قازاقستاندىق تاسباۋىر انا ماسكەۋدەگى بالالار ۇيىنە ەكى بالاسىن تاستاپ كەتكەن

ولاردى ماسكەۋدەگى بالالار ۇيىندە اناسى ۋاقىتشا قالدىرىپ، ءىز-ءتۇزسىز جوعالعان. ق ر ءبىلىم مينيسترلىگى جۇرگىزگەن جۇمىستار بارىسىندا 42 جاستاعى ايەل سولتۇستىك قازاقستان وبلىسىنىڭ تۋماسى ەكەنىن انىقتاعان. بۇل تۋرالى س ق و ءبىلىم باسقارماسىنىڭ ءبولىم باستىعى عاليا ءىلياسوۆا حابارلادى.

«اعىمداعى جىلدىڭ مامىرىندا ءبىلىم باسقارماسىنا ق ر ءبىلىم مينيسترلىگىنىڭ بالالار قۇقىعىن قورعاۋ بويىنشا كوميتەتتەن حات كەلگەن. وندا رەسەيدەگى قازاقستان ەلشىلىگىنەن ءبىلىم مينيسترلىگىنە س ق و قازىرگى ءۋاليحانوۆ اۋدانىنىڭ تولبۋحينسكوە اۋىلىندا تىركەلگەن قازاقستان ازاماتى كامەلەتكە تولماعان ەكى بالاسىن ماسكەۋدەگى بالالار ۇيىنە قالدىرعانى تۋرالى جازىلعان حات كەلگەنى تۋرالى ايتىلعان.

ازاماتشا قازاقستانعا قۇجاتتارىن رەسىمدەۋگە كەتكەنى تۋرالى ايتقان. ءۇش اي وتكەنىمەن، ول بالالارىن اكەتۋگە بارماعان.  ۇلىنىڭ ءبىرى 6 ايلىق بولسا، ەكىنشىسى - 2 جاستا. بالالار ماسكەۋدە تۋعان. ال اناسىندا رەسەي ازاماتتىعى جوق، ءارى بۇل ەلدە تىركەلمەگەن. تۋۋ تۋرالى كۋالىگى عانا بار»، - دەدى س ق و ءبىلىم باسقارماسىنىڭ ءبولىم باستىعى عاليا ءىلياسوۆا.

2- قىركۇيەكتە رەسەيدەگى ق ر ەلشىلىگىنىڭ وكىلدەرى بالالاردى الماتى اۋەجايىنا اكەلدى. مۇندا ولاردى سولتۇستىك قازاقستاندىقتار قارسى الدى. 3- قىركۇيەكتە بالالاردى سولتۇستىك قازاقستانعا اكەلدى. ولار پەتروپاۆلداعى بوبەكتەر ۇيىنە ورنالاستىرىلدى.

كامەلەت جاسقا تولماعان بالالاردىڭ اناسىن ىزدەۋ جۇمىستارى جالعاسۋدا.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى