قازاقستان مەن يران پرەزيدەنتتەرى بىرلەسكەن مالىمدەمە قابىلدادى

اتاپ ايتقاندا، ساۋدا- ەكونوميكالىق جانە كولىك- ترانزيتتىك ىنتىماقتاستىق ماسەلەلەرى قوزعالدى.

سونىمەن قاتار، ساپار اياسىندا وتكەن كەلىسسوزدەر قورىتىندىسىنا وراي، قازاقستان مەن يران پرەزيدەنتتەرىنىڭ بىرلەسكەن مالىمدەمەسى قابىلداندى. بۇدان بولەك، ءبىرقاتار ۇكىمەتارالىق كەلىسىمدەرگە قول قويىلدى. اتاپ ايتقاندا، قازاقستان مەن يران سىرتقى ىستەر مينيسترلەرى اراسىندا ىنتىماقتاستىق تۋرالى بەسجىلدىق باعدارلاماعا قول قويىلدى.

 سونىمەن بىرگە، قازاقستان رەسپۋبليكاسى مەن يران يسلام رەسپۋبليكاسى ۇكىمەتى اراسىنداعى جولاۋشىلار مەن جۇكتەردىڭ حالىقارالىق اۆتوموبيل تاسىمالى تۋرالى كەلىسىم جاسالدى. بۇدان بولەك، ەكى ەل اراسىندا ساۋدا- ەكونوميكالىق جانە ينۆەستيتسيالىق ىنتىماقتاستىقتى دامىتۋ جونىندەگى جول كارتاسىنا قول قويىلدى.

«بۇگىن ەكى ەلدىڭ مينيسترلەرىنىڭ قاتىسۋىمەن اسا جوعارى دەڭگەيلى كەزدەسۋ بولىپ ءوتتى. ءبىز ەكونوميكالىق، مادەني جانە عىلىمي سالاداعى ەكىجاقتى قاتىناستىڭ بارلىق ماسەلەلەرىن تالقىلادىق. ەكسترەميزممەن كۇرەستە دە ءبىز تياناقتى كەلىسسوزدەر جۇرگىزدىك. ماڭىزدى ماسەلەنىڭ ءبىرى قازاقستاندى تۇركىمەنستان ارقىلى يرانمەن بايلانىستىراتىن، كاسپي تەڭىزىن پارسى شىعاناعىمەن بايلانىستىراتىن تەمىرجول تۋراسىندا ءوربىدى»، - دەدى يسلام مەملەكەتىنىڭ باسشىسى.

ونىڭ ايتۋىنشا، كەزدەسۋ بارىسىندا ساۋدا- ەكونوميكالىق ىنتىماقتاستىق ماسەلەلەرىنە دە ەرەكشە نازار اۋدارىلعان. سونىڭ ىشىندە اۋىل شارۋاشىلىعى، پايدالى قازبالار مەن ونەركاسىپتى دامىتۋ سالالارى، بيزنەس- قاۋىمداستىق اراسىنداعى ءوزارا ينۆەستيتسيالار الماسۋ باعىتتارى قوزعالدى. «ەنەرگەتيكا سالاسى ءبىزدىڭ ىنتىماقتاستىعىمىزدىڭ ماڭىزدى بولىگى. قازاقستان دا، يران دا اۋقىمدى مۇناي- گاز قورلارىنا يە. ءبىز وسى سالاداعى تاجىريبەلەرىمىزبەن ءبولىسىپ، ءوزارا ينۆەستيتسيالار تارتۋعا دا نازار اۋدارامىز»، - دەدى ح. رۋحاني.

 بۇدان بولەك، يران پرەزيدەنتى ەكى ەل بۇعان دەيىن مۇناي سۆوپ- وپەراتسيالارىمەن اينالىسقانىن ەسكە سالا كەتتى. «الايدا بۇل سۆوپ- وپەراتسيالار توقتاتىلعان. ءبىز وسىنى قايتا جاڭعىرتۋ مۇمكىندىگىن تالقىلادىق، بۇل اسا ماڭىزدى قادام» ، - دەدى يران پرەزيدەنتى.

قازاقستان- يران بيزنەس- فورۋمى اياسىندا ءبىرقاتار ەكىجاقتى قۇجاتقا قول قويىلدى.

ق ر ينۆەستيتسيالار جانە دامۋ مينيسترلىگى باسپا ءسوز قىزمەتىنىڭ مالىمەتىنشە، بەكىتىلەتىن كەلىسىمدەردە سوماسى 500 ميلليون دوللاردان استام قارجىنى قامتيتىن گەولوگيا، مەتاللۋرگيا، اگروونەركاسىپتىك كەشەن، كولىك، تۋريزم، لوگيستيكا، قۇرىلىس ماتەريالدارىن ءوندىرۋ سالالارى بويىنشا جوبالار قاراستىرىلعان.

تاراتىلعان مالىمەتتەرگە قاراعاندا، گيدرومەتاللۋرگيالىق زاۋىتىن سالۋ، مىس كەن ورنىن اشۋدى قاراستىرۋ جونىندەگى ىنتىماقتاستىق تۋرالى كەلىسىمدەرىنە، گۇلىستان پروۆينتسياسىندا استىق تەرمينالىن سالۋ، وڭتۇستىك قازاقستان وبلىسىنداعى كەراميكالىق زاۋىت بويىنشا ىنتىماقتاستىق تۋرالى قۇجاتتارىنا، سونداي- اق تراۆەرتين ءوندىرۋ جونىندە ءوزارا تۇسىنىستىك تۋرالى مەموراندۋمىنا قول قويىلادى دەپ كۇتىلۋدە.

 بيزنەس- فورۋمعا ەكى ەل تاراپىنان 250 گە جۋىق دەلەگات قاتىسۋدا. جيىن بارىسىندا قازاقستان جاعى يران دەلەگاتسياسىن ەلىمىزدە جۇرگىزىلىپ جاتقان يندۋستريالاندىرۋ باعدارلاماسىمەن تانىستىرىپ، اتالعان ەلدىڭ بيزنەس وكىلدەرىن جوبالاردى ىسكە اسىرۋعا شاقىردى.

 بۇدان بۇرىن حابارلانعانداي، بۇگىن اقوردادا ق ر پرەزيدەنتى نۇرسۇلتان نازاربايەۆ پەن يران يسلام رەسپۋبليكاسىنىڭ (ي ي ر) پرەزيدەنتى حاسان رۋحانيدىڭ قاتىسۋىمەن كەلىسسوزدەر جۇرگىزىلدى.

اۆتور: رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى