قايدا قاراساڭ، اينۇر مەن ايگۇل
بۇگىندە ەڭبەكتەگەن بالادان ەڭكەيگەن قارتقا دەيىن سەلتيىپ تۇرىپ سەلفيلەتىپ، جۇرگەن-تۇرعانىن، ىشكەن-جەگەنىن، كيگەن كيىمىنە دەيىن سۋرەتكە ءتۇسىرىپ، الەۋمەتتىك جەلىدە كوپشىلىككە جاريالاۋدى ادەتكە اينالدىردى ەمەس پە؟
اۋرۋ قالسا دا، ادەت قالمايدى عوي، ۇلكەن-كىشىنى عالامتورعا ءجىپسىز بايلاعان الەۋمەتتىك جەلىلەر تالايدىڭ «جۇلدىز اۋرۋىن» قوزدىرىپ جۇرگەنىن كوزىمىز كورىپ ءجۇر.
ءوزىمىز دە الەۋمەتتىك جەلىنى پايدالاناتىن بولعاندىقتان ەشكىمگە سوقتىقپايىقشى دەپ جاي جۇرگەنبىز. الايدا «الاش ايناسىنا» ءنازيرا ەسىمدى وقىرماننان كەلگەن مىنا ءبىر حاتتى وقىپ ويلانىپ قالدىق...
«مەنىڭ الەۋمەتتىك جەلىلەرگە تىركەلگەنىمە 2 جىلدان استى. جەلىلەرگە تىركەلكەنىم بولماسا ءوزىم سۋرەتتەرىمدى جاريالامايمىن، پوست تا سيرەك جازامىن، ءبىراق دوستارىم كوپ. ەل الدىندا جۇرگەن تانىمال ادامداردىڭ جەكە ءومىرى قاشاندا كوپشىلىككە قىزىق قوي.
مەنىڭ دە دوستارىمنىڭ اراسىندا تانىمالدار جەتىپ ارتىلادى. ءانشىسى دەيسىڭ بە، كۇيشىسى، اقىنى، جۋرناليسى، ءتىپتى دەپۋتاتى دا بار، سونىمەن نە كەرەك، 7-8 مىڭ ۆيرتۋالدى دوسىمنىڭ اراسىندا ەسىمى ەلگە تانىستارىنىڭ قايسى قاي جەردە، كىممەن، نە ىستەپ جۇرگەنىن ءبىلىپ وتىرامىن.
بۇگىندە ءوزىن ءوزى جارنامالاۋدى جاقسى كورەتىندەر ءۇشىن الەۋمەتتىك جەلىلەر تاپتىرماس «پيار» الاڭىنا اينالدى عوي. جۋرناليستەر مەن اقىن، جازۋشىلار، عالىمدار مەن ساياساتتانۋشىلار ءۇشىن facebook.com پىكىر تالاستىرۋ، اقپارات الماسۋ ءۇشىن قاجەت بولسا، instagram.com اسىرەسە ونەر ادامدارىنىڭ ارلەنگەن بەت-جۇزدەرىمەن، كيىم-كەشەكتەرىمەن، دەمالعان ورىندارىمەن، وقىعان كىتاپتارىمەن، ءۇي-جايلارىمەن ماقتانۋى ءۇشىن ارنايى ويلاپ تابىلعان سەكىلدى.
بۇرىندارى ءانشى، اكتەرلەردى وقتا-تەكتە تەلەديداردان كورسەك ءماز بولاتىنبىز. قالاعا اندا-ساندا كەلگەندە سۇيىكتى انشىلەرىمىزدىڭ كونسەرتتەرىنە بارۋعا، ساناۋلى گازەت-جۋرنالداردا شىققان تۇشىمدى سۇقباتتارىن وقۋعا تىرىساتىنبىز. ال قازىر «جۇلدىز» بىتكەننەن كوز اشا المايتىن بولدىق. كۇندە بەلگىلى ءبىر ادامداردىڭ بەت-بەينەلەرىن كورە بەرۋ دە ادامدى جالىقتىرادى ەكەن. تەلەديدارعا قاراساڭ ءانشىنىڭ ءبىرى باعدارلاما جۇرگىزەدى، كليپكە تۇسەدى، كينودا وينايدى، ودان قالسا قاپتاعان توك-شوۋلارعا كەلىپ ەكراننان ەلگە اقىل ايتادى. ايتالىق، ايگۇل يمانبايەۆانى اكتريسا رەتىندە مويىندايمىن، ءبىراق سول ايگۇل نەسىنە شوۋ-بيزنەستە ءجۇر، ءوزى تويدان دا قالمايدى.
توي دەمەكشى، قازىر ءوزى تويدىڭ ماۋسىمى عوي. دەمالىستارىن شەتەلدە، ولە جاتقانى تۇركيادا وتكىزىپ كەلگەن ونەر ادامدارى ءبىر كۇندە بىرنەشە تويعا بارىپ قارق بولۋدا. اكتەرلەردىڭ كوبى اسابا، ال انشىلەر ساندەلىپ تويعا بارىپ اۋىزدارىن جىبىرلاتىپ كەمىندە 3000 دوللار الىپ كەتەدى. ايتەۋىر تويشىل حالىق «پالەنشەنىڭ تويىنا تۇگەنشە دەگەن انشىلەر كەلدى» دەگەن اڭگىمە ءۇشىن اقشالارىن شاشىپ ءماز.
ال ەندى عالامتورداعى الەۋمەتتىك جەلەلەرگە كەلسەك، ناعىز قىزىق وسى جەردە. تاڭەرتەڭ تۇرا سالىپ ينستاگرامعا كىرسەڭىز اينۇر تۇرسىنبايەۆا اپكەمىز قانداي تاڭعى اس ازىرلەپ، ونى قالاي ءىشىپ-جەگەنىنەن باستاپ سۋرەتتەرىن سالادى. ودان ارى قاراي قايدا باردى، نە كيدى، كىممەن سويلەستى، ول نە دەدى كەشكە دەيىن اينۇردىڭ پاراقشاسىنا كىرىپ كورىپ وتىرا بەرۋىڭىزگە بولادى. ايتىسكەر اقىن حانىم تەك ينستاگرامدا عانا ەمەس فەيسبۋك، تۆيتتەر بارىنە جازىپ ۇلگەرەدى. قانداي سايتقا قانداي قىزىق ماتەريال جاريالانعانىنا دا اقىن اپامىز سىلتەمە جاساپ وتىرادى. ودان قالا بەردى تەلەارناداعى توك-شوۋدىڭ بارىنەن قالماي قاتىساتىن اينۇر جۇرتقا اقىل ايتۋدا الدىنا جان سالمايدى. قىزداي بولىپ جاسارىپ العان اپكەمىز ءوزىنىڭ سۇلۋلىعىنا باسقالاردى دا تامساندىرعىسى كەلەتىن بولۋ كەرەك، كۇنىنە بىرنەشە مارتە سەلفيلەتەدى. كەيدە ويلايمىن، اينۇر حانىمنىڭ عالامتوردا وتىرۋدان باسقا جۇمىسى جوق-اۋ.
اينۇردان ەش كەم تۇسپەيتىن ونەر يەلەرى دە كوپ. ولاردىڭ بارلىعىن اتايتىن بولسام، ۋاقىتىم جەتپەس. ايتەۋىر وزىمە الەۋمەتتىك جەلى دەگەندە كوز الدىما اينۇر تۇرسىنبايەۆا كەلەدى دە تۇرادى.
مەنىڭشە، الەۋمەتتىك جەلىدە انشىلەردىڭ بەلسەندى بولۋى حالىق ولاردى تويعا ءجيى شاقىرسىن دەگەن نيەتتەن بولۋى كەرەك. ويتكەنى توي جاسايتىن كەزدە كۇندە كوزىڭ ۇيرەنىپ قالعان انشىلەرگە حابارلاساسىڭ عوي...».
مىنە، وسىلاي دەپ رەداكسياعا حات جولداعان نازيرا ءبىرتالاي ونەر يەلەرىنىڭ الەۋمەتتىك جەلىدەگى بەلسەندىلىگىن سىنعا الىپتى. وقىرماننىڭ ويىمەن تۇگەلدەي كەلىسپەسەك تە، ءسوزىنىڭ جانى بار ەكەنىن جوققا شىعارا المايمىز. راسىندا كوپ انشىلەر وزدەرىنىنىڭ سۋرەتتەرىن ينستاگرامعا سالىپ، وعان جۇزدەگەن ادام «لايك» باسسا، «سۇلۋسىز، كەرەمەتسىز، كويلەگىڭىز قانداي تاماشا» سەكىلدى ماقتاۋ سوزدەر ايتسا سودان ءلاززات الاتىنى شىندىق. ال الدا-جالدا ءبىر ونەر ادامىنا جاعىمىسىز پىكىر جازا قالساڭىز بىردەن تۋلاپ شىعا كەلەدى، سىن قابىلداي الماي جاتادى.
دەگەنمەن الەۋمەتتىك جەلىدە وتىرىپ، 30 مىڭ وقىرمان جيناپ ءبىر گازەتتىڭ جۇگىن ارقالاپ جۇرگەن ادامدار دا از ەمەس. الايدا قازىرگىنىڭ جاستارىنا ءجۇز سوزدەن كورى ءبىر سۋرەت قىزىعىراق بولىپ تۇر. ءبىراق ونەر ادامدارى سۇيكىمدى سۋرەتتەرىن جاريالاي بەرىپ ەلدىڭ الدىندا سۇيكىمدەرى كەتە باستاعان سەكىلدى. ەندەشە «جۇلدىزدار» سەلفيگە ازداپ موروتوري جاريالاي تۇرعاندارى ءجون-اۋ...
اۆتور: اينۇر نۇرسابەت
«الاش ايناسى»
