قازاق ارتىستەرى، تۇرىكتىڭ سەريالدارىن تاماشالاڭدارشى، ءوتىنىش
بۇگىندە تۇرىك سەريالدارىنىڭ ءداۋىرى ءجۇرىپ تۇر.
العاش 2000 - جىلدارى تۇرىك سەريالدارى باستاۋ العان تۇستا «بەريۆان»، «اساۋ جۇرەك»، «قىنالى قار» سىندى سەريالدار كورەرمەن كوڭىلىن بىردەن جاۋلاپ الدى.
كەش باتسا ءبىتتى كوگىلدىر جاشىكتىڭ الدىنا جيناپ، قازىق قىلىپ قاعىپ قويدى دەسە دە بولادى.
قانداستارىمىز تۇركياعا ساياحاتتاماي-اق سەريالدار ارقىلى ونىڭ ءار تۇكپىرىمەن تانىس دەسە دە بولادى. ءتىپتى وسى سەريالدار ءتۇرلى انەكدوتتاردىڭ تارالۋىنا دا تۇرتكى بولدى.
«قىنالى قار» باستالعاندا ءبارى ۇيىپ، ۇيدەن شىقپايتىنىن بىلەتىن ۇرىلار اۋىلداعى ءبىر ءۇيدى ۇپتەپ كەتىپتى.
ءتىپتى كورشى بولمەدەگى كىلەمدى سىپىرىپ كەتكەنىن دە سەزبەگەن عوي. قۋلار كىلەم قاعىلعان ورىنعا ۇلكەن ەتىپ «ەكى كوزىڭ نازاردا، سيىرىڭ سەنىڭ بازاردا» دەپ جازىپ كەتىپتى...
ودان بەرى دە كارىستىڭ، ءۇندىنىڭ سەريالدارى جاۋلاپ الدى. الايدا كورەرمەندەردىڭ تۇرىك سەريالدارىنا دەگەن ماحابباتىنا كىرەۋكە تۇسىرە قويعان جوق. وسى جۇرتتىڭ ءبارى تۇرىكتىڭ كينولارىنا نەگە ىنتىق؟ وسىنىڭ استارىنا ءۇڭىلىپ كوردىك پە؟..
سەبەبى...
تۇرىك ارتىستەرىنىڭ ءوز جۇمىستارىنا دەگەن ادالدىعىنان بولار. بەرىلگەن رولدەرىن ىنتى-شىنتىسىمەن بەرىلە وينايدى. ءوزى دە سەنەدى، وزگەنى دە سەندىرەدى. بىرگە جىلاتادى، بىرگە كۇلدىرەدى. باستى رولدەگى ارتىستەرىنەن باستاپ، ءتىپتى ەسىگىنىڭ الدىنداعى قوسشىسىنا دەيىن ءوز كاسىبىنىڭ كەمەڭگەرى. سوسىنعىسىن، سەناريستەرىنىڭ مىقتىلىعىن دا مويىنداۋ كەرەك. شىم-شىتىرىق وقيعالاردى شيەلەنىستىرىپ، ەندى نە بولار ەكەن دەپ ەلىكتىرىپ قويادى. ءبىز دە كينو ءتۇسىرىپ جاتىرمىز. جوق، جوق دەپ زارلاي بەرۋگە دە بولماس، ءبىراق ولار نەگە كورەرمەننىڭ كوزايىمىنا اينالماي وتىر؟
ويتكەنى...
ءبىزدىڭ ارتىستەر بەرىلگەن رولگە ءجۇردىم-باردىم قارايدى. جاساندىلىق باسىم. جىلاتا دا المايدى، كۇلدىرە دە المايدى، جالپى ويىنىنا سەندىرە المايدى. ءبىز دە قانداستارىمىزدىڭ قازىر قالاي بايىپ كەتكەنىن كورسەتەيىك دەدىك. دەدىك تە كينوعا ارقاۋ ەتتىك. ءبىراق ونداعى باستى كەيىپكەرلەر ەشكىمدى دە سەندىرە المادى. ءتىپتى ءۇي كۇتۋشىلەرى دە تۇرىك سەريالدارىنداعىداي قوجايىندارىن دۇرىستاپ وسەكتەي دە المايدى...
«ۇتىك قوسساق تا، سول ءارتىس...»
باسقاسىن ايتپاي-اق قويايىق، سوڭعى كورسەتىلىپ جاتقان «قارا شاڭىراقتى» الايىقشى. اتىنا قاراپ «ءتۇھ، اقىرى ءبىر ءجونى ءتۇزۋ سەريال تۇسىرىلگەن ەكەن عوي» دەسكەنبىز. جوق، قاتەلەسىپپىز. سەناري وسال. وقيعالاردىڭ ءبىر-بىرىمەن بايلانىسى جوق. قيىندى سياقتى. سوسىنعىسىن، قازاقتا ات قۇرىپ قالعانداي كارينا، لينداسى نەسى؟ مۇندا دا سول باياعى ابدەن كوزگە سۇيەل بولعان ارتىستەر. اندا دا سولار، مۇندا دا سولار. جالىقتىرىپ جىبەرەدى. ەگەر ءوز ءىسىنىڭ شەبەرى بولىپ حالىقتى سەندىرىپ ويناسا، ەشكىم دە رەنجىمەس ەدى عوي.
ابدەن بولىپ، تولعان ارتىستەر. قارنىڭ اشادى ويىندارىنا. ودان گورى كارينانىڭ قىزى - كىپ-كىشكەنە ءارتىستىڭ ويىنى سەندىرەدى قايتا. ودان كەيىن تەمىر تورعا ءتۇسىپ قالعان كارتاقۇماردىڭ ءرولى شىنايى شىققان. قازاق ءتىلىن ەندى ۇيرەنىپ جۇرگەندەي تاقپاقتاپ سويلەيتىندەرى جۇيكەڭدى جۇقارتىپ جىبەرەدى. سەريال ەرتەرەك بىتسە ەكەن دەپ وتىراسىڭ...
قىرعىزداردىڭ «قۇرمانجان داتقا» كينوسىنىڭ ءۇزىندىسىن كورگەنبىز جۋىردا. مىقتى ەكەنىن سول ۇزىندىلەر-اق مويىنداتىپ تۇر. وزبەك اعايىندار دا وزدەرىنىڭ كومەديالارىمەن ءبىزدى الدەقاشان-اق شاڭ قاپتىرىپ كەتكەن. ءبىز قاشان ويانامىز سوندا؟
اۆتور: گۇلبانۋ ەسىموۆا
«الاش ايناسى»
