قازاق ونەرىنىڭ ساڭلاقتارى:كەڭەس دۇيسەكەيەۆ

1974 - 1976 - جىلدارى «گۇلدەر» ءانسامبلىنىڭ باس ديريجەرى جانە مۋزىكا جەتەكشىسى، 1976 - 1979 -جىلدارى «قازاقكونتسەرت» گاسترولدىك- كونتسەرت بىرلەستىگىنىڭ مۋزىكا جەتەكشىسى، 1975 - 1984 - جىلدارى قازاق تەلەديدارى مۋزىكا رەداكتسياسىنىڭ باس رەداكتورى بولىپ قىزمەت اتقارعان. دۇيسەكەيەۆتىڭ جەتەكشىلىگىمەن «تاماشا»، «حالىق -تالانت قاينارى»، «شابىت»، «جاستارعا ارنالعان مۋزىكالىق كەشتەر»، «مۋزىكا الەمىندە»، ت. ب. تەلەديدارلىق باعدارلامالار شىعارىلدى.

1984 - 1997 - جىلدارى قازاقستان مەملەكەتتىك تەلەراديو كوميتەتى ەسترادالىق- سيمفونيا وركەسترىنىڭ كوركەمدىك جەتەكشىسى جانە باس ديريجەرى بولدى. 1997 - جىلدان «قازاقكونتسەرت» گاسترولدىك- كونتسەرت بىرلەستىگىنىڭ كوركەمدىك جەتەكشىسى. ول - «تولعاۋ» سيمفونياسىنىڭ (1984) ، «جالاڭتوس باتىر» سيمفونيا پوەما- كارتيناسىنىڭ (1996) ، «و، دۇنيە» كانتاتاسىنىڭ(1997) ، «جىل مەزگىلدەرى» رومانستار تسيكلىنىڭ (1991) ، «ءمادي»، «اققۋ جىبەك» ميۋزيكلىنىڭ، «الدار كوسە» وپەرەتتاسىنىڭ، سيمفونيا- كونتسەرتتەر، اسپاپتارعا ارنالعان كونتسەرتتەر، كامەرالىق وركەسترگە شىعارمالار، سوناتا، راپسوديا، ۆارياتسيالار جانە 200 دەن استام اندەردىڭ اۆتورى. دۇيسەكەيەۆ اندەرىن ر. رىمبايەۆا، ن. ەسقاليەۆا، م. ءجۇنىسوۆا، ا. مەيىربەكوۆ، ن. ونەربايەۆ، م. داۋلەتباقوۆا، ت. ب. انشىلەر ورىنداپ ءجۇر.

دۇيسەكەيەۆتىڭ مۋزىكاسىندا قازاقتىڭ ۇلتتىق ءداستۇرى قازىرگى زاماندىق مۋزىكا تىلىمەن ۇندەسىپ، جاڭا سيپاتقا يە بولادى. كومپوزيتور قولتاڭباسىنىڭ ايرىقشا قاسيەتتەرى كوڭىلگە قونىمدىلىعىندا، مۋزىكا ءتىلىنىڭ مانەرلىلىگىندە. ونىڭ شىعارماشىلىعىنىڭ بۇل ەرەكشەلىكتەرى مىنا دۇنيەلەرىندە انىق بەلگى بەرەدى: كامەرالىق وركەسترگە ارنالعان «جايلاۋداعى تاڭ»، «كوشۋ»، حور كاپەللاسىنا ارنالعان «و، تۋعان جەر». دۇيسەكەيەۆ ءان جانرىندا دا ءوز باعىن سىناپ، حالىق جۇرەگىنەن جول تاپتى. ونىڭ اندەرىن جاس تا، كارى دە ىقىلاسپەن تىڭدايدى. ونىڭ «سالەم ساعان، تۋعان ەل» ءانى ەسترادا جۇلدىزدارى ر. رىمبايەۆا مەن ن. ەسقاليەۆانىڭ رەپەرتۋارىنان بەلدى ورىن العان. 

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى