بۇگىن «قازاقستان» ۇلتتىق تەلەارناسىندا «شىن جۇرەكتەن» جاڭا رەاليتي-شوۋى ەفيرگە شىعادى
اتالمىش جوبانىڭ باستى ماقساتى - تاسادا قالعان قازىرگى زاماننىڭ باتىرلارى دەپ ايتۋعا تۇراتىن كەيىپكەرلەردىڭ ەرلىك ارەكەتىن جان-جاقتى بايانداۋ. ونىڭ ءوز جەكە باسىنان وتكىزگەن ەڭ قىزىقتى، اسەرلى ساتتەرى تاڭدالىپ الىنىپ، كورەرمەندەر نازارىنا ۇسىنىلماق.
كوبىنەسە مەيىرىمدى جاندار وزدەرىنىڭ جاقسى ىستەرى جايلى ايتىپ جاتۋدى ۇناتا بەرمەيدى. ءبىراق ءبىز وسىنداي ەرەكشە ەرلىك، جاقسىلىق يەلەرى تۋرالى ەلدىڭ بىلگەنىن قالايمىز جانە «شىن جۇرەكتەن» ارقىلى سول ادامداردى كوپشىلىككە ۇلگى ەتەمىز. باعدارلاما ەموتسياعا تولى. ورىندى ويىن مەن ادەمى ءازىل باعدارلامانىڭ كوركىن اشپاق.
باسىن قاتەرگە تىگىپ، جالىنداعان وت ورتاسىنان ادام ءومىرىن قۇتقارعان ءورت ءسوندىرۋشى، جەتىمدى جىلاتپاي، وعان انالىق قامقورلىعىن سىيلاعان اسىل جان، ناۋقاستى اجال اۋزىنان اراشالاپ قالعان دارىگەر، ءبىر سوزبەن ايتقاندا، جارىمجان كوڭىلگە قۋانىش سىيلاپ، اينالاسىنداعىلارعا بەرگەنى مول، ءبىراق، ءوزى تاسادا قالعان جاندار تۋرالى شىتىرمانعا تولى وقيعالار جاڭا جوبانىڭ ارقاۋىنا اينالادى.
ءبىزدىڭ قوعامدا ءومىردىڭ ءتۇرلى اۋىرتپالىعىن كورىپ، تاعدىردىڭ ءارتۇرلى سىناعىنا تاپ بولسا دا، مويىمايتىن قايسار جاندار جەتەرلىك. ولار وزدەرى بەتپە-بەت كەلگەن قيىندىقتى جەڭىپ قانا قويماي، اينالاسىنداعى ادامدارعا دا قولىنان كەلگەنشە جاقسىلىق جاساپ، ايرىقشا ەرىك-جىگەردىڭ، قايىرىمدىلىقتىڭ ۇلگىسىن كورسەتۋدە. ءبىراق، كوپ جاعدايدا، ونداي ازاماتتار شەت قالىپ قويىپ جاتادى. ولاردىڭ قاجىماس قايراتى، يگى ىستەرى مەن ومىرلىك تاجىريبەسى تەڭدەسى جوق جاڭا الەۋمەتتىك جوبانىڭ نەگىزىنە الىندى. وسىنداي مەيىرىمدى جانداردىڭ تاعىلىمدى ءومىرىن، ونەگەلى ەڭبەگى مەن ۇلاعاتتى ىستەرىن دارىپتەۋ ماقساتىمەن «شىن جۇرەكتەن» باعدارلاماسى دۇنيەگە كەلدى.
ەگەردە ءسىز سونداي ادامداردى ومىرىڭىزدە كەزدەستىرسەڭىز نەمەسە شىندىققا جاناساتىن وقيعالاردىڭ كۋاگەرى بولساڭىز، «قازاقستان» ۇلتتىق تەلەارناسىنا حابارلاسۋىڭىزدى سۇرايمىز. وقيعا جەلىسى بويىنشا، ول كەيىپكەر تۋرالى ارنايى حابار تۇسىرىلەتىن بولادى. ءبىزدىڭ تىلشىلەر كەيىپكەرگە توسىننان سىي جاساپ، ەستەن كەتپەس قۋانىش سىيلاماق. جۇرەگى التىن ادامعا باقىتتى ءسات سىيلاۋعا ءسىز دە ات سالىسىڭىز. ال ازىرشە، جاڭا جوبانىڭ كەيىپكەرلەرىن تاڭداۋ ءۇشىن بايقاۋ جاريالانىپ وتىر. جاڭا باعدارلامانىڭ كەيىپكەرلەرى - ميلليونداعان قازاقستاندىقتاردىڭ ءىلتيپاتىنا يە بولۋعا تۇرارلىق ماراپاتقا لايىق باتىر جاندار.
