قئرئمبةك كوشەربايەۆ اۋدان باسشىلارىنا قاتاڭ ەسكەرتۋ جاسادى
دەپ حابارلادى وبلىستىق اكىمدىكتىڭ باسپا ءسوز قىزمەتىنەن.
جيىن « قىزىلوردا جىلۋ ەلەكتر ورتالىعىندا» ءوتتى. سەبەبى بۇل مەكەمە قىزىلوردا قالاسىنىڭ نەگىزگى جىلۋ ەنەرگيا كوزى سانالادى. الدىمەن وبلىس اكىمىنىڭ ورىنباسارى نۇرجان الىبايەۆ قىسقى ماۋسىمعا دايىندىق جۇمىستارىنىڭ اتقارىلۋى جانە «ق ر تۇرعىن ءۇي- كوممۋنالدىق شارۋاشىلىعىن جاڭعىرتۋدىڭ 2011-2020 - جىلدارعا ارنالعان» باعدارلاماسىنىڭ وبلىستا ورىندالۋ بارىسى تۋراسىندا بايانداما جاسادى.
بۇگىنگى تاڭدا قىسقى ماۋسىمعا ءبىلىم بەرۋ مەكەمەلەرىنىڭ 95 پايىزى، دەنساۋلىق سالاسىنىڭ 93 پايىزى، مادەنيەت ۇيلەرىنىڭ 97 پايىزى، جىلۋ قازاندىقتاردىڭ 80 پايىزى، كوپقاباتتى تۇرعىن ۇيلەردىڭ 83 پايىزى جىلۋ بەرۋ ماۋسىمىنا دايىن. دەگەنمەن، كەزەكتى جىلۋ بەرۋ ماۋسىمىنا ءبىر ايداي ۋاقىت قانا قالدى. ايماق باسشىسى قازان ايىنا دەيىن بارلىعى ساقاداي ساي بولۋ قاجەتتىگىن تاپسىردى. كوپقاباتتى تۇرعىن ۇيلەردى قايتا جاڭعىرتۋدان وتكىزۋگە ءبىرقاتار اۋداندار نەمقۇرايلىق تانىتىپ وتىر.
«باعدارلامانىڭ ءتيىمدى تۇستارى كوپ. بۇعان مەملەكەتتەن قىرۋار قارجى قارالىپ وتىر. تەك قۇجاتىن رەتكە كەلتىرسەڭىزدەر بولعانى. ال قازالى، جاڭاقورعان، جالاعاش اۋداندارى جايباراقات ءجۇر. قازالى اۋدانىندا 97 ءۇي بولسا، سونىڭ ۇشەۋى عانا جوندەۋدەن وتكەن. جالاعاشتا ەكى ءۇي عانا جوندەلسە، جاڭاقورعان اۋدانى بۇل باعدارلامانىڭ شاراپاتىن كورمەگەن. بۇعان نە دەپ جاۋاپ بەرەسىزدەر؟ بۇل سالاعا جاۋاپتى اۋدان اكىمدەرىنىڭ ورىنباسارلارىنا قاتاڭ ەسكەرتەمىن. قازان ايىنا دەيىن ۇسىنىستارىڭىزدى بەرىڭىزدەر. بۇل جۇرىسپەن 2020 -جىلعا دەيىن ۇيلەرىمىزدى جوندەپ بولا المايمىز» ، - دەدى وبلىس اكىمى ق. كوشەربايەۆ.
وبلىس ورتالىعىندا قازىرگى تاڭدا ەكى كوپقاباتتى تۇرعىن ءۇي پيلوتتىق جوبا نەگىزىندە ىستىق سۋعا قوسىلدى. بيىلدا بۇل جۇمىستار جالعاسىن تاۋىپ، كەلەر جىلى كەم دەگەندا قالاداعى تۇرعىن ۇيلەردىڭ تەڭ جارتىسى ىستىق سۋمەن قامتىلماق.
جالپى، جيىن بارىسىندا اۋىز سۋ، ەلەكتر ەنەرگيا ماسەلەلەرى دە ءسوز ەتىلدى. ءماجىلىستى قورىتىندىلاعان ايماق باسشىسى جوندەۋ جۇمىستارىنىڭ ساپالى جۇرگىزىلۋىنە جانە وتىر قورىن جيناقتاۋدى باستى نازارعا الۋدى سالا باسشىلارىنا تاپسىردى.
اۆتور: ەلۋباي اۋەزوۆ
