قازاقستاندا بولۋ ەرەجەسىن بۇزعان قوس شەتەلدىك ازامات قامالىپ تىندى - ب ق و
ب ق و سوتىنىڭ باسپا ءسوز قىزمەتىنەن تۇسكەن مالىمەتكە قاراعاندا، ب. احمادجونوۆ دەگەن ازامات ءبىر ەمەس، ءۇش رەت قۇقىق بۇزۋشىلىق جاساعان.
سوتتا ونىڭ ۋاقىتشا تىركەلۋ مەرزىمى بيىلعى 2 - تامىزدا اياقتالعانىنا قاراماستان 31 - تامىزعا دەيىن قازاقستان رەسپۋبليكاسى اۋماعىندا بولعانى انىقتالدى. وسىلايشا احمادجونوۆ كورسەتىلگەن مەرزىمدە ەلدەن شىعۋدان جالتارىپ، قازاقستان رەسپۋبليكاسىنىڭ اۋماعىندا بولۋ ەرەجەسىن بۇزعان.
سونىمەن قاتار ول بۇدان بۇرىن ق ر اكىمشىلىك قۇقىق بۇزۋشىلىق كودەكسى 394-بابىنىڭ 3-بولىگىمەن قاراستىرىلعان قۇقىق بۇزۋشىلىقتى ءبىر جىلدا ەكى قايتالاپ جاساعانى ءۇشىن اكىمشىلىك جاۋاپكەرشىلىككە تارتىلعان بولاتىن. الايدا ول ارەكەتىنەن ەش ناتيجە شىعارماي، تاعى دا جاڭساق باستى.
ورال قالاسى مامانداندىرىلعان اكىمشىلىك سوتى وسىنى ەسكەرە وتىرىپ، شەتەلدىكتى 10 تاۋلىككە قاماۋعا الۋعا قاۋلى ەتتى. ال س. كيم دەگەن وزبەكستاندىق ازامات ەكى تاۋلىككە قاماۋعا الىندى. سوت تالقىلاۋىندا انىقتالعانىنداي، ول مەرزىمى ءوتىپ كەتكەن ۋاقىتشا تىركەۋمەن قازاقستان رەسپۋبليكاسىنىڭ اۋماعىندا بولعان. ونىڭ ۋاقىتشا تىركەلۋ مەرزىمى 23 - شىلدەدە بىتكەن.
اۆتور: ەلجان ەرالى
