استانادا «جىبەك جولى» حالىقارالىق فەستيۆالىنىڭ اياسىندا «ءبىرجان- سارا» وپەراسى قويىلادى

ءبىرجان پارتياسىن بۇگىنگى كۇننىڭ كورنەكتى تەنورى، وسى پارتيانى ۇزدىك ورىنداۋشىلاردىڭ ءبىرى - احمەت اعادي ۇسىنادى. رەسەيدىڭ ەڭبەك سىڭىرگەن ءارتىسى، تاتارستاننىڭ حالىق ءارتىسى، سارانىڭ ءرولىن سومدايتىن رەسپۋبليكامىزدىڭ ەڭبەك سىڭىرگەن قايراتكەرى، جارقىراعان وپەرا ءانشىسى ايگۇل نيازوۆامەن بىرگە شىرقايدى.

انالىقتىڭ پارتياسىن سەزىمتال، جۇرەكتى ەلجىرەتەتىن دينا حامزينا ورىنداسا، قىزعانشاق التىنايدى جاننات باقتاي وينايدى، ەستاي پارتياسىندا - بەيىمبەت تاڭارىقوۆ.

قازاقتىڭ كومپوزيتورى مۇقان تولەبايەۆتىڭ ۇمىتىلماس تۋىندىسى - «ءبىرجان- سارا»، ابزال مۇحيتدينوۆتىڭ جاڭا مۋزىكالىق رەداكسياسىنان ءوتىپ، يۋري الەكساندروۆتىڭ قويىلىمىندا 2013-جىلدىڭ 21- ماۋسىمىندا «استانا وپەرادا» تۇساۋى كەسىلگەن بولاتىن.

«ءبىرجان- سارا» وپەراسى تەك قازاقستان تەاترلارىندا عانا ەمەس، سونداي-اق، المانيا، تۇركيا، رەسەي، وزبەكستان جانە باسقا ەلدەردە جوعارى جەتىستىكپەن ورىندالۋدا. تۋىندى العاش رەت الماتىدا اباي اتىنداعى مەملەكەتتىك اكادەميالىق وپەرا جانە بالەت تەاترىندا 1946-جىلدىڭ 7- قاراشاسىندا قويىلعان ەدى. العاشقى ورىنداعاندار: ءبىرجان پارتياسىندا - ءانۋار ۇمبەتبايەۆ، سارا پارتياسىندا - كۇلاش بايسەيىتوۆا. رەسەيدە ماسكەۋ قالاسىندا 1948-جىلى قويىلعان بۇل شىعارما تالعامپاز ونەر سۇيەر قاۋىمنىڭ، بىلىكتى تەاتر سىنشىلارىنىڭ جوعارى باعاسىنا يە بولدى.

مۇقان تولەبايەۆتىڭ «ءبىرجان- سارا» وپەراسى جاستار اراسىندا كەڭىنەن تانىلا باستادى. «استانا وپەرا» جۇرگىزگەن ماركەتينگتىك زەرتتەۋگە سۇيەنسەك، تەاتردىڭ ءبىرىنشى ماۋسىمىندا اتالعان سپەكتاكلدە بولىپ، ساۋالناماعا قاتىسقانداردىڭ جارتىسىنان استامىنىڭ جاسى 18 بەن 30 اراسىن قۇراعان. كوپشىلىك، ۇلتتىق وپەراعا، وندا كوتەرىلەتىن تاقىرىپتىڭ ماڭىزدىلىعى مەن وزەكتىلىگىنە دەگەن قىزىعۋشىلىقتى اتاپ ءوتتى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى