قىزىلوردالىق دارىگەرلەر سىم تەمىر جۇتىپ قويعان ءبۇلدىرشىندى قۇتقاردى
الاڭداتاتىنى سول، كىشكەنتايلاردىڭ ويناپ ءجۇرىپ بوگدە زاتتاردى جۇتىپ قويۋ وقيعالارى جيىلەپ بارادى ەكەن.
دارىگەرلەر بىرەر كۇن بۇرىن عانا 3 جاسار جاسۇلاننىڭ تاماعىنان قىلداي سىمدى الىپ تاستادى. اناسىنىڭ كوزىن الا بەرە قولعا تۇسكەن ۇساق- تۇيەكتى اۋىزىنا سالۋدىڭ سالدارى جەڭىل بولعان جوق. قارماقشىلىق ءبۇلدىرشىننىڭ كومەيىنە قادالعان قاتتى زاتتى شىعارۋعا اۋداندىق دارىگەرلەردىڭ قاۋقارى جاتپەگەن سوڭ، جەدەل جاردەممەن وبلىستىق مەديتسينا ورتالىعىنا اكەلىنەدى.
جاۋقازىن ايتبايەۆا، جاسۇلاننىڭ اناسى:
- رەنتگەنگە ءتۇسىردى، سول كەزدە وڭەشىندە ماعان سىم تۇرعانىن كورسەتتى. مەن سول كەزدە ءبىلدىم، ول سىمنىڭ كىر قىستىرعىشتىڭ سىمى ەكەنىن. ەندى بۇل سويلەي الاتىن بالا، ال سويلەي المايتىن كىشكەنتاي بالالار بولسا، وتە قيىن بولادى.
دارىگەر- وتولارينگولوگ ەربول بيسەنوۆ بالالاردىڭ مۇرىن، قۇلاق جانە تاماعىنان الىنعان بوگدە زاتتاردى جيناپ، تاقتاعا ىلگەن. وسىلايشا، ول اتا- انالاردىڭ بالاعا مۇقيات بولۋىن ەسكەرتكىسى كەلەدى. سەبەبى، مايدا زاتتاردى جۇتۋ نەمەسە حيميالىق سۇيىقتىقتاردى ءىشىپ قويۋ بۇلدىرشىندەر ومىرىنە ايتارلىقتاي زيان. وكپە، اسقازان، كومەي جانە وڭەشتىڭ جاراقاتتانۋى كىشكەنتايلاردى مۇگەدەكتىككە اكەپ سوقتىرۋى مۇمكىن.
ەربول بيسەنوۆ، دارىگەر- وتولارينگولوگ:
- بوگدە زات تىنىس الۋ جولىنا تۇسكەن كەزدەردە، كىشكەنتاي بالداردىڭ ەكى اياعىن جوعارى كوتەرىپ، تومەن قاراي سىلكۋ كەرەك، ەكىنشى كومەكتەسەتىن ادام ارقاسىنان جايمەن ۇرۋ كەرەك. سول كەزدە تىنىس الۋ ارقىلى بوگدە زاتتاردى وكپەدەن سىرتقا شىعارۋعا سەبەپ بولادى. ەگەر جاڭاعىداي تاسىلدەر كومەكتەسپەسە، جەدەل اۋرۋحاناعا الىپ كەلۋگە ءتيىستى.
بارماقتاي اعاش جانتاعى، تەمىر بۇراندا مەن سىم، شىنى سىنىعى مەن سۇيەكتەر بالالاردىڭ تىنىس جولدارىنان الىنعان. اق حالاتتىلار مۇنداي جاعدايمەن كۇن سايىن كەزىگەتىندىكتەرىن ايتادى. ءتىپتى، ءبىر تاۋلىكتە 10-15 بالانىڭ اعزاسىنان بوگدە زاتتى الۋ ءۇشىن ارپالىساتىن كەزدەر بولادى ەكەن.
«حابار» ارناسى
