سەناتور ەلباسىنىڭ ۇلىتاۋدا بەرگەن سۇحباتىنا باعا بەردى
«پرەزيدەنتىمىزدىڭ ۇلىتاۋداعى سۇحباتى مەنىڭ جادىمدا ۇزاققا ساقتالاتىن، ومىرىمدەگى ەڭ ماڭىزدى وقيعالاردىڭ ءبىرى. ارينە، ول سۇحباتتا ەلباسىمىز تۇبەگەيلى جاڭا ءسوز ايتتى دەۋدەن اۋلاقپىز، دەگەنمەن بۇرىنعى ايتىپ كەلە جاتقان تۇجىرىمدارى، وسىعان دەيىنگى باعدارشام ويلارى، پىكىرلەرى جيناقتالىپ، قاراپايىم تىلمەن، حالىققا جەتىمدى دە ءوتىمدى تۇردە قايتا جاڭعىرىپ، ميلليونداعان اۋديتورياعا باعىشتالدى»، - دەپ اتاپ ءوتتى ول.
ونىڭ ايتۋىنشا، بۇل سۇحباتتىڭ تاريحي ماڭىزى بار.
«بۇل تاريحي ءسوز. تاريحي بولاتىن سەبەبى پرەزيدەنت بۇعان دەيىن جولداۋلارىندا، حالىققا ارناۋلارىندا، سۇحباتتارىندا ايتىپ كەلگەن ويلارىن تياناقتاپ، وسىناۋ ءبىر گەوساياسي جاعىنان وتە كۇردەلى كەزەڭدە حالىقتى تىنىشتىققا، بايسالدىلىققا، سابىرلىلىققا شاقىرىپ وتىر»، - دەيدى سەناتور.
ونىڭ ايتۋىنشا، بۇل سۇحباتتا ۇلتىمىزدىڭ تاريحى دا، مەملەكەتتىڭ قالىپتاسۋ جولى دا، ءدىن، ءتىل، مادەنيەت، عىلىم ماسەلەلەرى دە جان-جاقتى قامتىلدى.
سونداي-اق، سەناتور سۇحباتتاعى پرەزيدەنتتىڭ حالىقارالىق تەرميندەردى قازاق تىلىنە اۋدارۋ ماسەلەسىنە قاتىستى ايتقان ويىن دا تارقاتا كەتتى. ونىڭ ايتۋىنشا، بۇل ماسەلە تەك قوعامدا عانا ەمەس، سونىمەن قاتار پارلامەنتتە دە قىزۋ تالقىلانۋدا.
«بۇل ابدەن ءپىسىپ-جەتىلگەن ماسەلە دەپ ويلايمىن. لەكسيكونىمىزداعى حالىقارالىق تەرميندەردى وڭدى-سولدى اۋدارا بەرۋ دە كەيدە تىلىمىزگە كەسىرىن تيگىزەدى. ماسەلەن، ينتەرناتسيوناليزم دەگەن ءسوز حالىقارالىق تەرمين، ونى اۋدارۋدىڭ قاجەتى شامالى. نەمەسە پرەزيدەنت ايتقانداي، كومپوزيتور ءسوزى دە بارلىق تىلدەردە ءدال سولاي ايتىپ ءجۇر. ال ەگەر ماسەلە «سامولەت» دەگەن ءسوزدىڭ «ۇشاق» دەپ اۋدارىلعانى تۋرالى بولسا، ءسوز باسقا. بۇل جەردە بارلىعى وتە ورىندى اۋدارىلعان»، - دەپ اتاپ ءوتتى سەنات دەپۋتاتى
اۆتور: ءابۋ-اسقار مەكەش ۇلى
