مينيستر كەلەر جىلدان باستاپ ينۆەستورلار ءۇشىن «ءبىر تەرەزە» قاعيداسىن قولدانا باستاۋدى تاپسىردى
«ينۆەستيتسيالار جانە دامۋ مينيسترلىگىنىڭ باسشىسى القا ءماجىلىسى بارىسىندا حالىققا جانە بيزنەسكە مەملەكەتتىك قىزمەتتەردىڭ قولجەتىمدىلىك دەڭگەيىن ارتتىرۋدى جانە 2017-جىلعا دەيىن بارلىق مەملەكەتتىك جۇيەلەر مەن دەرەكتەر قورلارىن «ەلەكتروندىق ۇكىمەت» پلاتفورماسىمەن ىقپالداستىرۋدى تاپسىردى. سونداي-اق 2016-جىلدىڭ 1- قاڭتارىنان، ال باستى جوبالار بويىنشا 2015-جىلدىڭ 1- قاڭتارىنان باستاپ ينۆەستورلار ءۇشىن «ءبىر تەرەزە» قاعيداسىن قولدانۋ تاپسىرىلدى. سونىمەن قاتار كەلەسى جىل بەرىلەتىن رۇقساتتاما سانى %50- عا قىسقارتىلۋى ءتيىس»، - دەلىنگەن باسپا ءسوز بايانىندا.
بۇدان بولەك، اعىمداعى جىلدىڭ سوڭىنا دەيىن وتاندىق ەكسپورتتاۋشىلاردى قولداۋ ماقساتىندا جۇكتەردى تاسىمالداۋ قۇنىن تومەندەتۋ بويىنشا شارالاردى قاراستىرۋ تاپسىرىلدى.
مەملەكەت باسشىسىنىڭ تاپسىرماسىن ورىنداۋ شەڭبەرىندە اعىمداعى جىلدىڭ اياعىنا دەيىن كولىك قۇرالىن باسقارۋعا بەرىلەتىن سەنىمحاتتى 2015-جىلدان باستاپ الىپ تاستاۋعا، سونىمەن قاتار پايدالانۋ مەرزىمى 7 جىلعا دەيىنگى جەكە اۆتوكولىك قۇرالدارىنىڭ تەحنيكالىق بايقاۋىن الىپ تاستاۋعا قاتىستى ۇيىمداستىرۋشىلىق ماسەلەلەردىڭ بارلىعىن شەشۋگە تاپسىرما بەرىلدى.
«اۆتوجول سالاسىنا قاتىستى مينيستر 2014-جىلدىڭ اياعىنا دەيىن «باتىس ەۋروپا-باتىس قىتاي» ءدالىزىنىڭ 157 شاقىرىم جولىندا جۇمىستاردى اياقتاۋدى، شىمكەنتتەن ر ف شەكاراسىنا دەيىنگى ۋچاسكەدە قوزعالىستى اشۋدى، جول بويىنداعى قىزمەت كورسەتۋ وبەكتىلەرىنىڭ قۇرىلىسى ءۇشىن ۇلتتىق ستاندارتتىڭ جوباسىن بەكىتۋدى تاپسىردى. سونىمەن قاتار مينيسترلىك پرەزيدەنتتىڭ جۇكتەگەن مىندەتىن ورىنداۋ جانە يندۋستريالاندىرۋ ساياساتىنىڭ ەكىنشى بەسجىلدىعىن ۋاقىتىلى باستاۋ ماقساتىندا قىركۇيەك ايىندا ءىس-شارالار جوسپارىنىڭ جوباسىن قاراستىرۋ ءۇشىن ۇكىمەتكە ەنگىزەتىن بولادى»، - دەلىنگەن باسپا ءسوز بايانىندا.
اۆتور: قانات مامەتقازى ۇلى
