باتىس ەۋروپا - باتىس قىتاي اۆتوجولى قۇرىلىسىنا جاۋاپتىلاردىڭ جۇمىسى سىنعا الىندى
جيىندا اۋىل شارۋاشىلىعى، جۇمىسپەن قامتۋ، باعانى تۇراقتاندىرۋ، وڭىرگە ينۆەستيتسيا تارتۋ ماسەلەلەرىن تالقىلاي كەلە، باتىس ەۋروپا - باتىس قىتاي اۆتوجولىنىڭ قۇرىلىسىنا ەرەكشە ەكپىن ءتۇسىردى. بۇل باعىتتاعى ءتيىستى سالا باسشىلارى مەن اۋدان اكىمىنىڭ جۇمىسىن سىنعا الدى. تالدىقورعان - الماتى باعىتىنداعى تاس جولدىڭ ارقارلى اسۋىندا تۇرعان بار-جوعى ەكى ءۇيدى ساتىپ الۋ جۇمىستارىن وسى كۇنگە دەيىن نەلىكتەن شەشە الماي جۇرگەندەرىن شەنەۋنىكتەردەن ءتۇسىندىرىپ بەرۋىن تالاپ ەتتى. جول قۇرىلىسىنا ەداۋىر تەجەۋ بولىپ وتىرعان وسى ماسەلەنى شەشۋگە جەر قاتىناستارى باسقارماسىنىڭ باسشىسى ج. وماروۆ پەن كەربۇلاق اۋدانىنىڭ اكىمى ب. اليەۆكە ءبىر اپتا ۋاقىت بەردى.
باتىس ەۋروپا - باتىس قىتاي ىرگەلى جوباسى ءۇشىن الماتى - قاپشاعاي، الماتى - بىشكەك، الماتى - تالعار، الماتى - شامالعان تراسسالارىنىڭ بويىندا تۇرعىزىلعان نىسانداردىڭ جەرلەرىن ساتىپ الۋ جانە تازالاۋ جۇمىستارى تۋرالى ءسوز بولدى. اتالعان جولداردىڭ بويىنان بۇدان بىلاي ەشقانداي نىسان سالىنباۋى ءتيىس ەكەنىن ا. باتالوۆ قاداپ ايتتى. جانە بۇل ىسكە ءاربىر اۋدان، قالا اكىمدەرى مەن ءتيىستى باسقارما باسشىلارى تىكەلەي جاۋاپ بەرەتىن بولادى.
«الماتى اگلومەراتسياسىنا قاتىستى قالامەن شەكارامىزدى انىقتاپ الدىق. ەندىگى ماسەلە - بەلگىلەنگەن ءوز اۋماعىمىزدى ۋاقىت تالابىنا ساي، زاماناۋي ۇلگىدە، ەستەتيكالىق تالعاممەن ارى قاراي دامىتۋىمىز كەرەك»، - دەدى ا. باتالوۆ.
جيىندى قورىتىندىلاي كەلە، تەك بىرلەسىپ جۇمىس ىستەگەندە عانا ناتيجەگە قول جەتكىزۋگە بولاتىنىن، ول ءۇشىن ءتارتىپ، جاۋاپكەرشىلىك، كاسىبيلىك تالاپ ەتىلەتىنىن انىقتاپ ايتتى.
وسى جيىندا ءوڭىر باسشىسى وبلىس اكىمى اپپاراتىنىڭ باسشىسى لاۋازىمىنا تاعايىندالعان عالىمجان ءابدىرايىموۆتى تانىستىردى. جاڭا باسشىسىنىڭ الدىنا ءبىرقاتار مىندەتتەردى اتاپ ءوتىپ، جۇمىسىنا ساتتىلىك تىلەدى.
