قازاق ازاماتى اسا باعالى تىشقان ءتۇرىن ءوسىرىپ بايىماق - كەسكىن
ول اتالعان فەرمانى سالۋ ءۇشىن تاسقالا اۋدانىن ادەيى تاڭداپ العان، سەبەبى بۇل اۋماق رەسەيمەن شەكارالاس. كاسىپكەر مۇحيتتىڭ ارعى جاعىنداعى لاتىن امەريكاسىن مەكەن ەتەتىن كىشكەنتاي جانۋارلاردى بولاشاقتا رەسەيگە وتكىزىپ، كاسىبىن دوڭگەلەنتكىسى كەلەدى. تاسقالا اۋدانىندا قازىر وسىنداي بىرنەشە جاڭا جوبا جۇزەگە اسىرىلۋدا. اسقار مومىنجانوۆ بۇل سالادا كوپتەن ەڭبەك ەتىپ كەلەدى.
ول بۇعان دەيىن قۇندىز اسىراۋمەن اينالىسقان. شينشيللا ءوسىرۋدى تەك بيىل قولعا العان. كاسىپكەر ءوز قارجىسىنا اتالعان تىشقان ءتۇرىنىڭ 50 جۇبىن ساتىپ الىپ، ءوز فەرماسىن اشتى. تىشقاندار اق جايىق جەرىنە جاقسى بەيىمدەلە باستاعان.
اسقار مومىنجانوۆ، كاسىپكەر: - ءبارى جاقسى بولسا، كەلەسى جىلى مەن شينشيللانى كوبەيتۋ ءىسىن قولعا الامىن. جۇرگىزىلگەن زەرتتەۋلەرگە جۇگىنسەك، بۇلاردىڭ 80 پايىزعا جۋىعى ەركەك بولىپ تۋىلادى. سوندىقتان ولاردى بىرتىندەپ ساتىپ وتىرامىز. شينشيللانىڭ تەرىسى وتە باعالى.
بۇگىندە وعان دەگەن سۇرانىس تا جوعارى. ونىڭ تەرىسىنەن تىگىلگەن ءونىمنىڭ باعاسى 10 مىڭنان 100 مىڭ ا ق ش دوللارىنا دەيىن جەتەدى. ولاردى ءوسىرۋ سونشالىقتى قيىن ەمەس. شينشيللالار كۇنىنە 1 رەت تاماقتانادى. تىنىشتىقتى سۇيەتىن جانۋارلاردىڭ جاتاتىن جەرى تازا، تاماعى توق بولۋى كەرەك.
سوسىن اۋا تەمپەراتۋراسى 18 گرادۋستان اسپاۋى ءتيىس. سوندىقتان ولاردى ءبىر جەردەن ەكىنشى ءبىر جەرگە تىرىدەي الىپ بارۋ قيىن. اسقار مومىنجانوۆ، كاسىپكەر: - فەرمانى تاسقالا اۋدانىنىڭ اۋماعىنان اشتىم، ويتكەنى باتىس قازاقستان وبلىسى رەسەيدىڭ 5 ايماعىمەن شەكتەسىپ جاتىر. ساراتوۆ، سامارا، ورىنبور، ۆولگوگراد، استراحان ءتيىپ تۇر. ماسكەۋ دە تىم قاشىق ەمەس.
شينشيللالاردى شىعىس قازاقستان وبلىسىنان رەسەيگە جەتكىزە الماسىم انىق. سول سەبەپتى ءوز كاسىبىمدى دوڭگەلەنتۋ ءۇشىن وسى جەردى تاڭداپ الدىم. اۋداننىڭ گەوگرافيالىق ورنالاسۋى بيزنەسكە وتە ءتيىمدى. وسىنى پايدالانىپ رەسەي نارىعىن يگەرۋ ءۇشىن كاسىپكەرلەر ەلىمىزدىڭ وزگە ايماقتارىنان اقجايىق وڭىرىنە كوشىپ كەلىپ، ءوز ءىسىن اشىپ جاتىر.
استانالىق ينۆەستورلار تاسقالادان 5 مىڭ باس اسىلتۇقىمدى سيىر ۇستاۋعا ارنالعان الاڭ اشۋ ءىسىن قولعا السا، اۋداندا قازىر كومپوزيتتىك ارماتۋرا زاۋىتى جۇمىس ىستەپ تۇر. ءوندىرىس وشاعىندا جاسالعان ونىمدەر دە كورشىلەس رەسەيدىڭ ساراتوۆ وبلىسىنا شىعارىلادى. الداعى جىلى مۇندا قۇرىلىس ماتەريالدارىن وندىرەتىن تاعى ءبىر سەح اشىلماق.
سانجار اليەۆ، تاسقالا اۋدانىنىڭ اكىمى: - بىزدە بۇگىنگى تاڭدا 2-3 جوبا ىسكە اسىرىلۋدا. اتاپ ايتقاندا، شىنى- پلاستيكارماتۋرا شىعاراتىن كاسىپورىن. وندا 4 جۇمىس ورنى اشىلدى. كەيىن بيزنەستى ۇلكەيتكەندە، وندا تاعى ادامدار جالدانادى. جۇمىس ورنى 20 ادامعا دەيىن ارتۋى مۇمكىن.
شينشيللا فەرماسى قازاقستاندا العاش رەت اشىلىپ وتىر. ونداي فەرما ەش جەردە جوق. اۋدان اكىمى كاسىپكەر شينشيللانى الداعى ۋاقىتتا مىڭ باسقا دەيىن جەتكىزسە، اۋدان ورتالىعىنان نەمەسە ورالدان تەرى يلەيتىن جانە تىگىن سەحىن اشۋعا بولاتىنىن ايتتى. ونى رەسەيگە تىرىدەي اپارعاننان گورى، تەرىسىن وزىمىزدە وڭدەپ ساتقان ءتيىمدى.
ال اسىلتۇقىمدى مال باسىن ارتتىرۋ ءۇشىن جەم-ءشوپ قورى قاجەت. اۋدان باسشىلارى بۇل تۇرعىدا بارايەۆ اتىنداعى عىلىمي-وندىرىستىك ورتالىعىمەن مەموراندۋمعا قول قويعان. كەلىسىم بويىنشا تاسقالا اۋدانىنىڭ اۋماعىنا بيىل كوپجىلدىق شوپتەردىڭ جاڭا ءتۇرى ەگىلگەن. شىعىمى وتە جاقسى. سوندىقتان وسىنداعى 10 شاقتى شارۋا قوجالىعى كەلەسى جىلى ءوز القاپتارىنا كوپجىلدىق شوپتەردى وسىرۋگە نيەت ءبىلدىرىپ وتىر.
اۆتورلارى: ارداق ايبار ۇلى، بولات جارىلعاسوۆ، قانات ماحمۇتوۆ
24.kz
