جارنامالار قازاق تىلىندە قاتە، ال ورىس تىلىندە ساۋاتتى باسىلادى - ەربول تىلەشوۆ
بۇل تۋرالى بۇگىن تىلدەر فەستيۆالىنىڭ باستالۋىنا وراي وتكەن باسپا ءسوز ءماسليحاتىندا استانا قالاسى تىلدەردى دامىتۋ باسقارماسىنىڭ باسشىسى ەربول تىلەشوۆ ايتتى.
«تىلدەر فەستيۆالى اياسىندا بىرنەشە بايقاۋ وتكىزەمىز، ونىڭ ىشىندە «ۇزدىك جارناما» بايقاۋى دا بار. وزدەرىڭىز بىلەسىزدەر، جارنامالاردا قاتە كوپ. ياعني، جارنامالار قازاق تىلىندە قاتەلەرمەن، ال ورىس تىلىندە ساۋاتتى باسىلادى. ەگەر دە جارناما باستاپقىدان مەملەكەتتىك تىلدە جازىلماسا، مۇنداي كەمشىلىكتەر الداعى ۋاقىتتا دا جالعاسا بەرەدى. بارلىق جارنامالار ەڭ اۋەلى ورىس تىلىندە جاسالىپ، كەيىن قازاق تىلىنە اۋدارىلادى. ال جارنامادا كرەاتيۆتىلىك، پوەتيكالىق، اۋىسپالى ماندەگى تۇستارى، تۇسپالداپ سويلەۋ سەكىلدى ادىستەر پايدالانىلادى. ورىس تىلىندە وسىنىڭ بارلىعى جاقسى جازىلىپ، كورسەتىلگەنىمەن، قازاق تىلىنە اۋدارىلعان كەزدە بۇل كرەاتيۆتىلىكتەن، ايتار ماعىناسىنان ەشتەڭە دە قالمايدى»، - دەيدى ەربول تىلەشوۆ.
«ۇزدىك جارناما» بايقاۋى وسىنداي كەمشىلىكتەردى جيۋعا باعىتتالعان. وسى ورايدا ءتيىستى اعارتۋشىلىق جۇمىستار جۇرگىزىلىپ جاتىر.
«كۇندە مەن 10-15 جارناماعا قول قويامىن. سونىڭ شامامەن 70 پايىزى قاتە بولادى. كۇنىنە ورتاشا العاندا ونىن تۇزەتەمىز. مۇنىمەن قوسا، زاڭسىز ىلىنگەن جارنامالار بار. تاعى ءبىر اتاپ وتەرلىگى، نىسانداردىڭ اتاۋلارىن ادىلەت مەكەمەسىندە تىركەيدى جانە وندا جول بەرىلگەن قاتە اتاۋدى بىزگە بەكىتۋگە كەلەدى. ول قاتەنى بەكىتۋگە مىندەتتىمىز، سەبەبى، ليتسەنزياسىندا قاتە جازىلعان. ونى قايتا بارىپ تۇزەتۋگە كاسىپكەرلەر قارجىسىن، ۋاقىتىن جۇمساپ جۇرگىسى كەلمەيدى. ازاماتتارعا نىسانىن اشۋ مەن جارناما ماڭىزدى، ال ءتىل ءۇشىنشى نەمەسە ءتورتىنشى ماسەلە. كەيبىر تۇسىنگەندەر قايتا تۇزەتۋگە بارىپ جاتادى»، - دەدى باسقارما باسشىسى.
ە. تىلەشوۆتىڭ ايتۋىنشا، ءاربىر ازامات اتاۋى نەمەسە جارناماسى قاتەمەن ىلىنگەن نىسان يەلەرىنە ەسكەرتۋ جاساپ، بەلسەندىلىگىن تانىتۋى ماڭىزدى.
ايتا كەتەيىك، بۇگىن استانادا ءداستۇرلى تىلدەر فەستيۆالى باستالدى. شارا اياسىندا قىركۇيەكتىڭ 19 ىنا دەيىن ءتۇرلى بايقاۋلار مەن شارالار ۇيىمداستىرىلادى.
اۆتور: رۋسلان عابباسوۆ
