حالىق التىن حانشايىم تاريحي جادىگەرىن تاماشالادى
ەسكەرتكىشتىڭ ءتۇپنۇسقاسى استانا قالاسىنداعى ۇلتتىق مۇراجايدا ساقتاۋلى. قالا كۇنى مەرەكەسى قارساڭىندا ونى كورۋگە اسىققاندار قاتارى از بولمادى.
التىن حانشايىم جەرلەنگەن قورىمدى باتىسقازاقستاندىق ارحەولوگتار 2012 - جىلدىڭ كۇزىندە تاپقان بولاتىن. ايتا كەتۋ كەرەك، تاقساي كەشەنى ءوڭىر تاريحىندا تۇڭعىش رەت زەرتتەلىپ وتىر. «كەشەننەن تابىلعان جادىگەرلەردىڭ كوپتىگى مەن اقپاراتتىق تۇرعىداعى ءرولى ونىڭ ماڭىزىن ارتتىرا تۇسەدى»، - دەيدى ارحەولوگ عالىمدار.
«بۇل جادىگەردى تاقساي تاراعى دەپ اتادىق. وندا سول كەزدەگى پارسىلار مەن سارماتتار اراسىنداعى سوعىس بەينەلەنگەن. ات اربامەن كەلىپ، ءبىرى ساداقپەن اتىپ جاتقان كورىنىستەر بەينەلەنگەن. قازاقستاندا مۇنداي جادىگەرلەر ءالى تابىلعان جوق. بۇل - ەڭ العاشقى تابىس. سوندىقتان دا ءبىزدىڭ تاريحىمىزداعى ۇلكەن ءبىر اشىلۋ دەپ ايتۋعا بولادى»، - دەدى باتىس قازاقستان تاريح جانە ارحەولوگيا ورتالىعى ديرەكتورىنىڭ ورىنباسارى سەرىك رامازانوۆ.
قوعام قايراتكەر امانجول ءزينۋلليننىڭ ايتۋىنشا، تاقساي قورعانىنان تابىلعان ماتەريالدار شەت مەملەكەتتەردە بىرنەشە مارتە ساراپتاۋدان وتكەن. قازىر عالىمداردىڭ الدىندا حانشايىمنىڭ قانشا جاستا بولعاندىعىن انىقتاۋ ماقساتى تۇر. ءبىر انىعى، تاقساي قورعانىندا جەرلەنگەن ادامنىڭ ايەل جانە ونىڭ ءوز قوعامىندا بيىك دارەجەگە يە بولعانى.
