ق ر ۇلتتىق بانك باسشىسىنىڭ كەڭەسشىسى تەڭگە باعامىنىڭ اۋىتقۋىنا قاتىستى مالىمدەمە جاسادى
«بۇگىنگى تاڭدا ۇلتتىق بانكتىڭ باعامنىڭ 185 تەڭگەدەن +/- 3 تەڭگە 185 تەڭگەگە +3/-15 تەڭگەگە دەيىن اۋىتقۋ ءدالىزىنىڭ كەڭەيۋىنە قاتىستى الەۋەتتى شارالارى قىزۋ تالقىلانۋدا. بۇل جاڭالىققا قاتىستى مالىمدەمە جاساۋ مۇمكىندىگى بۇگىن عانا پايدا بولدى»، - دەپ جازدى و. قۇدايبەرگەنوۆ «فەيسبۋك» الەۋمەتتىك جەلىسىندەگى رەسمي پاراقشاسىندا.
ونىڭ بولجامىنا قاراعاندا، دوللار باعامى 179-182 تەڭگە شاماسىندا بولادى. «2010 - جىلى اقپاندا بولعان تاجىريبەنى مىسال رەتىندە الۋعا بولادى. ديەۆالۆاتسيادان ءبىر جىل وتكەن سوڭ ۇلتتىق بانك 150 تەڭگە +/-%3 دالىزىنەن 150 تەڭگە +%10/- %15 (+15 تەڭگە/-22,5 تەڭگە) دالىزىنە ءوتۋ شەشىمىن قابىلدادى. ءدالىزدىڭ كەڭدىگىنە قاراماستان 1 دوللارعا شاققانداعى تەڭگە باعامى 146-147 تەڭگە بولىپ بەكىدى. وتكەن تاجىريبە مەن بۇگىنگى جاعدايدى سارالاي كەلە، بۇگىندە باعام 179-182 تەڭگە شاماسىندا بولادى دەپ ويلايمىن» ، - دەدى ساراپشى.
سونداي-اق و. قۇدايبەرگەنوۆ رەسەيلىك رۋبلگە قاتىستى مالىمدەمە جاسادى. «تەڭگەگە دەگەن قىسىم قايدان باستالاتىنىن ءتۇسىندىرۋ ءۇشىن تولىق جاسايىن. اعىمداعى جىلدىڭ اقپانىنداعى ديەۆالۆاتسيا كەزىندە 1 دوللاردىڭ قۇنى شامامەن 36,5 ءرۋبلدى قۇرادى. %20-دى ەسەپتەسەك 43,8 بولادى. وسى باعامعا جاقىنداعان سايىن، تەڭگەگە دەگەن قىسىم كوبەيەدى. الايدا، دۇرىسى نومينالدىق باعام ەمەس، ناقتى باعام. بىلايشا ايتقاندا، رەسەيدە ءقازىر ينفلياتسيا بەلسەندى بولا ءتۇستى - بۇل ينفلياتسيا ءرۋبلدىڭ قۇلدىراۋىن قالىپقا كەلتىرىپ، تەڭگەگە دەگەن قىسىمدى جەڭىلدەتەدى. باسقاشا ايتقاندا، رۋبل بويىنشا 20-پايىزدىق قۇلدىراۋعا ينفلياتسيانى الىپ تاستاۋ ارقىلى قاراۋ كەرەك، ياعني ناقتى اۋىستىرۋ باعامى، سىني مەجەل 43,8 ەمەس، ءارى قاراي بولادى»، - دەدى ول.
«رەسەي - جالعىز ساۋدا ارىپتەسىمىز ەمەس ەكەنىن ءتۇسىنۋىمىز كەرەك. سوندىقتان ءرۋبلدىڭ وزگەرۋى جەتكىلىكسىز. مۇنداي وزگەرىس كەم دەگەندە سىرتقى ساۋداداعى 3-4 ءىرى ارىپتەس ەلدە بولۋى ءتيىس. مۇنىڭ بارلىعى كەلەسى جىلدىڭ سوڭىنا دەيىن بولۋى ەكىتالاي، سوندىقتان رۋبل بويىنشا ازداعان اۋىتقۋعا نازار اۋدارۋدىڭ قاجەتى جوق»، - دەپ ءتۇيدى ۇلتتىق بانك وكىلى.
قايرات كەلىمبەتوۆتىڭ كەڭەسشىسى بۇل مالىمدەمە ۇلتتىق بانكتىڭ رەسمي ۇستانىمى ەمەس، ءوزىنىڭ جەكە پىكىرى ەكەنىن اتاپ ءوتتى.
