قازاقستاندا «قۇبىلايحان» سەريالى ەڭ كوپ كورەرمەن جيىپ وتىر

ەپيكالىق دراما سيۋجەتى بىرنەشە ون جىلدىقتى قامتيدى جانە موڭعولداردىڭ ۇلى ديناستياسى يۋاننىڭ، ودان كەيىن ۇلى قىتاي يمپەرياسىنىڭ قۇرىلۋىنا سەبەپ بولعان وقيعالار تۋرالى باياندايدى.

 50 سەريادان تۇراتىن تاريحي تۋىندى - قىتاي ەلىندە ۇلكەن تابىسقا جەتكەن قىمبات جوبالاردىڭ ءبىرى. تەلەحيكايا گونكونگ، تايلاند، مالايزيا، كورەيا، تايۆان، ۆەتنام، ا ق ش، كانادا ەلدەرىندە دە ۇلكەن قىزىعۋشىلىقپەن كورسەتىلگەن. بيۋدجەتى - 250 ميلليون ا ق ش دوللارى. 5 مىڭعا جۋىق اكتەر وينايدى. ءتۇسىرىلىم جۇمىستارىنا 5 مىڭعا جۋىق ات قاتىستىرىلعان. قويۋشى رەجيسسەرى - تسۋي سيۋ مين. سسەناري جەلىسى موڭعول يمپەرياسى باسشىلارىنىڭ ومىرىنەن قىزىقتى، تارتىمدى جانە اسەرلى كورىنىستەرگە تولى.

ماسەلەن، موڭكە موڭعولداردىڭ حانى اتانعان كەزدە قۇبىلايحان قىتايدى جاۋلاپ الۋعا بەل بۋادى. تاريحتان بىزگە بەلگىلى بولعانداي، شىڭعىس حاننىڭ ولىمىنەن كەيىن ونىڭ تولە جانە ۇگەدەي اتتى ۇلدارى بيلىككە تالاسا باستايدى. ۇگەدەي حان بولعانىمەن، ونىڭ ايەلى تورەگىن ۋايىمنان كوز اشپايدى. سەبەبى ۇلى شىڭعىس حان كوزى تىرىسىندە نەمەرەلەرىنىڭ ىشىندە تولەنىڭ ۇلى قۇبىلايعا ەرەكشە سەنىم ارتقان. تورەگىن كۇيەۋىنىڭ اعاسىنا ۋ بەرىپ ولتىرگەنىمەن قويماي، اكەسىنىڭ ءولىمى ءۇشىن كەك العىسى كەلگەن موڭكە مەن قۇبىلايدى كوتەرىلىس ۇيىمداستىردى دەپ ايىپتايدى. الايدا قۇبىلايدىڭ ەرەكشە قىراعىلىعى مەن اناسى سورگەگتەنيدىڭ دانىشپاندىعىنىڭ ارقاسىندا تولە ۇرپاقتارى امان قالادى. قۇبىلاي شىڭعىس حاننان كەيىنگى موڭعولداردىڭ بەسىنشى جانە سوڭعى اتاقتى يمپەراتورى اتانادى.

كوپتەگەن موڭعول باسشىلارىنا قاراعاندا قۇبىلاي تەك اتپەن عانا سوعىسىپ قويماي، باسىپ العان جەرگە يەلىك ەتۋ ءۇشىن ءبىر توپ سەنىمدى قىتايدىڭ كونفۋتسيلىك كەڭەسشىلەرىن ءوز قاراماعىندا ۇستايتىن بولعان. ول كوپتەگەن قىتاي عالىمدارىنا جاي عانا جۇمىس بەرىپ قويماي، ولارمەن دوس بولا بىلگەن. سونداي- اق قىتايدىڭ ورتالىق جازىعىن باسقارۋ ءۇشىن مەملەكەتتىك قىزمەت جۇيەسىن دە قابىلدادى. سوندىقتان دا ونى سەتسەن حان، ياعني دانىشپان حان دەپ اتاعان.

ءوزى بيلىك ەتىپ تۇرعان كەزدە قۇبىلاي قىتايدا كەڭىنەن تانىمال بولعان. الايدا موڭعول كونسەرۆاتورلارى ونىڭ قىتاي مادەنيەتىنە دەگەن قىزىعۋشىلىعىنا نارازى بولاتىن. كەيبىر جالاقورلار ونىڭ اعاسى موڭكەگە «قۇبىلاي كوپتەگەن قىتايلىقتاردىڭ جۇرەگىن جاۋلاپ، موڭعول يمپەرياسىنا قاۋىپ تۋدىرىپ، مول بايلىققا كەنەلگەن» دەگەن الىپقاشپا اڭگىمەلەر ايتا باستايدى. ءدال وسى تۇرعىدان تەلەحيكايادا اۋلەتتىڭ ىشىندەگى ۇلكەن جانجال باستاۋ الىپ، اعايىندى ەكى باۋىر اراسىندا تالاس باستالادى. الايدا اقىل جەڭىپ، اعايىندىلاردىڭ باسى قايتا بىرىگەدى. ناتيجەسىندە، دانا باسشى قۇبىلايحان بارلىق قىتايدى قولاستىنا بىرىكتىرىپ، قازىرگى بەيجىڭ ورنىندا استاناسىن جاريالاپ، كورشى پاتشالىقتاردى دا وزىنە باعىندىرادى.

 ءدال وسى تەلەحيكايا قۇبىلايحاننىڭ جاقىنى بولعان، اكەسىنىڭ ورنىن باسۋعا تالپىنعان بۇلىكشىلەردى باسقارعان ۇلىنا قارسى كۇرەسكە ۆەنەتسيادان جاس ماركو پولو كەلگەن كەزدەگى، باتىس پەن شىعىس اراسىنداعى العاشقى قاتىناستاردىڭ قالىپتاسۋى تۋرالى باياندايدى. ماركو پولو كەيىننەن يۋان يمپەرياسىنىڭ ءومىرىنىڭ سيپاتتاماسىن قالدىرعان. ماركو پولونىڭ بايانداۋىنىڭ اسەرىنەن قۇبىلايحان باتىستاعى ەرەكشە تانىمال تاريحي تۇلعاعا اينالىپ، ونىڭ اتى جاڭادان تانىلا باستادى.

سونىمەن، درامالىق وقيعالارعا، ساراي ىشىندەگى شىتىرمان وقيعالار مەن زۇلىم نيەتتەرگە، تاق پەن جاڭا جەرلەرگە يەلىك ەتۋ ءۇشىن كەسكىلەسكەن ۇرىس پەن تارتىسقا نەگىزدەلگەن الەمدىك بەستسەللەردىڭ قازاقستانداعى پرەمەراسى ءساتتى باستالعان. «قازاقستان» تەلەراديوكورپوراتسياسىنىڭ باسپاءسوز قىزمەتىنىڭ مالىمەتىنە سۇيەنسەك، «قۇبىلايحان» سەريالى بۇگىنگى تاڭدا ەڭ كوپ كورەرمەن جيناعان تەلەحيكايالاردىڭ الدىڭعى قاتارىنا شىعىپ وتىر.

بايداۋلەت قانشايىم

«ايقىن» گازەتى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى