قازاق ونەرىنىڭ ساڭىلاقتارى: ءىليا جاقانوۆ

   1936 - جىلى جامبىل وبلىسىنىڭ سارىسۋ اۋدانىندا تۋعان.  قازاق مەملەكەتتىك ۋنيۆەرسيتەتىنىڭ فيلولوگيا فاكۋلتەتىن بىتىرگەن (1959) . 1959- 1963 -جىلدارى «قازاقستان پيونەرى» («ۇلان» ) گازەتىنىڭ ادەبيەت جانە ونەر ءبولىمىنىڭ مەڭگەرۋشىسى، 1963- 1984 -جىلدارى قازاق ك س ر تەليەۆيزيا جانە راديوحابارىن تاراتۋ جونىندەگى مەملەكەتتىك كوميتەتىنىڭ رەداكتورى، اعا رەداكتورى، قازاق راديوسى مۋزىكا رەداكتسياسىنىڭ باس رەداكتورى قىزمەتىن اتقارعان. 1984 - جىلدان شىعارماشىلىق جۇمىستا.
  «قايتا ورالعان ءان» (1968) ، «قوش بول، ۆالس» (1969) پوۆەستەرى شىقتى. قازاقتىڭ ۇلى قوبىزشىسى ىقىلاس جايلى «كەرتولعاۋ» (1989) رومانى العاش قىرعىز تىلىندە، كەيىن قازاق تىلىندە «ىقىلاس» (1990) دەگەن اتپەن جارىق كوردى. «ەكى جيرەن» (1976) ، «ءبىرىنشى كونتسەرت» (1979) ، «ماحاببات ءۆالسى» (1983) ، «اققۋلار قونعان ايدىن كول» (1988) اتتى دەرەكتى اڭگىمەلەر، ەسسەلەر جانە نوۆەللالار جيناعى، سونداياق «قارابۋرا» (1977) تاريحي تانىمدىق شىعارماسى، «سىنعان قىلىش» (1981) اتتى قىرعىز تىلىنەن اۋدارىلعان (قاسىمبەكوۆ شىعارماسى) تاريحي روماندارى شىقتى. «ءبىرجان سال» ، «اقان سەرى» ، «ۇكىلى ىبىراي» ، «ەستاي ءانشى» ، «جاياۋ مۇسا» ، «ءمادي» ، «مايرا» ، «بالۋان شولاق» ، ت. ب دا سال- سەرىلەر، قازاقستان كومپوزيتورلارى م. تولەبايەۆ، ل. حاميدي، س. مۇحامەدجانوۆ، ق. مۋسين، ب. بايقاداموۆتاردىڭ شىعارماشىلىق پورترەتتەرىن سومداعان شىعارمالارى، «شوقان جانە مۋزىكا» ، «جامبىل جانە مۋزىكا» ، «ساكەن جانە مۋزىكا» اتتى تەلەسەريالدارى بار.
  «قازاق ك س ر- نىڭ ەڭبەك سىڭىرگەن مادەنيەت قىزمەتكەرى» (1990) ؛ «قىرعىزستاننىڭ ەڭبەك سىڭىرگەن مادەنيەت قايراتكەرى» (1994) ؛ الەۋمەتتىك عىلىمدار اكادەمياسىنىڭ قۇرمەتتى اكادەميگى (1997) ، قازاقستاننىڭ ەڭبەك سىڭىرگەن قايراتكەرى (1998) ، حالىقارالىق جامبىل اتىنداعى سىيلىقتىڭ يەگەرى (1997) . «سىرلى جۇرەك پەرنەسى» اتتى ليريكالىق ەسسە كىتابى 2008 -جىلى «ۇشپاق» باسپاسىنان جارىق كوردى. 

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى