اقتاۋدا ۇزاق ۋاقىت بەسىككە تاڭىلعان بالانىڭ اكەسى جازالاندى
«ول «بالانى تاربيەلەۋدە اتا-انا مىندەتىن لايىقتى دەڭگەيدە اتقارماعىنى» تۋرالى اكىمشىلىك كودەكستىڭ 111-بابى بويىنشا اكىمشىلىك جاۋاپكەرشىلىككە تارتىلدى. وعان بەستەن ونعا دەيىنگى ايلىق كورسەتكىش ەسەبىندە ايىپپۇل سالىنادى. قۇزىرەتتى ورگاندار نارەستەنىڭ اكەسىن اتا-انالىق قۇقىنان ايىرۋ ماسەلەسىن كوتەرگەن. بار ماسەلە ونىڭ الداعى ۋاقىتتا ءوز بالاسىن قايتا اسىراپ الۋىنا تىيىم سالۋدا»، - دەدى باسپا ءسوز قىزمەتىنەن.
ىشكى ىستەر دەپارتامەنتىندەگىلەر نارەستە اۋرۋلارىنان جازىلعان بويدا بۇلدىرشىندەر ۇيىنە جىبەرىلەتىنىن ايتقان. «قىلمىستىڭ ءىزى بايقالماعاندىقتان نارەستەنىڭ اتا-اناسى قىلمىستىق جاۋاپكەرشىلىككە تارتىلمايدى. ول ءوز بالاسىنا ءجابىر كورسەتكەن جوق»، - دەدى باسپا ءسوز قىزمەتىندەگىلەر. ولار سونداي-اق، وسىدان ءبىر اي بۇرىن بالانىڭ قۇلاپ قالعانىن، جامباسىنا گيپس تارتىلعانىن، ال نارەستە كوپشىلىك نازارىنا ىلىنگەن شاقتا گيپستەن جاعىمسىز ءيىس شىققانىن ايتىپ وتىر.
بۇعان دەيىن حابارلانعانىنداي، اقتاۋدا ءبىر جاسار نارەستە تۋعاندارىنىڭ قاتىگەز ارەكەتىنەن اۋرۋحاناعا تۇسكەن بولاتىن. دارىگەرلەردىڭ ايتۋىنا قاراعاندا، نارەستە تۋعانان باستاپ بەسىككە تاڭىلعان ەكەن. تەكسەرىستەن كەيىن دارىگەرلەر بالانىڭ بۇلشىق ەتتەرىنىڭ بۇرالاڭدانىپ قيسايعانىن، بەتى مەن باسىندا قاندى ىسىك پايدا بولعانىن، قۇيرىعىنىڭ جارالانىپ، ىرىڭدەگەنىن انىقتاعان.
ناۋقاس ءسابي مۇنايلى اۋدانى فەلدشەرىنىڭ ارقاسىندا اۋرۋحاناعا جەتكىزىلدى. ول كۇننىڭ كوزىندە بەسىككە تاڭىلعان بالانى كەزدەيسوق كورىپ قالعان. «سىرتتا بەسىككە بولەنگەن بالا جاتتى. ىستىقتا. ونىڭ جۇدەۋلىگىنە كوزىم ءتۇستى، كيىمى لاس بولدى. مەن جەدەل جاردەمدى شاقىردىم»، - دەيدى فەلدشەر. بۇل ۇيگە دارىگەرلەرمەن بىرگە پوليتسيا دا كەلدى.
كىشكەنتاي اقنۇردىڭ اجەسى بولسا، ءسابيدى تيىسىنشە باعىپ وتىرعانىن ايتتى. «ءبىز ونى جاقسى باعىپ-قاعىپ وتىرمىز. تاماق بەرىپ، جۋىندىرامىز»، - دەيدى ايەل. ءسابيدىڭ اكەسى دە بالاعا قاتىگەزدىك جاساماعانىن ايتۋدا. ونىڭ ايتۋىنا قاراعاندا، اقنۇردىڭ اناسى ءىز-ءتۇسسىز كەتكەننەن كەيىن بۇل باسقا ايەلمەن تۇرىپ جاتىر، ءبىرىنشى ايەلىمەن نەكەگە وتىرماعاندىقتان، اقنۇردىڭ تۋۋ تۋرالى كۋالىگىندە ونىڭ اكەسى رەتىندە جازىلماعان.
قازىرگى ۋاقىتتا پوليتسەيلەر بۇل جايتقا قاتىستى باسقا دا دەرەكتەردى جيناستىرىپ جاتىر.
