ەكى بولىمنەن تۇراتىن «پرەزيدەنت پەن پەرزەنت» اتتى جاڭا كىتاپ جارىق كوردى
كىتاپتا ەلباسىمەن ءار جىلداردا وتكەن ءتۇرلى شارالاردا كەزدەسكەن بالالاردىڭ ومىرىنەن الىنعان قىزىقتى وقيعالار مەن مەكتەپ وقۋشىلارىنىڭ مەملەكەت باسشىسى تۋرالى شىعارمالارى توپتاستىرىلعان. سونىسىمەن-اق وقىرماندى قىزىقتىراتىن جيناقتىڭ مازمۇنى تارتىمدى ءارى تاعىلىمدى بولىپ شىققان. جوبانىڭ ورىنداۋشىسى - جۋرناليست بەيسەنباي داۋلەت ۇلى.
جالپى، قازىر پرەزيدەنت تۋرالى جازىلىپ جاتقان شىعارمالار از ەمەس. جازىلعان جانرىنا، كوزدەگەن ماقساتىنا قاراي ەلباسىنىڭ قايراتكەرلىك، كوشباسشىلىق تۇلعاسىن ءتۇرلى قىرىنان اشاتىن تۋىندىلاردىڭ ءارقايسىسىنىڭ ارقالاعان جۇگى، وقىرمانعا ايتار وزىندىك ويى بار. ءبىز ءسوز ەتىپ وتىرعان، ەكى بولىمنەن تۇراتىن «پرەزيدەنت پەن پەرزەنت» اتتى جيناق وسى قاتاردى تولىقتىرعان دارا باسىلىم ەكەنىن وقىرمان بىردەن-اق اڭعارادى.
ءبىرىنشى بولىمدە قازاقستاننىڭ تۇڭعىش پرەزيدەنتى - ەلباسى نۇرسۇلتان نازاربايەۆپەن كەزدەسكەن، از-كەم بولسا دا تىلدەسۋ مۇمكىندىگىنە يە بولعان جانە سونىڭ ءوزى كەيىنگى ومىرىنە زور ىقپال ەتكەن جاس ورەندەر تۋرالى باياندالعان. ءبىر كەزدەگى جەتكىنشەكتەر - بۇگىندە ءتۇرلى سالانىڭ جالىنا جارماسىپ، ءوز كاسىبىندەگى بيىكتەردى باعىندىرىپ جۇرگەن جاستار ەلباسىمەن بولعان سول ءبىر جۇزدەسۋلەردى ىقىلاسپەن ەسكە الادى. سونداعى پرەزيدەنتتىڭ اق تىلەكتەرى ومىرلەرىنە اق باتاداي اسەر ەتكەنىن شىن پەيىلدەرىمەن اڭگىمەلەيدى.
راسىندا دا، كىتاپ كەيىپكەرلەرىنىڭ ومىردەگى جولدارى دا ءساتتى ورىلگەن. بۇگىندە ەكونوميكانىڭ ءتۇرلى سالالارىندا ابىرويلى جۇمىس ىستەپ جاتقان نەمەسە ونەر الەمىندە قازاقستاننىڭ اتىن دۇنيەجۇزىنە پاش ەتىپ جۇرگەن ولاردىڭ قاي-قايسىسى دا ەل جاستارىنا ۇلگى بولارلىق ازاماتتار.
كىتاپتىڭ ەكىنشى ءبولىمىنىڭ تارتىمدىلىعى دا بىرىنشىسىنەن كەم تۇسپەيدى. ويتكەنى، مۇندا مەكتەپ وقۋشىلارىنىڭ پرەزيدەنت تۋرالى قىزىقتى وي-تولعامدارى جيناقتالعان. وزدەرى تۇرىپ جاتقان بۇگىنگى قازاقستان مەن ونىڭ بەت-بەينەسىن قالىپتاستىرعان ن. نازاربايەۆتىڭ ەڭبەگىن بالالاردىڭ قالاي باعالايتىنى، ەلدىڭ بولاشاعىن قالاي ەلەستەتەتىنى قاز-قالپىندا بەرىلگەن.
قورىتىپ ايتساق، «پرەزيدەنت پەن پەرزەنت» - ەلباسىنىڭ ەل ومىرىندەگى ءمان-ماڭىزىن قاز- قالپىندا ايشىقتاعان، شىنايى مىسالدارمەن ادەمى ورنەكتەگەن، قالىڭ كوپشىلىككە ارنالعان كىتاپ.
