اسىلزات ارىستانبەك. ايەلدەن اقىن شىقپايدى

مەكتەپتە وقىپ جۇرگەننەن باستاپ ولەڭدەرى اۋداندىق، وبلىستىق، رەسپۋبليكالىق باسىلىمداردا جاريالانىپ كەلەدى.

العاش رەت قىزىلوردا قالاسىنداعى دارىندى بالالار مەكتەپ-ينتەرناتىندا وقىپ جۇرگەندە 16 جاسىندا «تالاپتىڭ ءمىنىپ تۇلپارىن» دەگەن اتپەن شىعارماشىلىق كەشىن وتكىزگەن.

1996-2000 - جىلدار ارالىعىندا ش. ءۋاليحانوۆ اتىنداعى كوكشەتاۋ ۋنيۆەرسيتەتىنىڭ فيلولوگيا فاكۋلتەتىندە ءبىلىم العان. 2000 - جىلى بۇلاندى اۋدانىنىڭ ءبىر مەكتەبىندە قازاق ءتىلى مەن ادەبيەتى مۇعالىمى.

2000-2001 - جىل ارالىعىندا بۇلاندى اۋداندىق اكىمشىلىگىندە ءىس جۇرگىزۋشى-اۋدارماشى. 2001-2005 - جىلدار ارالىعىندا كوكشەتاۋدان شىعاتىن «بۇقپا!» گازەتىندە ءتىلشى. 2005-2006 - جىلدار ارالىعىندا رەسپۋبليكالىق «الاش ءۇنى» گازەتىندە جاۋاپتى حاتشى.

2006-2007 - جىلدار ارالىعىندا «بۇقپا!» گازەتىندە باس رەداكتوردىڭ ورىنباسارى. 2007 -جىلدىڭ قاراشا ايىنان باستاپ استانا قالاسىنان شىعاتىن رەسپۋبليالىق «مىرزا» ەر-ازاماتتار باسىلىمىندا باس رەداكتوردىڭ ورىنباسارى. 2006 - جىلى كوكشەتاۋ قالاسىندا «شىن جۇرەكتەن...» دەپ اتالاتىن شىعارماشىلىق كەشىن وتكىزگەن. ولەڭدەرى زەردە قوعامدىق قورى شىعارعان اقىن قىزداردىڭ جىر جيناعى «جىر دەستە» كىتابىنا ەنگەن. وبلىستىق دەڭگەيدە وتكەن ءمۇشايرالاردىڭ بىرنەشە دۇركىن جەڭىمپازى. جۋىردا «بەسىنشى ماۋسىم» اتتى جەكە جىر جيناعى جارىق كوردى.

ءبىز بۇل جولى اقىننىڭ الەۋمەتتىك جەكە پاراقشاسىنداعى سياسى كەپپەگەن جاڭا ولەڭدەرىن ۇسىنىپ وتىرمىز.

اقىن ولەڭدەرىنە ءتانتى بولا وتىرىپ، «ايەلدەن اقىن شىقپايدى» دەگەن ولەڭىنىڭ اتىن ادەيى تاقىرىپقا شىعارىپ قويدىق. 

بىرىمىزگە ءبىرىمىز جاناسا الماي،

بىرىمىزگە ءبىرىمىز الاسارماي.

ءسۇيىپ تۇرىپ، قۇداي-اۋ، قالاي ءجۇرمىز،

دۇنيەنى وتقا وراپ جاعا سالماي.

سەنى مەنەن وزگەلەر قىزعانا ما؟

ءجۇزى ورتەنىپ، كۇنىنە ءجۇز جانا ما؟

اقىن ەمەس عاشىقتار كوپ ومىردە،

عاشىق بولعان اقىندار ءبىز عانا ما؟

بىرىمىزگە ءبىرىمىز جاقىنداماي،

سۇيمەي بەكەر جۇرەدى اقىن قالاي؟

ءال مەن دارمەن قۇريدى الدەقايدا،

ارەكەت تە ەتە الماي اقىلعا ساي.

جەتەلەيدى ومىرگە ءۇمىت الداي،

ماحابباتىڭ ماس قىلدى ۋىتى ارباي.

ءتۇبى ءبىزدىڭ كۇلىمىز كوككە ۇشادى،

دەر كەزىندە سەزىمدى سۋىتا الماي.

ا. ا.

بالكىم مەنى جەك كورەتىن شىعارسىڭ،

جاقسى كورۋ جالتارۋ ما جاي عانا؟

ءبىر كۇن سەن دە مەن سياقتى جىلارسىڭ،

سەزىمدەرىڭ اسپاي ەشبىر پايداعا.

جۇرەك دەگەن جىلاي-جىلاي سولادى،

ءبىر كۇن سەن دە تۇرا الماسسىڭ توسەكتەن.

مىنا ومىردە سان قيىندىق بولادى،

ەڭ قيىنى ءومىر ءسۇرۋ ەسەپپەن.

بالكىم مەنەن، مەندىك مۇڭنان جالىقتىڭ،

 اۋىرسىنىپ قاۋىرسىنداي جانىمدى.

مەن جاي عانا ايەل دەگەن ءارىپپىن،

سول ارىپپەن ساقتاپ تۇرعان ارىمدى.

ا. ا.

ۋىز تولى توستاعان اقتارىلىپ كەتەردەي،

ەرىن دە تۇر البىراپ، سۇتكە مالعان شەكەردەي.

كۇڭگىرت تارتقان بولمەدە كۇبىر-سىبىر ەكەۋمىز،

بۇگىنگى ءتۇن شىنىمەن قاس-قاعىمدا وتەردەي.

شاراپ تولى كەسەنى شامىرقانباي جۇتىپ ساپ،

قۇلاعىڭا سىبىرلاپ، قۇمارىڭدى قىتىقتاپ.

ءوڭ مەن ءتۇستىڭ اراسىن ايىرا الماي ماۋجىراپ،

ماستىعىمنان ايىقتىر مىقىنىمنان مىتىپ قاپ.

اق توسەكتىڭ ۇستىندە ۇلبىرەگەن ەركە گۇل،

سەزىم نەتكەن - ءناپ-نازىك، ءتوزىم نەتكەن - سوم تەمىر.

ءتاپ-ءتاتتى ءتۇس كورەيىن تەك ەكەۋمىز تۋرالى،

جۇرەگىڭدى جاستىق ەت، كوڭىلىڭدى كورپە قىل.

ا. ا.

جالعاندىق جانىما جات الەم،

وتىرىك ءسۇيۋشى بولماڭىز.

اقيقات سورىنا باتۋشى ەم،

سوندا دەپ ۇعىنساڭ بار ماڭىز.

ماحاببات مەسەلى - سەنگىشتىك،

الدانا بەرەدى سان رەت.

وتىرىك كۇلسەڭىز ەندى ءوستىپ،

شىنايى كۇلكىگە لاعىنەت.

بەتىڭىز بۇلك ەتپەي تىك قاراپ،

كوزىڭىز سويلەسە وتىرىك،

مەن داعى الدايمىن مىقتاپ اپ،

سوزىڭە سەنگەن بوپ وتىرىپ.

نە كەرەك دايەكسىز دالەلدەر؟

تونبەسىن دەپ تىلە سۇمدىق مۇڭ،

الدانعان بولىپ-اق ايەلدەر،

الدىنان شىعادى شىندىقتىڭ.

ا. ا.

ايەلدەن اقىن شىقپايدى

ايەلدەن اقىن شىقپايدى دەپ،

السىزدەر جىلاپ- سىقتايدى دەپ،

ەركەكتىڭ ىعىن ىقتايدى دەپ،

ولسە دە ورلىك جۇقپايدى دەپ،

جۇرسىڭدەر- اۋ، كورەرسىڭدەر ءالى!

ايەل دەگەنىڭ اقىلشى ەكەن دەپ،

شەتىنەن ءبارى اقىن- شەشەن دەپ،

سەنىڭ ىعىڭدا جاتىپ وسەم دەپ،

ءبيبىنىڭ ءبارى باتىل ەكەن دەپ،

الدىمىزعا دا،

كەلەرسىڭدەر ءالى!

ايەلدىڭ ناعىز ءپىرى ەدىڭ- اۋ دەپ،

جۇلدىزدىڭ سەن دە ءبىرى ەدىڭ- اۋ دەپ،

قايراڭعا كەلىپ قايرىلدىق- اۋ دەپ،

اقىننان ناعىز ايرىلدىق-اۋ دەپ،

مەن ولگەندە

كومەرسىڭدەر ءالى!

قۇس- تاعدىر

قۇستار ىلعي جىلى جاققا كوشەدى،

ويتكەنى -

قۇس پەن قىزدىڭ جانى نازىك دەسەدى.

ال مەن بولسام سۋىق جاققا اۋعانمىن،

سەن بار جەردە توڭباسپىن دەپ... الداندىم.

ىزدەپ كەلگەن قىرانىنا جولىقپاي،

قۇس-تاعدىرىم كوگىڭدە ءجۇر قالىقتاي.

ءيا، ءيا، ىزدەگەنىم سەن ەدىڭ،

باسىڭا

باقىت قۇسى بولىپ قونسام دەپ ەدىم.

باقىت قۇسى بولار ەدىم،

قوش، ەلەس!

سەنىڭ باسىڭ بوس ەمەس!

سۋىق اۋا، سۋىق تاعدىر، سۋىق كۇن،

جىلىلىقتىڭ نە ەكەنىن ۇمىتتىم.

مىنە تاعى كۇز كەلدى،

قۇس بىتكەننىڭ جىلى جاقتا تويلارى.

مەن تاعى دا قالىپ قويدىم،

ۇمىتپەن:

سەن بار جەردە توڭباسپىن دەپ،

قايداعى؟!.

ا. ا.

كوڭىلىم ايناداي شىتىناپ،

ويلارىم ون ساققا بىتىراپ،

مەن وسى قاي كۇنى، قاي جىلى،

جالعىزدىق دەرتىنەن قۇتىلام.

ساۋساقتى سياسىز قالام عىپ،

تۇندەردى جۇتادى ساراڭدىق.

جانىم دا كۇتپەيدى جۇبانىش،

اۋىرماي قانايدى جارام تۇك.

جىلايمىن جاس شىقپاي كوزىمنەن،

سودان دا قورقامىن وزىمنەن.

التىلىق قارعا دا ۇتادى،

ايىرىپ قولداعى كوزىردەن.

سەزىم بە؟ و، نەتكەن كۇلكىلى،

جىلاۋىق كوڭىلدىڭ كىرپىگى.

دارمەنسىز ءدارىنىڭ ىرقىندا،

باياعى جۇرەكتىڭ بۇلكىلى.

تاعدىردىڭ تالكەگى مەن بۇرالاڭىن،

تۇك ۇناتپاي تۇرسام دا قۇپ الامىن.

(اي- اۋليە اسپاندا بال اشادى،

شاشىپ تاستاپ قىرىق ءبىر قۇمالاعىن) .

ءتۇن دە مىناۋ تۇكسيگەن قاباعىمەن،

جۇرەگىمە سالادى جارا كىلەڭ.

كۇشىم مەنەن ءىسىمدى كورە المايتىن،

كۇشىگىنە كوپ ءيتتىڭ تالانىپ ەم.

جالعىز قالسام - جاۋجۇرەك ايبارلىمىن،

كوپ ىشىندە مىڭگىرگە اينالدى ءۇنىم.

دەرەگىمدى كۇتەمىن داپتەرىمنەن،

دەپۋتاتتاي كۇتەتىن سايلاۋ كۇنىن.

ءوز ويىما تالانىپ ءوزىم دارا،

وتباسىما بولمادى ءسوزىم پانا.

ءتوزىم ولسە، قۇداي- اۋ، نە بولادى،

قولتىعىمنان دەمەيتىن ءتوزىم عانا.

قارا سۋدى قايناتىپ اتالا عىپ،

قامال سوعام ولەڭنەن قاپالانىپ.

ۇلىقتاردىڭ قىلىعىن ۇيات كورىپ،

ۇجدانىما ۇرسامىن جاتا قالىپ.

دەرتىنە جۇرەگىمنىڭ داۋا تاپپاي،

بازاردان باز كەشەمىن الا قاپتاي.

دۇنيەي- اي، دامەمىزگە قاراشى ءبىر،

قوڭىزدىڭ قيىنداي عىپ دومالاتپاي.

ا. ا.

دايئنداعان: بةيسةن سذلتان ذلئ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى