استانانىڭ سول جاعالاۋىنداعى تالدىكولدى جويۋ جوباسىن تەزدەتۋ كەرەك - سەناتور
«استانا قالاسىنىڭ سول جاعالاۋىنداعى تالدىكولدىڭ اينالاسىنا سوناۋ 1969 - جىلى جاساندى بوگەت سالىنىپ، ول كارىزدىك سارقىندى سۋلارىن جيناقتايتىن ورىن بولعان. ءالى دە تازارتىلعان سارقىندى سۋلارىن اككۋمۋلياتسيالاۋعا ارنالعان سىيىمدىلىق بولىپ وتىر. قازىر وسى تالدىكول ايماعىندا «جاعالاۋ» ىقشاماۋدانى نەگىزىندە تۇرعىن ءۇي كەشەندەرى جەدەل قارقىنمەن سالىنىپ جاتىر. الايدا جاز بويى سارقىندى سۋدىڭ قولقانى قابار جامان ءيىسى ءالى دە قولايسىزدىق تۋعىزىپ كەلەدى»، - دەدى سەناتور جابال ەرعاليەۆ.
بۇل رەتتە دەپۋتات ەلباسىنىڭ تاپسىرماسىمەن اتالمىش سارقىندى سۋ جيناقتاۋشىسىن جويۋ جوباسى جاسالعانىن، ونى 2011-2016 -جىلدارى جۇزەگە اسىرۋ كوزدەلگەنىن اتاپ ءوتتى. جوبانىڭ ماقساتى - تازارتىلعان سارقىندى سۋلاردى ەسىل وزەنىنە جىبەرىپ، تالدىكول سۋ جيناقتاۋشىسىنىڭ اۋدانىن 2 مىڭنان 600 گەكتارعا دەيىن ازايتۋ، سونداي- اق تازارتۋ قۇرىلعىلارىنىڭ ونىمدىلىگىن تاۋلىگىنە 136 دان 254 مىڭ تەكشە مەترگە دەيىن ۇلعايتۋ كوزدەلگەن.
«قازىرگى ۋاقىتتا «ەكسپو-2017» حالىقارالىق كورمەسىنىڭ نەگىزگى پاۆيلوندارى دا استانانىڭ وسى ايماعىنا جاقىن ماڭدا سالىنىپ جاتقاندىعىن جانە دە بۇل كورمەنىڭ 2017 - جىلى جاز ايلارىندا وتەتىندىگىن ەسكەرسەك، وسى تالدىكول سارقىندى سۋ جيناقتاۋشىسىن جويۋ جوباسىن تەزىرەك جۇزەگە اسىرۋدىڭ ماڭىزدىلىعى ارتا تۇسەدى» ، - دەيدى سەناتور.
اۆتور: قانات مامەتقازى ۇلى
***
تالدىكول جيناقتاۋىشىنا قالالىق سارقىندى سۋ جىبەرۋ تولىقتاي توقتاتىلادى. بۇل تۋرالى ەلوردا اكىمى يمانعالي تاسماعامبەتوۆ كەزەكتى حالىققا ەسەپ بەرۋ كەزدەسۋىندە حابارلاعان بولاتىن.
«تاۋلىگىنە 150 مىڭ تەكشە مەتردەي سارقىندى سۋ قايتا وڭدەلىپ، ابدەن تازارتىلىپ، ساپاسى تەحنيكالىق سۋ تالابىنا دەيىن جەتكەننەن كەيىن تىكەلەي ەسىل وزەنىنە قۇيىلادى. وسى ۋاقىتتا تالدىكول شاراسىنىڭ تارىلۋىنا بايلانىستى بيىل ماۋسىم ايىندا سۋ تۇبىندەگى تۇنباسى گەوتەكتيستيلدى كونتەينەرلەرگە ۋتيليزاتسيالانىپ، قۇرعاتىلعان اۋماق رەكۋلتيۆاتسيالانادى» ، - دەدى ول كەزەكتى حالىققا ەسەپ بەرۋ كەزدەسۋىندە.
اكىمنىڭ ايتۋىنشا، تالدىكول سارقىندى سۋ جيناقتاۋ ورنىن جويۋ جوباسى 2011-2016 - جىلدارعا ەسەپتەلگەن جانە سوڭعى ءۇش جىلدا 21 ميلليارد تەڭگە يگەرىلدى. اتالعان كەزەڭدە بيولوگيالىق تازارتۋدىڭ قازىرگى جۇيەسى قايتا جاڭعىرتۋدان ءوتىپ، جاعالاۋلارى بەكىتىلدى جانە سۋدى اعىزۋ نىساندارى جاساقتالدى.
ناتيجەسىندە، تالدىكولدىڭ ورنىندا ەكى شاعىن كولشىك قانا قالادى، ال قالعان 1400 گ ا قۇرعاتىلعان جەردىڭ توپىراق قۇنارلىلىعى قالپىنا كەلتىرىلىپ، پرەزيدەنت نۇرسۇلتان نازاربايەۆتىڭ تاپسىرماسىمەن ساياباق رەتىندە كادەگە جاراتىلادى.
