ق ر ۇكىمەتىنىڭ حالىقارالىق بانكتەر الدىنداعى قارىزى قانشا؟

بۇل تۋرالى قازاقپارات تىلشىسىنە بەرگەن سۇحباتىندا ق ر قارجى مينيسترلىگى مەملەكەتتىك قارىز الۋ دەپارتامەنتىنىڭ ديرەكتورى قۋات اقجانوۆ ءمالىم ەتتى.

 «2014 - جىلعى 1-  شىلدەدەگى جاعداي بويىنشا حالىقارالىق بانكتەر (حالىقارالىق دامۋ جانە قايتۋ قۇرۋ بانكى، ازيالىق دامۋ بانكى، ەۋروپالىق دامۋ بانكى، يسلام دامۋ بانكى) الدىنداعى مەملەكەتتىك (ۇكىمەتتىك) قارىز 4 ميلليارد ا ق ش دوللارىن قۇرادى نەمەسە ۇكىمەتتىڭ جالپى سىرتقى قارىزىنان 81,3 پايىزدى قامتىدى» ، - دەدى ول.

 ونىڭ سوزىنە قاراعاندا، ۇكىمەت سىرتتان قارىز الا وتىرىپ، رەسپۋبليكالىق بيۋدجەت تاپشىلىعىنىڭ بولىگىن جابۋمەن قاتار، ەل ەكونوميكاسىندا باسىمدىقتى ينۆەستيتسيالىق جوبالاردى قارجىلاندىرادى.

 «قازىرگى كەزدە ۇكىمەتتىك سىرتقى قارىز الۋ اياسىندا جۇزەگە اسىرۋ كەزەڭىندە جالپى سوماسى 5,2 ميلليارد دوللاردىڭ 21 جوباسى قامتىلعان. قازىرگى پورتفەلدەگى سالالىق قۇرىلىمدا ىسكە اسىرىلىپ وتىرعان زايمداردا جول قۇرىلىسى باسىم بولىگىن الىپ وتىر - 94 پايىز. ال قالعان 6 پايىزىنا دەنساۋلىق ساقتاۋ، ءبىلىم بەرۋ مەن عىلىم، مەملەكەتتىك باسقارۋ جانە قورشاعان ورتانى قورعاۋ باعىتتارى تيەسىلى» ، - دەدى ول.

 ماسەلەن، ۇكىمەتتىك سىرتقى زايمداردىڭ ەسەبىنەن جامبىل، الماتى، وڭتۇستىك قازاقستان، اقتوبە جانە  قىزىلوردا وبلىستارىندا «باتىس ەۋروپا- باتىس قىتاي» حالىقارالىق كولىك ءدالىزى قۇرىلىسى اياسىندا جولداردى قايتا جاساۋ، سونداي- اق ماڭعىستاۋ وبلىسىندا «بەينەۋ- اقتاۋ» اۆتوجولىن قايتا جاساۋ» جوباسى اياسىندا جۇمىستار قاراستىرىلعان.

قارجى مينيسترلىگىنىڭ مالىمەتىنە قاراعاندا، 2014 - جىلعى 1 - شىلدەدەگى جاعداي بويىنشا مەملەكەتتىك قارىز  4833,4 ميلليارد  تەڭگەنى (26,3 ميلليارد ا ق ش دوللارى) قۇرادى. مەملەكەتتىك بورىشتىڭ جالپى كولەمىندە ۇكىمەتتىك قارىزدىڭ ۇلەسى 99,5 پايىزدى قامتىپ وتىر.

ق. اقجانوۆتىڭ ايتۋىنشا، سوڭعى جىلدارى قازاقستاننىڭ مەملەكەتتىك قارىزىنىڭ دەڭگەيى شەكتەن تىس اسىپ وتىرعان جوق. ۇكىمەتتىك قارىز دەڭگەيى مەن وتەۋ اعىمى قاۋىپسىز ارالىقتا تۇر.

اۆتور: رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى