بوقتاماسا باسى اۋىراتىن بالانىڭ اتا-اناسىن ىزدەستىرىپ جاتىر
پاۆلودارلىق پوليتسەيلەر جەرگىلىكتى بيلىكتەن ءۇش جاسار بوقتاعىش نارەستەنى ىزدەستىرۋ شاراسىنا قالا جانە اۋدان اكىمدەرىن دە ارالاستىرۋىن سۇراپ وتىر. «پوليتسيا قىزمەتكەرلەرى پاۆلوداردا تۇراتىن جاعدايى تومەن بارلىق وتباسىن ارالاپ قايتتى، ودان بولەك قالاداعى بارلىق اۋلالار مەن ويىن الاڭدارى دا تەكسەرىلدى. ءدال قازىرگى ۋاقىتتا الگى بالا مەن ونىڭ اتا-انالارىن ىزدەستىرۋ شاراسى جالعاسۋدا.
الدىن الا بولجام بويىنشا، بۇل بالا وبلىس ورتالىعىندا تۇرماۋى دا مۇمكىن. سول سەبەپتى پوليتسەيلەر پاۆلودار وبلىستىق اكىمدىگىنە ارنايى حات جولداپ، ىزدەستىرۋ شاراسىنا قالالار مەن اۋدان اكىمدەرىن، باسقا دا مەملەكەتتىك ورگانداردان بوقتاعىش نارەستە مەن ونىڭ اتا-اناسىن تابۋعا ارالاستىرۋدى سۇرادى»، - دەپ حابارلايدى پاۆلودار پروكۋراتۋراسىنان.
ۆەدومستۆو سونداي-اق، قالالىق ءبىلىم باسقارماسىنان الگى نارەستەنىڭ قالاداعى مەكتەپكە دەيىنگى ەشبىر مەكەمەدە تىركەۋدە تۇرماعانىن بىلگەن. پەداگوگتار بالانىڭ ەكىباستۇز نەمەسە اقسۋدا تۇرۋى مۇمكىن ەكەنىن ايتىپ وتىر.
ەسكە سالامىز، بوقتاپ سويلەيتىن بالانى ءتۇسىرىپ العان بەينەكورىنىس YouTube پورتالىنا وسى جىلعى شىلدەنىڭ 21 ءى كۇنى ىلىنگەن بولاتىن. ول بەينەروليكتەن ول بالانىڭ جاسى شامامەن ۇشتە ەكەنى بايقالادى. ول بەينەروليكتە اۆتوموبيليستەر قوعامىنىڭ ەكى ەرەسەك وكىلىمەن سويلەسكەندە ءاربىر ەكىنشى ءسوزىن بوقتاپ سويلەگەن.
بەلسەندى قوعام وكىلدەرى بەينەروليكتە ايتىلعان سوزدەرگە وزدەرىنىڭ ەش قاتىسى جوق ەكەنىن، الايدا مۇنداي ماسەلەدە ۇندەمەي قالۋ مۇمكىن ەمەس ەكەنىن ايتقان. بەلگىلىسى ول بالانىڭ ەسىمى الىشەر. قوعام وكىلدەرى پاۆلودار وبلىستىق پروكۋراتۋراسى دەرەۋ ارەكەت ەتىپ، اۋىزى بىلاپىش سوزگە تولى بالانىڭ اتا-اناسىن جاۋاپقا تارتاتىنىنا سەنىم ارتتى.
كەيىنىرەك بەلگىلى بولعانىنداي پاۆلودار قالاسىنىڭ پروكۋرورى نۇركەن جاناحمەتوۆ الگى بالانى پوليتسەيلەرمەن قاتار ءبىلىم بەرۋ سالاسىنىڭ قىزمەتكەرلەرى دە تارتىلعان. ونىڭ سوزىنە قاراعاندا، بالانىڭ اتا-اناسى نەمەسە اسىراۋشىسى تابىلاتىن بولسا ولار اكىمشىلىك جاۋاپكەرشىلىككە تارتىلاتىن بولادى.
