الماتىدا ءورت ءسوندىرۋ-قۇتقارۋ سپورتى چەمپيوناتىنا قاتىسۋشىلار شەرۋى ءوتتى - فوتو
رەسپۋبليكا الاڭىنان باستاۋ العان شەرۋگە قاتىسقان ءار كوماندا ەرەكشە سانمەن تىگىلگەن ءتۇرلى-ءتۇستى كيىم ۇلگىلەرىمەن كوز تارتتى. ءوز ەلدەرىنىڭ تۋلارىن كوتەرگەن ءورت ءسوندىرۋشى سپورتشىلار جول جيەگىنە جينالعان قالا تۇرعىندارى مەن مەكتەپ وقۋشىلارىنا، ستۋدەنتتەرگە قول بۇلعاپ ءوتتى.
ال قولدارىنا جالاۋشالار ۇستاعان مەكتەپ وقۋشىلارى سپورتشىلارعا ۇلكەن قوشامەت كورسەتتى. كولوننانىڭ سوڭىنان ءورت ءسوندىرۋشى ماشينالار مەن اپاتتىق مەديتسينا سالاسىنىڭ كولىكتەرى ءجۇرىپ وتىردى. كوڭىلدى مۋزىكانىڭ ىرعاعىمەن جىلجىعان شەرۋ ورتالىق ستاديونعا جەتىپ تارادى.
ەستەرىڭىزگە سالا كەتەلىك، چەمپيوناتتىڭ العاشقى جارىسى ەرتەڭ تاڭعى ساعات 10:00-دا ورتالىق ستاديوندا وتەدى.
مۇندا سپورتشىلار ءبىر-بىرىنە كەدەرگى كەلتىرمەي، بار جىلدامدىقتارىمەن ارنايى مۇنارانىڭ ەكىنشى جانە ءتورتىنشى قاباتتارىنا كوتەرىلەدى. بۇل جەردە ارنايى ساتىدان ۇستاپ كوتەرىلۋگە رۇقسات ەتىلەدى. مارەلىك الاڭقايعا، ياعني ءتيىستى قاباتتىڭ ەدەنىنە ءبىرىنشى جەتىپ، ەكى اياعىمەن تىك تۇرعان سپورتشى جەڭىمپاز اتانادى.
سول كۇنى كەشكە ساعات 18:00-دە چەمپيوناتتىڭ سالتاناتتى اشىلۋى جانە ارنايى ساتى ارقىلى جوعارى كوتەرىلۋدەن جارتىلاي فينالدىق جانە فينالدىق جارىستار وتەدى.
