استانادا سابانتوي وتەدى

19-21 - قىركۇيەك ارالىعىندا تاتارستان رەسپۋبليكاسىنىڭ استاناداعى كۇندەرى وتەدى. وسىعان وراي ەلورداعا رەسمي تۇلعالار، ىسكەرلىك جانە ءبىلىم بەرۋ سالالارىنىڭ وكىلدەرى باستاعان تاتارستان دەلەگاتسياسى كەلەدى. ولار قالانىڭ ءوندىرىس ورىندارىن ارالاپ، بيزنەس- فورۋم جۇمىسىنا قاتىسادى. سونداي- اق قوناقتار قازاقستاننىڭ تاتار دياسپوراسى وكىلدەرىمەن كەزدەسەدى.

شارا اياسىندا بەيبىتشىلىك جانە كەلىسىم سارايىندا تاتارستان ونەر شەبەرلەرىنىڭ قاتىسۋىمەن گالا- كونسەرت وتەدى. سونىمەن قاتار فوتوكورمە مەن ۇلتتىق قولونەر شەبەرلەرىنىڭ كورمەسى ۇيىمداستىرىلادى.

 تاتارستان رەسپۋبليكاسىنىڭ استاناداعى كۇندەرى اياسىندا تاتارلاردىڭ ۇلتتىق مەيرامى سابانتوي تويلانىپ، تاتارستاننىڭ وندىرىستىك جانە اۋىلشارۋاشىلىق الەۋەتىن كورسەتەتىن كورمەگە ۇلاسادى. مەرەكە كەزىندە كۇرەستەن جوعارى سالماقتاعى قازاقستان چەمپيوناتى مەن قازاقستان، تاتارستان كوماندالارى اراسىنداعى ماتچتىق كەزدەسۋ وتەدى. كۇرەستە جاۋىرىنى جەرگە تيمەگەن جەڭىمپاز پالۋان تەمىر تۇلپاردى تىزگىندەيدى.

شارا بارىسىندا حالىقتىق ويىنداردىڭ 13 تۇرىنەن جارىستار ۇيىمداستىرىلادى، دەپ حابارلانعان ەلوردا اكىمدىگىنىڭ رەسمي سايتىندا.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى