكىلدەرىنىڭ انا ءتىلىن مەڭگەرۋىنە جاردەمدەسپەك
ءوز سوزىندە ءوڭىر باسشىسى قازاق دياسپوراسىنىڭ انا ءتىلىن مەڭگەرۋلەرىنە پاۆلودارلىقتاردىڭ كومەك تيگىزە الاتىنىن تىلگە تيەك ەتتى.
«بۇگىندە ومبىدا 83 مىڭنان استام قازاق ۇلتىنىڭ وكىلدەرى تۇرادى. ونىڭ 20 مىڭى - بالالار. جاستاردىڭ تۋعان ءتىلىن مەڭگەرۋىنە، قازاق حالقىنىڭ سالت-داستۇرىمەن تانىسۋىنا جاردەمدەسكىمىز كەلەدى. ءار قازاق تۋعان ءتىلىن ءبىلىپ، بابالار تاريحىنان حاباردار بولۋى ءتيىس. بۇل باعىتتا ءبىز وقۋلىقتارمەن، ادىستەمەلىك قۇرالدارمەن قولداۋ كورسەتە الامىز»، - دەدى ق. بوزىمبايەۆ.
كەزدەسۋدە اكىم اتالمىش ءوڭىردىڭ وقۋشىلارىنا قازاق تىلىندەگى كىتاپتاردى سىيعا تارتتى.
سونداي-اق پاۆلودارلىقتار ومبى وبلىسىنداعى مەشىتتەردىڭ يمامدارىنىڭ وقۋىنا سەپتەسپەك. مۇنداي ءوتىنىشتى كيروۆ مەشىتىنىڭ يمامى كيپيدەن شامشۋاليەۆ بىلدىرگەن.
«بۇعان ەش كەدەرگى جوق، تەك ۋاقىت كەرەك. - ەكونوميكا دامىپ جاتىر جانە ەكى ءوڭىر اراسىنداعى الەۋمەتتىك-مادەني بايلانىستار نىعايۋدا. بۇل ماسەلەنى گۋبەرناتورمەن تالقىلايمىز. يمامداردى پاۆلودار مەدرەسەسىندە دايىنداۋعا بولادى»، - دەپ اتاپ ءوتتى اكىم.
