كوگالداعى حوككەيدەن ازيا فەدەراتسياسىنىڭ ۆيتسە-پرەزيدەنتى - قازاق

كۋالا-لۋمپۋردە (مالايزيا) ازيا كوگالداعى حوككەيى فەدەراتسياسىنىڭ (AHF) كونگرەسى ءوتىپ، وعان حالىقارالىق كوگالداعى حوككەي فەدەراتسياسىنىڭ (FIH) پرەزيدەنتى لەاندرو نەگرە (يسپانيا) قاتىستى.

مالايزيا تورىندەگى كونگرەستە جاڭا مەرزىمگە AHF پرەزيدەنتى سايلاندى. بۇل لاۋازىمعا ابدۋللا احماد شاح (مالايزيا) قايتا سايلانىپتى. AHF رەسمي سايتى ونى ءتىپتى «ءومىرىنىڭ سوڭىنا دەيىن وسى قىزمەتكە بەكىتىلدى» دەپ جازىپ وتىر.

ەڭ باستىسى، وسى كونگرەستە جاڭا مەرزىمگە (2014-2018 -جىلدار كەزەڭىنە) AHF باسشىلارى تولىقتاي قايتا سايلاندى. التى ۆيتسە-پرەزيدەنتتىڭ ءبىرى بولىپ، ءبىزدىڭ جەرلەسىمىز بەرىكقازى سەكسەنبايەۆ بەكىتىلدى. ول بۇعان دەيىن AHF اتقارۋ كوميتەتىنىڭ مۇشەسى بولاتىن.

بەرىكقازى سەكسەنبايەۆ - قازاق سپورتىنىڭ جارىق جۇلدىزدارىنىڭ ءبىرى. ك س ر و ەڭبەك سىڭىرگەن سپورت شەبەرى. كەڭەس وداعىنىڭ التى دۇركىن چەمپيونى. 1984-1992-جىلدارى ك س ر و قۇراماسىنىڭ ساپىندا ويناعان. ك س ر و جاستار قۇراماسىنىڭ كاپيتانى بولعان. مالايزيانىڭ ەكى دۇركىن چەمپيونى. 1991-1996-جىلداردا مالايزيانىڭ ەڭ ۇزدىك ويىنشىسى اتانعان. 1992-جىلى ت م د قۇراماسى ساپىندا بارسەلونا وليمپياداسىنا قاتىسقان.

كوگالداعى حوككەي سپورتىنىڭ ساڭلاعى، ازيا فەدەراتسياسىندا بەدەلى جوعارى بەرىكقازى سەكسەنبايەۆتى جاڭا لاۋازىمىمەن قۇتتىقتاپ، كاسىبي تابىس تىلەيمىز.

اۆتور: نۇرعازى ساسايەۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى