ە. تىلەشوۆ: تىلدەر فەستيۆالىن احمەت بايتۇرسىنوۆتىڭ تۋعان كۇنىنە ورايلاستىرۋىمىز - زاڭدىلىق

بۇل تۋرالى بۇگىن استاناداعى ۇلتتىق سۋرەت گالەرەياسىندا وتكەن قازاقستان حالقى تىلدەرىنىڭ XVI قالالىق فەستيۆالىنىڭ اشىلۋ سالتاناتىندا استانا قالاسى تىلدەردى دامىتۋ باسقارماسىنىڭ باسشىسى ەربول تىلەشوۆ ايتتى.

«ەلىمىزدە ابايدىڭ تۋعان كۇنىن بارلىعى جاقسى بىلەدى. كەڭەس وداعى كەزىنەن بەرى تامىزدا اباي اتامىزدىڭ تۋعان كۇنى كەڭ كولەمدە اتالىپ وتەدى. سوندىقتان 5- قىركۇيەك - ۇلت ۇستازى احاڭنىڭ تۋعان كۇنىن دە وسىنداي دەڭگەيگە جەتكىزۋ ماقساتىندا جۇمىس ىستەپ جاتىرمىز. سونىڭ ءبىرى - تىلدەر فەستيۆالىن وسى كۇنگە ورايلاستىرۋ. بۇل فەستيۆال اياسىندا كوپتەگەن شارالار ۇيىمداستىرىلىپ، ول 9- قىركۇيەككە دەيىن ءوز جالعاسىن تابادى»، - دەپ اتاپ ءوتتى ە. تىلەشوۆ.

ونىڭ ايتۋىنشا، فەستيۆالدىڭ ماقساتى - مەملەكەتتىك ءتىلدىڭ مارتەبەسىن، قوعامداعى ءرولىن ارتتىرۋ، قولدانىس اياسىن كەڭەيتۋ، ۇلتتىق قۇندىلىقتاردى ناسيحاتتاۋ. شارانىڭ اشىلۋ سالتاناتىندا ق. قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى ارتىستەرىنىڭ قاتىسۋىمەن قويىلىمدار كورسەتىلىپ، قازاقستاننىڭ تانىمال انشىلەرى باۋىرجان يسايەۆ، مارجان اراپبايەۆا، جاڭاباي وتەگەن جانە ت. ب. ءوز ونەرلەرىن كورسەتتى. سونىمەن قاتار «ناز» بي تەاترىنىڭ بيشىلەرى قازاقتىڭ كوركەم بيلەرىن تارتۋ ەتتى. بەلگىلى ايتىسكەر اقىندار بالعىنبەك يماشيەۆ پەن اسەم ەرەجەپ قىزى ايتىسىپ، ۇلت، ءتىل، ەل رۋحانياتىنىڭ كوكەيكەستى ماسەلەلەرىن جىرعا ارقاۋ ەتتى.

اۆتور: ءابۋ- اسقار مەكەش ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى