ۇكىمەتتىڭ قايتا قۇرىلۋى قىزمەتكەرلەر جالاقىسىنا اسەر ەتەدى

بۇگىن دوسايەۆ ماجىلىستە "ق ر ۇكىمەتى تۋرالى" ق ر كونستيتۋتسيالىق زاڭىنا وزگەرتۋلەر ەنگىزۋ تۋرالى" جانە "ق ر مەملەكەتتىك باسقارۋ دەڭگەيلەرى اراسىنداعى وكىلەتتىكتەردى اجىراتۋ ماسەلەلەرى جونىندەگى زاڭنامالىق اكتىلەرىنە وزگەرتۋلەر مەن تولىقتىرۋلار ەنگىزۋ تۋرالى" زاڭ جوبالارىن تانىستىردى. سوڭعى اتالعان جوبا اكىمدىكتەرگە جاڭا فۋنكتسيالاردى بەرۋمەن بىرگە ورتالىق اتقارۋشى ورگانداردىڭ بەلگىلى ءبىر شتات سانىن جەرگىلىكتى اتقارۋشى ورگاندارعا بەرۋدى قاراستىرادى. وسىعان بايلانىستى دەپۋتاتتار اراسىندا سۇراقتار تۋىندادى.

"ءسىز شتات سانى مەن فۋنكتسيالاردى بەرۋ ماسەلەسىن جەرگىلىكتى اتقارۋشى ورگاندارمەن كەلىسىپ الدىڭىز با؟ ءبىز قازىر زاڭدى بەكىتەمىز، ال كۇندەلىكتى تاجىريبەدە جەرگىلىكتى اتقارۋشى ورگانداردان "بىزگە فۋنكتسيالاردى بەردىڭىزدەر، ال ونى ورىندايتىن ەشكىم جوق" دەگەندى ەستۋىمىز مۇمكىن. بۇدان قانداي ناتيجە بولادى؟ ءبىز مەملەكەتتىك قىزمەتكەرلەردىڭ سانىن قىسقارتىپ، جالاقىسىن ازايتامىز، ويتكەنى رەسپۋبليكالىق دەڭگەيدەن جەرگىلىكتى دەڭگەيگە كوشكەن كەزدە تيىسىنشە ەڭبەكاقى دا تومەن بولادى. بۇدان قارجى ۇنەمدەۋ جونىنەن قانداي دا ءبىر تيىمدىلىك بار ما؟" - دەدى ءماجىلىس دەپۋتاتى ولگا كيكولەنكو.

وعان مينيستر بۇل ماسەلەنىڭ اكىمدىكتەرمەن كەلىسىلگەنىن ايتتى. "سىزدەر بىلەسىزدەر، كەلەسى جىلدىڭ 1 - شىلدەسىنەن باستاپ، ءبىز ازاماتتىق قىزمەتشىلەردىڭ جالاقىسىن وزگەرتىپ، "ۆ" كورپۋسى بويىنشا جىلجيمىز. سوندىقتان مەن ءبىز قوردالانعان ماسەلەلەردى شەشۋگە تىرىسامىز دەپ ويلايمىن. ءبىز ونى ءبىر كۇندە شەشەمىز دەمەيمىن"، - دەدى دوسايەۆ.

زاڭ جوباسى بويىنشا جەر رەسۋرستارىن باسقارۋ سالاسىندا جەرگىلىكتى اتقارۋشى ورگاندارعا جەر زاڭنامالارىنىڭ بۇزىلۋىن جويۋ جونىندە نۇسقاۋلار بەرۋ، جەر زاڭنامالارى سالاسىندا اكىمشىلىك قۇقىقبۇزۋشىلىقتار تۋرالى ىستەردى قاراۋ، پايدالانىلمايتىن نەمەسە ق ر زاڭناماسىنا قايشى جەرلەردى مەملەكەت مەنشىگىنە قايتارۋ فۋنكتسيالارى بەرىلەدى. بۇل سالادا جەرگىلىكتى دەڭگەيگە 515 شتاتتىق بىرلىك اۋىسادى.

اگروونەركاسىپ كەشەنىندەگى مەملەكەتتىك ينسپەكتسيا سالاسىندا اكىمدىكتەرگە ماقتا جانە تۇقىم شارۋاشىلىعىن دامىتۋ، بيووتىن ءوندىرىسىن باقىلاۋ فۋنكتسيالارى بەرىلەدى. بۇل سالادا 110 ادام ورتالىق اتقارۋشى ورگانداردان جەرگىلىكتى اتقارۋشى ورگاندارعا اۋىسادى. مالدارىگەرلىك باقىلاۋ سالاسىندا اكىمدىكتەرگە ۆەتەريناريا جانە تاعام ونىمدەرى قاۋىپسىزدىگى سالاسىنداعى فۋنكتسيالار جانە 1097 شتاتتىق بىرلىك بەرىلەدى.

ەنەرگەتيكالىق قاداعالاۋ سالاسىندا جەرگىلىكتى ورگاندارعا تۇتىنۋشىلاردىڭ جىلۋدى قولداناتىن قۇرىلعىلارىنىڭ تەحنيكالىق جاعدايىن باقىلاۋ، جىلۋ جەلىلەرىنە جوندەۋ-قالپىنا كەلتىرۋ جۇمىستارىن

جۇرگىزۋ فۋنكتسيالارى بەرىلەدى. سونىمەن بىرگە اكىمدىكتەرگە ادىلەت دەپارتامەنتىنىڭ ازاماتتاردىڭ حال اكتىلەرىن تىركەۋ ماسەلەلەرى جونىندەگى اۋماقتىق بولىمشەلەرىنىڭ قىزمەتتەرى اۋىسادى.

ەسكە سالايىق، اتالعان زاڭ جوبالارى پارلامەنتتىڭ قاراۋىنا بۇگىن تۇسكەن بولاتىن. مەملەكەت باسشىسى نۇرسۇلتان نازاربايەۆ ولاردى شۇعىل تۇردە قاراۋدى تاپسىرعان.

اۆتور: التىناي جۇمجۋمينا
«الاش ايناسى»

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى