قىمىز بەن ءشۇبات تۋرالى زاڭ كەرەك - ق. ايتاحان ۇلى
«قىمىز بەن ءشۇبات - حالقىمىزدىڭ بايىرعى سۋسىنى. عاسىرلار بويى قاسيەتتى جىلقى مەن تۇيە مالىن اسىراۋ، قىمىز بەن ءشۇبات دايىنداۋ جونىنەن حالقىمىزدا باي تاجىريبە قالىپتاسقان. ۇلتتىق سۋسىن دەنساۋلىققا اسا پايدالى: تۋبەركۋلەز، باۋىر، اسقازان، جۇيكە جانە يممۋندىق جۇيەلەردىڭ، جۇرەك جانە قان- تامىرلارىنىڭ دەرتىنە داۋا. وكىنىشكە قاراي، كەشەگى كەڭەس ۇكىمەتىنىڭ تۇسىندا جىلقى مەن تۇيەگە، ولاردان الىناتىن ونىمگە جاسالعان قيانات پەن سولاقاي ساياساتتىڭ سالدارىنان قىمىز بەن ءشۇبات ءوندىرۋ ءىسى باسەڭدەپ، ۇمىت بولا جازدادى» ، - دەيدى سەناتور قۋانىش ايتاحان ۇلى.
بۇل رەتتە دەپۋتات ەگەمەن ەل بولىپ وتىرعاندا اتا- بابادان قالعان كاسىپكە باسىمدىق بەرۋدىڭ ماڭىزدىلىعىن اتاپ ءوتتى. ونىڭ ايتۋىنشا، بۇگىندە قىمىز بەن ءشۇباتتى ۇلتتىق برەندكە اينالدىرۋعا مول مۇمكىندىك بار.
سونىمەن قاتار دەپۋتات كەزىندە ەلىمىزدە وكپە اۋرۋلارىن تەك قىمىزبەن ەمدەيتىن 15 شيپاجاي بولعانىن، الايدا ۇكىمەت تاراپىنان قولداۋ بولماعاندىقتان، ولاردىڭ جۇمىسى توقتاپ قالعانىن اتاپ ءوتتى. ال كورشىلەس رەسەيدە قىمىز وندىرەتىن 80 نەن استام اگروفيرما، قىمىزبەن ەمدەيتىن 48 شيپاجاي جۇمىس ىستەيدى. سونىمەن قاتار رەسەي عالىمدارى بيە سۇتىندە بولاتىن لاكتوفەررين اقۋىزىنان قاتەرلى ىسىكتى ەمدەيتىن ءدارى جاساپ جاتىر. ال جاپونيا مەن باتىس ەلدەرى قىمىز بەن ءشۇباتقا ەرەكشە قىزىعۋشىلىق تانىتا باستاعان.
«اتا- بابامىزدىڭ اماناتىنا ادالدىق تانىتىپ، ارداقتاعان اسىن، سۇيسىنە ىشكەن سۋسىنىن ۇلتتىق برەندكە اينالدىرۋ ءۇشىن قىمىز بەن ءشۇبات تۋرالى زاڭ قابىلدانۋى كەرەك. وندا بۇل سۋسىنداردى كلاسسيكالىق دايىنداۋ ۇلگىلەرى، سۇتكە قويىلاتىن تالاپتار، ستاندارتتار، فيزيكا- حيميالىق جانە ءيىس پەن دامدىك قاسيەتتەرى، ساقتىق شارالارى جازىلۋى ءتيىس» ، - دەيدى سەناتور قۋانىش ايتاحان ۇلى.
بۇدان بولەك، سەناتور قىمىز بەن شۇبات وندىرەتىن فەرمالاردى ىنتالاندىرۋ ءۇشىن زاڭنامادا جەڭىلدىكتەر قابىلدانۋى كەرەكتىگىن دە اتاپ ءوتتى.
«ەلىمىزدە قىمىز بەن ءشۇبات ءوندىرۋ ءىسىن مەملەكەتتىك دەڭگەيدە قولعا الىپ دامىتساق، بۇل ەلباسىمىز ايتقان ەكونوميكانى ءارتاراپتاندىرۋدىڭ كورىنىسى بولماق. قىمىز بەن ءشۇبات تۋرالى زاڭدى قابىلداۋ ارقىلى اتا- بابالارىمىزدىڭ اماناتىن اقتاپ، ءومىردىڭ ءنارى بولعان سۋسىننىڭ ساپاسىن ساقتاپ، كەلەر ۇرپاققا ماقتانىشپەن تاپسىرعان بولار ەدىك» ، - دەيدى ق. ايتاحان ۇلى.
اۆتور: قانات مامەتقازى ۇلى
