ءانشىنىڭ جۋرناليستىك جۇمىستى اتقارعانىن قالامايمىن - روزا رىمبايەۆا

تۇڭعىش كاسىبي مۋزىكالىق تەلەارنانىڭ جۇمىسى مەن باعدارلامالىق فورماتى جونىندە تەلەارنا پروديۋسسەرلەرى ايتىپ بەردى.

ولاردىڭ ايتۋىنشا، جاڭا ارنا تەك وتاندىق مۋزىكانى، وتاندىق ورىنداۋشىلار مەن سازگەرلەردىڭ جۇمىسىن ناسيحاتتايتىن بولادى.

«ارنادا تەك شوۋ-بيزنەس ەمەس، ەلىمىزدىڭ مادەني ومىرىندە قانداي جاڭالىقتار بولىپ جاتقانىن، قازاقستانداعى ونەردىڭ قالاي دامىپ جاتقانىن كورسەتەمىز. ەرتەڭ جاڭالىقتار ەفيرگە شىعادى. ازىرگە جۇرگىزۋشىلەرسىز كادر سىرتىنداعى ماتىنمەن شىعادى. بۇل تىڭدارماندارىمىزدىڭ 50 پايىزىن جوعالتپايىق دەگەن پىكىردەن شىقتى. جۇرگىزۋشىلەر بىرەۋگە ۇناسا، بىرەۋگە ۇنامايدى»، - دەدى ارنانىڭ باس پروديۋسسەرى تيمۋر بالىمبەتوۆ.

قازاقستان انشىلەرىنىڭ بۇگىندە امبەباپ مامانعا اينالعانى ايان. قازىر ەكى ءانشىنىڭ ءبىرى تەلەجۇرگىزۋشى، شوۋمەن. تەليەۆيزيادا بەلەڭ العان وسى قۇبىلىس تۋرالى ءسوز اراسىندا حالىق ءارتىسى روزا رىمبايەۆامەن تىلدەسۋدىڭ رەتى كەلدى.

- روزا قۋانىش قىزى، قازىرگى تاڭدا انشىلەردىڭ انشىلىكتى قويىپ، جۋرناليستيكاعا بەت بۇرعانىنا قالاي قارايسىز؟

- انشىلەر تەك كونسەرتتەردە جۇرگىزۋشى بولىپ جۇمىس جاساي الادى. ويتكەنى، ءوزىنىڭ ماماندىعىنا قاتىسى بار. ال، جالپى جۋرناليستىك جۇمىستى انشىلەردىڭ اتقارعانىنا دۇرىس قارامايمىن. مۇمكىن بۇل پروبلەما دۇرىس جۋرناليستەردىڭ جوقتىعىنان بولار. مەن ءالى كۇنگە مۋزىكالىق تاقىرىپتى كاسىبي تۇرعىدا تالقىلاي الاتىن جۋرناليستەردى كەزدەستىرگەن جوقپىن. ولاردىڭ كوبىنىڭ قوياتىن سۇراقتارى تۇرمىستىق دەڭگەيدە. ولاردى مەنىڭ قانداي كيىم كيىپ، قانداي تاماق ىشەتىنىم، قانداي كولىك مىنەتىنىم عانا الاڭداتادى. ناعىز مۋزىكا تىلىندە سويلەسەتىن جۋرناليست جوق.

- ب ا ق بەتتەرىندە «جۇلدىزداردىڭ» جەكە ءومىرى ەڭ وقىلىمدى تاقىرىپقا اينالدى. انشىلەر يدولعا اينالىپ بارادى. قاي ارنانى قوسساڭىز دا، شوۋ-بيزنەس وكىلدەرى. سەبەبى نەدە دەپ ويلايسىز؟

- دۇرىس ايتاسىز، ونداي جەڭىل ناسيحات كوپ. قازىر ءبارىنىڭ سۇراقتارىنىڭ ءبارى سول بولىپ جاتىر. قازاقستاندا ەسترادا جۇلدىزدارىنىڭ ومىرىنەن باسقا جازاتىن تاقىرىپ قۇرىپ قاپ پا دەگەن ويدا قالاسىڭ. بىلايشا ايتقاندا، ەلىمىزدە حالىقتى الاڭداتاتىن باسقا پروبلەما جوق سياقتى. ماعان بۇل جاعداي حالىقتى ۇنەمى كامپيت، تورت بەرىپ الداۋ سياقتى كورىنەدى. مەن مۇنداي تاقىرىپتا سۇراق قوياتىن جۋرناليستەردەن قاشامىن. ولارمەن سويلەسكىم كەلمەيدى. ءبىر جاعىنان ول تەلەارنالاردىڭ باسشىلارىنا، ۇستانعان ساياساتىنا بايلانىستى. ءبارىن جاسايتىن سول ب ا ق وكىلدەرى. حالىققا جەتكىزەتىن دە سولار.

- ەندى ولار دا اۋديتوريانىڭ سۇرانىسىنا قاراي جۇمىس جاسايدى عوي. Gakku TV دا سول ارنالاردىڭ بىرىنە ارنالماي ما؟

- جوق. ءبىز اۋديتوريانىڭ سۇرانىسىنا جۇمىس ىستەمەۋىمىز كەرەك. كەرىسىنشە، حالىقتىڭ مادەني دەڭگەيىن، مادەني ساۋاتىن كوتەرۋ ءۇشىن جۇمىس جاساۋىمىز كەرەك. جاڭا اشىلىپ جاتقان كانال تەك قانا مۋزىكالىق سالانى ناسيحاتتايدى. وتاندىق ورىنداۋشىلار، سازگەرلەر، ۇلتتىق مۋزىكا تاريحى تۋرالى اقپارات بەرىلەدى. بۇرىن قازاق ورىنداۋشىلارىن ءتۇن ورتاسىندا عانا تىڭداۋعا بولاتىن. ەندى وسى ارنا ارقىلى ءتىپتى شالعايدا جاتقان كورەرمەندەر بۇكىل قازاقستان ەستراداسىنىڭ تالانتىن تاماشالاپ، تىڭدايتىن بولادى. ارنانى اشۋداعى باستى ماقسات - قازاق كورەرمەنىنىڭ مۋزىكالىق دەڭگەيىن كوتەرۋ.

- ءوزىڭىز وسىنداي جەڭىل-جەلپى شوۋلارعا بارۋدان باس تارتاسىز با؟

- وتە سيرەك بارامىن. وتىرىك، جەڭىل-جەلپى جارنامانى جەك كورەمىن. قىركۇيەكتىڭ 16-ندا «ايتۋعا وڭاي» باعدارلاماسىنا بارامىن. ويتكەنى، باعدارلاما دۇنيەدەن ەرتە وزعان بەلگىلى سازگەر تالعات سارىبايەۆتىڭ شىعارماشىلىعىنا ارنالماق. ال مەن ونىڭ جالعىز ورىنداۋشىسىمىن.

 - سۇحباتىڭىزعا راحمەت!

اۆتور: گۇلميرا ءعوسمانالي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى