مۇناي قالدىقتارىنان كەمە وتىنىن وندىرەتىن كاسىپورىن ىسكە قوسىلدى
ماڭعىستاۋ وبلىسىنىڭ اۋماعىندا قازىر شامامەن 2,5 ميلليون تونناداي مۇناي قالدىعى جاتىر. ونىڭ ءبىرازى جاڭاوزەن قالاسىنىڭ اينالاسىنا توگىلگەن. بۇل قورشاعان ورتاعا قاۋىپ ءتوندىرىپ، اۋانى لاستاۋدا. جاڭا اشىلعان كاسىپورىن وسى ماسەلەنى شەشۋدى كوزدەيدى. زاۋىت ازىرگە جىلىنا 100 مىڭ توننا قالدىق وڭدەۋگە قاۋقارلى. «تاپسىرىس مولايسا، ءوندىرىس قۋاتىن ارتتىراتىن بولامىز» ، - دەيدى كاسىپورىن باسشىسى. مۇندا جەردە جاتقان قارا التىن قالدىقتارىنان ءۇش بىردەي ءونىم الىنادى.
- بۇل جەردە قولىمداعىداي مۇناي قالدىقتارىنان كادىمگى قۇم مەن مىناداي مايلى سۋدى ەكىگە ايىرىپ الادى. بۇل قۇم زاۋىتتان شىققان العاشقى ءونىم بولىپ تابىلادى. قۇمدى جول قۇرىلىسى مەن قۇرىلىس سالاسىنا پايدالانادى. ال مىنا مايلى سۋدان ەكىنشى ءونىم الۋ ءۇشىن كەلەسى سەحقا جىبەرىلەدى.
الپامىس جۇمابايەۆ، مۇناي قالدىقتارىن وڭدەۋ زاۋىتىنىڭ باس ينجەنەرى:
- مىنا مورپورتتان، مۇنايشىلاردان مايلى سۋدى قابىلداپ، كەلگەن سۋلار وسىنداي بولىپ كەلەدى، ول سەپاراتوردان وتكەننەن كەيىن وسىنداي تەحنيكالىق سۋ شىعادى. ماڭعىستاۋدا سۋ تاپشى، تەحنيكالىق سۋ اسا قاجەت. ونى وندىرىسكە جانە قۇرىلىسقا قولدانامىز.
مۇناي قالدىعىنان شىعارىلاتىن سوڭعى ءونىم - كەمەلەرگە قاجەتتى جانارماي. قازىر تاۋلىگىنە 30-40 تەكشە مەتردەي سۇيىق وتىن شىعارىلۋدا. جۋىردا ماماندار زاۋىت ءونىمىنىڭ حالىقارالىق تالاپتارعا ساي ەكەندىگىن راستايتىن قۇجات بەرىپتى.
اسقار سۋحانبەرديەۆ، مۇناي قالدىقتارىن وڭدەۋ زاۋىتىنىڭ باس ديرەكتورى:
- قازاقستاندا كەمە وتىنىن وندىرەتىن زاۋىت جوق. سوندىقتان دا ەلىمىزدىڭ كوك تۋىن جەلبىرەتىپ جۇرگەن كەمەلەرىمىزدىڭ بارلىعى قاجەتتى وتىندى وزگە ەلدەردەن ساتىپ الادى. ءبىز وتاندىق كەمەلەردى سۇيىق وتىنمەن قامتۋ ءۇشىن «قازاق تەڭىز كولىك فلوتى» كومپانياسىمەن كەلىسىم جاساۋدى كوزدەپ وتىرمىز. وسىلايشا تەڭىز جاعالارىنا سۋ كولىكتەرىنە ارنالعان جانار- جاعارماي بەكەتتەرىن سالساق پا دەيمىز. كەدەن وداعى اياسىندا جۇمىس ىستەۋ دە جوسپاردا بار.
جاڭا كاسىپورىننىڭ تاعى ءبىر ەرەكشەلىگى، جىلجىمالى كەشەننەن تۇرادى. كەز- كەلگەن مۇناي قالدىعى جاتقان جەرگە بارىپ، ونى وڭدەۋگە ىڭعايلى. كاسىپورىنعا قاجەتتى قۋات كوزىن دە وندىرىلگەن وتىننان الادى ەكەن. باسشىلىق ەكولوگيالىق تازا ءارى ۇنەمدى جوبانى «ەكسپو-2017» كورمەسىنە ۇسىنۋدى جوسپارلاپ وتىر.
