ۇلتتىق بانك تەڭگە باعامىن وزگەرتۋ تۋرالى شەشىم قابىلدايدى
بۇل تۋرالى ق ر ۇلتتىق بانكىنىڭ ءتوراعاسى قايرات كەلىمبەتوۆ بۇگىن الماتىدا وتكەن يسلام قارجىلاندىرۋ كونفەرەنتسياسى بارىسىندا ءمالىم ەتتى.
«تەڭگە باعامىنىڭ 185 تەڭگەدەن +/-3 ءدالىزى رەسەي رۋبلىنىڭ 40-42 باعامىنا شاققاندا وتە شىدامدى بولىپ وتىر. تامىزداعى قورىتىندىعا سايكەس ەلىمىزدىڭ التىن- ۆاليۋتالىق رەسۋرستارى 27,7 ميلليارد تەڭگەگە ءوستى. ءبىراق كەيبىرەۋلەر نەگە ەكەنى بەلگىسىز، شىعىن كوپ دەپ جاتىر. قازىر تەڭگەنىڭ نىعايۋىنا قاجەتتى كەڭىستىك تۋىپ وتىر. سونىڭ ىشىندە ءبىز +/-3 ءدالىزىن كەڭەيتۋدى جوسپارلاپ وتىرمىز. ول 185 باعامىنان +3, -15 بولادى. ودان ءارى 181,180, 179 باعامدارىنىڭ اۋىلى الىس ەمەس. ءبىز ونى وسى اپتانىڭ ىشىندە جۇزەگە اسىرماقپىز» ، - دەدى ق. كەلىمبەتوۆ.
بۇگىنگى كونفەرەنسيا بارىسىندا قايرات كەلىمبەتوۆ يسلام قارجىلاندىرۋ جۇيەسىن دامىتۋ ءۇشىن ءۇش نەگىزگى باعىتتى بەلگىلەدى. ونىڭ ويىنشا، قازاقستاندا ادام كاپيتالى، زاڭنامانى جەتىلدىرۋ، يسلام قارجىلىق قىزمەتتەرىن ەنگىزۋ ءۇشىن ينفراقۇرىلىم جاساۋ، ماركەتينگ پەن يسلام قارجىلاندىرۋ نارىعىنىڭ قاتىسۋشىلارىن تارتۋ قازاقستانداعى يسلامدىق قارجىلاندىرۋ جۇيەسىن نىعايتا تۇسپەك.
ول سونىمەن قاتار قارجى نارىعى قاتىسۋشىلارىنىڭ ۇسىنىس- پىكىرلەرىن يسلامدىق قارجىلاندىرۋدى دامىتۋدىڭ 2020 - جىلعا دەيىنگى جول كارتاسىنا ەنگىزۋدى ۇسىندى.
«قازاقستان يسلامدىق قارجىلاندىرۋ جۇيەسىنىڭ العاشقى كەزەڭىندە بولسا دا، مۇندا كوپ جۇمىس جاسالدى. ماسەلەن، يسلامدىق قارجىلاندىرۋدى دامىتۋدىڭ 2020 - جىلعا دەيىنگى جول كارتاسى قابىلداندى. مۇندا بەلگىلى يسلام بانكى - Al Hilal Bank ءوزىنىڭ بولىمشەسىن اشتى» ، - دەدى بانكير.
اۆتور: گۇلميرا عوسمانالي
