قىز زورلاعان جەتى ازامات ءولىم جازاسىنا كەسىلدى
قۇقىق قورعاۋشىلاردىڭ ايتۋىنشا، اۋعانستاندا ايەلدەردى زورلاۋ فاكتىسى سيرەك كەزدەسەتىن قۇبىلىس ەمەس. دەگەنمەن، جەرگىلىكتى تۇرعىنداردىڭ وسىنشاما نارازىلىق تانىتىپ، ايىپتىلاردى جازعىرۋى العاشقى جاعداي. جەكسەنبى كۇنى كابۋلداعى سوت عيماراتى الدىنا نارازى توپ جينالىپ، كۇدىكتىلەردىڭ بارىنشا قاتاڭ جازالانۋىن تالاپ ەتتى. ال، سوت پروتسەسىنىڭ ءوزى مەملەكەتتىك تەلەارنادان تىكەلەي ەفيردە كورسەتىلدى.
ەكى جارىم ساعاتقا سوزىلعان سوت وتىرىسىنىڭ قورتىندىسى بويىنشا ايىپتالعانداردىڭ بارلىعى ءولىم جازاسىنا كەسىلدى. دەگەنمەن، ولاردىڭ ەكەۋى ءوز كىنالارىن مويىنداۋدان باس تارتىپ وتىر.
ەستەرىڭىزگە سالايىق، تامىز ايىندا كابۋل قالاسىنداعى ۇيلەنۋ تويىنان ۇيلەرىنە قايتىپ كەلە جاتقان ءتورت ايەلدى بەلگىسىز بىرەۋلەر ۇرلاپ اكەتىپ، ولارعا زورلىق-زومبىلىق كورسەتكەن بولاتىن. سالدارىنان جابىرلەنۋشىلەردىڭ ءبىرى اۋىر حالدە اۋرۋحاناعا ءتۇسىپ، تاعى ءبىرى جۇكتى بولىپ قالعان.
ايتا كەتۋ كەرەك، اۋعانستاندا زورلىق ءۇشىن 15 جىلعا دەيىن باس بوستاندىعىنان ايىرۋ جازاسى قولدانىلادى. الايدا، بۇل جولعى جەتى ازاماتقا زورلىقپەن قوسا قارۋلى شابۋىل جاسادى دەگەن ايىپ قوسا تاعىلىپ، جازانىڭ ەڭ اۋىر ءتۇرى بەلگىلەنىپ وتىر.
دۋاناباي جولداسبەك
«ايقىن گازەتى»
