پرەزيدەنت شۇعىل دەپ جاريالاعان زاڭدار مەن كوشى- قون ماسەلەلەرىن قامتىعان قۇجاتتاردى پارلامەنت ءجىتى قاراپ شىعۋى كەرەك - ءماجىلىس ءتوراعاسى
وندا پالاتا ءتوراعاسى قابيبوللا جاقىپوۆ ەلباسى ايقىنداعان مىندەتتەردى جۇزەگە اسىرۋعا دەپۋتاتىق كورپۋستى بارىنشا جاۋاپتىلىقپەن قاراۋعا شاقىردى.
«كەشە سەسسيانى اشۋ بارىسىندا مەملەكەت باسشىسى ءبىزدىڭ الدىمىزعا بۇگىنگى كۇننىڭ تالاپتارىنان تۋىندايتىن اۋقىمدى مىندەتتەر قويدى. ەلباسى ايقىنداپ، الدا ەل ومىرىنە ەنگىزىلەتىن زاڭ جوبالارىن مەن ءۇش توپقا بولەر ەدىم. بۇلار - قازاقستان ەكونوميكاسىنىڭ ورنىقتىلىعىنا باعىتتالعان زاڭ جوبالارى، ەكىنشىسى - ەلدىڭ تۇرمىسىن جاقسارتۋعا، ءۇشىنشى - ەل قاۋىپسىزدىگىن قامتاماسىز ەتۋگە باعىتتالعان قۇجاتتار. بۇنداي باسىمدىق بەرىلگەن قۇجاتتاردىڭ ءوزى الداعى سەسسيانىڭ زاڭ شىعارماشىلىق ۇدەرىسىنىڭ قاۋىرت بولاتىنىن كورسەتەدى» ، - دەدى ءماجىلىس سپيكەرى.
سونىمەن قاتار، ءتوراعا بۇگىنگى كۇننىڭ وزىندە دەپۋتاتتار پرەزيدەنت شۇعىل دەپ جاريالاعان مەملەكەتتىك ورگاندار اراسىنداعى قۇزىرەتتىلىكتىڭ اراجىگىن اجىراتۋعا باعىتتالعان ەكى زاڭ جوباسىن جۇمىسقا العانىن جەتكىزدى. ونىڭ ايتۋىنشا، مەملەكەت باسشىسى باسىمدىق بەرگەن زاڭ جوبالارىنىڭ بارلىعىن پارلامەنت ءجىتى قاراپ، ءوز مەرزىمىندە قورىتىندىسىن شىعارۋى كەرەك.
«اسىرەسە، ازاماتتاردىڭ تۇرمىسىن جاقسارتاتىن، كاسىپكەرلىكتى دامىتۋعا باعىتتالعان، اگروونەركاسىپ كەشەندى دامىتۋ، جەر قويناۋىن پايدالانۋ، ءبىلىم بەرۋ، كوشى- قون ماسەلەلەرىن قامتىعان قۇجاتتار اسا ماڭىزدى. سوندىقتان، الداعى جۇمىسىمىزدا شيراقتىق تالاپ ەتىلەتىن قاربالاستار كۇتىپ تۇر. سول ءۇشىن بارلىق دەپۋتاتتىق كورپۋستى، پارلامەنتتىك فراكتسيالاردى الدىمىزعا قويىلعان مىندەتتەردى جوعارى كاسىبي دەڭگەيدە اتقارۋعا شاقىرامىن» ، - دەدى ق. جاقىپوۆ.
اۆتور: قانات مامەتقازى ۇلى
